¹ Nani nanai hup mimungk kasayang gan Yisu Kirisi, Anutu gariak gan. ² Gisu hup ming mamin sap propet Aisaia gan in ginia, ''wararab, Zi gikab garam basinta ginungk i agua, nanai garam aru wi yamari agam kandaham gam. ³ Kwan basinta gakaiak ba i parat kakarak ina ginia gisuni, 'namari kandaham Suraham gan, namari i kandaham gan anai nasu mimungk.''' ⁴ Yuanis giba girurub garamsagat i parat kakarak miah ina gikab hup Anutu gan wat garam yamari sampan in yaku mpuirurub i yakuhis kurinai maisan. ⁵ Garamsagat sib Yuda gan ka i Jerusalem gihan gararab anai. Gisunai in kurinai ginia maisan in Yuanis garurub kurinai i mpui Jodan. ⁶ Yuanis ga gagar wah mpumpung garam sup aiang ka gaharu sampan i raik in giga kapumarim wat biguab buman wap. ⁷ Yuanis gini hupharab bumur gisuni, ''Garam basinta yangan yatamur izi, bumur an ru wagungk izi bumur angk. Ka zi ma mimungk i yatirak i buak an haru i hagarumpun gan iayah. ⁸ Zi garurub agam i mpui, ka nanai yangan yarurub agam i bumur marapayam gan.'' ⁹ Ina nanai ru gikas wat gubuak, Yisu ba Nasaret i Galili in Yuanis garurub i mpui Jodan. ¹⁰ Gubuak Yisu ru ku mpuirurub sib, in gararab ganungkun kazairun in marapayam ba buamp i gin gisu gaziab buil. ¹¹ Kwan basinta gimi ganungkun giba in ginia gisuni, ''Nani zi gariak angk nizun, zi nuguang nizun igin. ¹² Ingka gingan marapayam giku gihan parat mami garam mpai aiah. ¹³ Yisu gimpai parat garam mami mpai aiah gisangk gubuak 40 in garam mais giba gakirib Yisu. Yisu gimpai bi guhin buman wap gan ingka angira giba gimarigin. ¹⁴ Ingka gubuak kuri kab Yuanis mpuirurub gan i butua wasak, Yisu giba gikas Galili in ginia harab hup mimungk Anutu gan, ¹⁵ in ginia gisuni, ''gubuak ru giba karuni, in paratraham Anutu gan ru giba simpingk, agam wamari sampam in bumur i hup mimungk.'' ¹⁶ Gubuak Yisu banua ba gaiin i mpui huak Galili, gararab raiinrabuan hirukangkua, Saimon ingka Andru. Hirukangkua gigab gum rim haikuaing iha mpui i aus kurinai garam ku bipi gan. ¹⁷ Yisu gini hirukangkua gisuni, ''Agam hirukangkua waba gin wasantamp izi, in zi yakapiri agam hirukangkua i ku garam. ¹⁸ Ingka gahigut arutak, hirukangkua gingkiti haikuiang gan ingka giha gasantamp Yisu. ¹⁹ Gubuak Yisu banua han tamanak bis, gararab Jems, Sebedi gariak gan, ingka Jon raingan Jems, hirukangkua ru gigab gum mari haikuaing kurinai gan. ²⁰ Yisu gakayak i hirukangkua in hirukangkua gazagari ramangan Sebedi bi garam gabgum gan, ingka kurinai gasantamp Yisu. ²¹ In kurinai giba parat Kapenaum i huguan mpai Gasap gan, Yisu giha gakatang i tagursunta garam Yuda gan in gikab wayant wat kurinai. ²² Kurinai gakutamirun igin i hup kabayang gan gisubi Yisu garam basinta wi gab bingan, Yisu gikab wayant wat kurinai gisubi garam wi gab bingan, ka ma gisu garam wayant lo gan amuk. ²³ Gingan garam basinta wi mpampai tagursunta wasak garam Yuda gan anai, nanai gigab marapayam mais in i gakayak raham bingan, ²⁴ in ginia gisuni, agai yagan aus i agua, Yisu Nasaret gan? Agua giba ini yawaya agai ahin? Agai gararab agua wi. Agua Anutu gariak gan mimungk aru mangan. ²⁵ Yisu gakayak rahambingan i marapayam mais anai in ginia kurinai, agam wangkiti nihup, wangkiti gin in wakas waba. ²⁶ Ingka marapayam mais anai girim garam anai gihan buamp i kitamp, ingka ginkiti garam anai gikas giha wat kayakayang raham. ²⁷ Garamsagat marikum gararab wah sunanai in kurinai gakutamirun, in kurinai gakantui rungan gisuni, nani gan wah aus anai? Ma nanai hup harih i gan? Marapayam mais awah gayangua i hup gan in kurinai gabnua!'' ²⁸ Hup anai gazarang pisit i paraparat mi wasak i Galili. ²⁹ Gigan kurinai gikas sibi tagur sunta Yuda gan, kurinai giba gakatang i tagur Saimon wat Andru gan bi Jems wat Jon. ³⁰ In garam disaipel gini wat Yisu, Saimon hinian gan rinimais raham in ru gigiangk. ³¹ Gisunai in Yisu giba gigab i bangkian gan in giku hantab. Gahigut arutak rinimais gazugub sibigin ingka i ru gimari kurinai ganangkiruak gan. ³² Karunanai gan, gubuak ru gihan, kuri giku garamsagat rinimais rugarugan wi su rinimais marapayam mais giba i gin. ³³ Garamsagat marikum parat gan giba in gihuangk masiahuan tagur anai gan. ³⁴ Yisu gimari garamsagat marikum wi ku rinimais rugarugan, ka giku marapayam mais pias i giba gikas, ka ma gikab marapayam mais gini hup amuk, i aus kurinai ru gararab sib. ³⁵ Yisu gitakirun wat marahuguan kus, gubuak ma gipuk amuk, gihan parat mangan in ru giyu. ³⁶ Saimon wat hiruk wi mpai bi Yisu gagarui gin. ³⁷ Kurinai gararab in ingka kurinai gini gisuni, ''Garamsagat marikum gagarui agua.'' ³⁸ Yisu ginia gisuni, agi nahan parat mangan, in zi yakab Anutu hup gan, i aus i hugun gan in zi giba gani. ³⁹ Yisu gikas gihan i hain marikum parat Galili gan in gini harab Anutu hup gan, i tagursunta wasak garam Yuda gan ka giku ganun mais pias. ⁴⁰ Garam mangan ku rinimais suruh gibai gin, gagantu haganugun in gakantui gin gisuni, ini agua nuguam, agua gisangk yakab izi yangan hak. ⁴¹ Wat sampan nuhayang, Yisu gikab bangkian hantab iayah in ginia wat gisuni, zi nuguangk gangk nizun i yagab, agua yangan hak. ⁴² Anungka gahigut rinimais suruh gingkiti gin ingka i gingan hak. ⁴³ Ingka Yisu ginia hup bumur igin in gikab i gihan. ⁴⁴ Yisu ginia wat, ''Wangkiti nia wat hiruk i wah aruni kas i agua, ka wahan in wakapiri rinim gam wat pris ka wakab wahgam i agua rinim gam su mimungk, gisu Moses niagayang, in nanai yasu gagaingk yahai kuri. ⁴⁵ Ka i gikas gihan in ginia wat garamsagat marikum i wah Yisu gab i gin. Gisunai in Yisu ma gakatang i parat mangan amuk. In Yisu gihan gimpai parat mangan mi tamanak i parat raham in garamsagat marikum abingk abingka gibai gin.