¹ Gubuak mangan Yesu giyuh, hin garam gan ragia gayang basinta gini hup gisunani, "Garam Raham, agu yakabpiri hup businayang gisu Jon kab pirigin wat garam gan ragia gayang." ² Ingka Yesu gisuntai gin i hup an gisunani, "I gubuak agam yuh gayang, agam wayuh wasunani, Ramangk agu bingam gam gimpai holi. Wakab kingdom gam waba. ³ Gubuak maimaik agu yakab nam wat agai yasu gubuak arunai. ⁴ Ingka wakuhis agai mais gangk pias, i aus agai gahukis mais kuri hiruk nang i agai. Ingka wangkiti kab guanayang i agai." ⁵ Ingka Yesu gini wat kurinai, "Ini mangan i wasak agam gam garam gan gimpai, ka ini yahai gin i mikuan, ka gikantui gin gisunani, 'Nimbir wakab hirunkangkua basingka bret wat izi, ⁶ i aus zi nimbir gangk mangan giba gikas wat karunani hin nam mia i kab wat. ⁷ Ka ini nimbir an mpai tagur wasak, ka gisuntai i hup an gisunani, "Wangkiti kab kukuap wat izi. Masiawan tagur rugagagirun, ka gariak wat agai rugigiangk. Zi ma yamunti hin yakab bret wat agu gamuk." ⁸ Zi gini wat agam, ramangk tagur an yani nungk i yatakirun i kab bret wat nimbir an. ⁹ Gisunanai hin zi gini wat agam, 'Agam wayuh hin wakantui Anutu i yakab wat agam wa mangamangan agam kab sampan i gin, ka i yakab wat agam. Agam wagarui wa mangamangan, ka agam yararabayang. Agam wanganting masiawan ka Anutu yatirak i agam. ¹⁰ Garam santan giyuh hin gakantui Anutu nanai kurinai gikua ka garam garuigin nanai kurinai gararab ka garam nganting masiawan, masiawan gakazairun i kurinai. ¹¹ Ini agam mangan gam gariak gan, i gikantui ramangk gan i bipi gisank i yakab kamak wat? ¹² O ini gariak kantui ramangk gan i kuruwit mangan,ramangk gan yakab wahrinan mais wat hahin? ¹³ Agam garam sagat barabin, ina agam rugikab wahmangan mimu-mimunk wat gari-gariak agam gam. Gisunai ina agam Ramangk gam mpai gan unkun, i sampan gan mimunk i yakab Marapayam i garam kantui gin." ¹⁴ Yisu giku marapayam mais mangan gimi wasak i garam mubaba mangan pias. Gubuak marapayam mais han sib igin, garam mubaba ganai gini hup. Ka kuri santan gikutumirun. ¹⁵ Ingka garamsagat hiruk ginia, "I rugiku marapayam mais pias i Belsebul bumurr gan,marapayam mais garam guzun gan." ¹⁶ Kuri hiruk gikantui Yisu i yangan mirakel mangan i yakapiri yasuni, ganungkun gan nizun. ¹⁷ Ina Yisu rugirarab wayant kurinai gan, gisunai ka i gini wat kurinai, "Ini garam sagat kantri mangan gisu hirukankua ka giyasrun wasak i rungan, kantri arunanai yangan mais. ¹⁸ Ingka Sadang wat kuri gan garumpurun gisu wasak ka giyasrun, hin gisu aus i yaku bumur i yasu guzun i kurinai? Zi gini gisuni i aus agam gini zi hukis marapayam mais i Belsebul bumur an. ¹⁹ Hin nanai nizun zi gahukis marapayam mais i Belsebul bumur an, ingka agam kuri gam gahukis marapayam mais i wia bumur an a? Agam kuri gam yakab i pisit gisu agam ma gini hup simpim amuk. ²⁰ Ka ini zi hukis marapayam mais i Anutu bumur an, ingka agam wayant nasu Kingdom Anutu gan i yaba i agam. ²¹ Yesu gini hup zua gisuni, "Ini garam bumur mangan gab wa mangamangan yasrun yah, ka gimpai sib i tagur an, wa mangamangan gan yami mimungk. ²² Ka ini garam mangan bumur an raham ba yasrun wat garam arunai hin nusayang, ingka yaku i yantuik wat tampa ka bainat garam anai gan. Ka i yaku wa mangamangan i tagur an awa. ²³ Garam mami mpai izi kuri gangk, nanai gimpai buman wat izi. Ka garam mami wat izi mpuru garam sagat, nanai gararu kurinai antabhahub. ²⁴ Yesu gini hup zua gisuni, "Ini marapayam mais mangan kiti garam mangan, ingka giha gabanua antabhahub i parat sarasiri, i gagarui wa mangan yaku gasap yah. Ini mami rarab ayang, ingka i gini hup, 'Zi yaha zua i garam arunai mamuan zi mpai yah.' ²⁵ I gubuak marapayam mais ba zua hin rarab tagur mi pisit hin mimungk arumangan, ka gimin angkutak ka garam mia. ²⁶ Ingka i gihan hin giku 7-pla marapayam mais zua, ginus i gin i nang wa mais. Ingka kurinai yaha yampai wasak i tagur arunai. Nungk garam arunai gimpai mais, ingka karuni yampai mais yantingayang." ²⁷ Gubuak Yesu nihup arunai, sagat mangan gimpai wasak i garam sagat santasantan ka gikayak garat raham hin gini hup, "Sagat arunai ku agua ka kab tut wat agua, nanai yaku sampan mimungk." ²⁸ Ingka Yesu gini hup, "Mobeta agi nihup, garam sagat yangu hup Anutu gan ka ragia gayang nanai yaku sampan mimungk." ²⁹ Garam sagat santan zua giba gihuangk, ka Yesu gini hup, "Garam sagat i gubuak arunai nanai kurinai garam sagat mais. Kurinai gikantui i yararab mirakel mangan, gikas pisit i kurinai gisu Anutu kab zi giba. Ingka kurinai ma gararab mirakel mangan amuk. Kurinai yararab arutak mirakel Jona gan. ³⁰ Nungk Jona gikas gisu mirakel, Anutu gikab pisit i garam sagat Ninive gan. Hin a Gariak Ramangk gan yampai yasu mirakel Anutu gan i garam sagat i gubuak arunai. ³¹ Anutu gikab gubuak mangan i ya kotim garam sagat, Kwin saut gan yaba yamunti ka yani garamsagat kandaham mais gan harab i gubuak arunanai. I aus i giba bampampiarr i yayangu wayant mimunk ka Solomon wayant gan. Ina karunani mangan ini nus Solomon gimpai nani, ina agam ma gikab ringan igin amuk. ³² Garam sagat Ninive gan yamunti Anutu kot gan, ka yani kandaham mais garam sagat gan harab i karunani i gubuak arunanai. I aus kuri nunk gini sampan maragayab i sampan barabin gan i gubuak Jonah nunk gini hup harab. Mnagan ini nus Jona gimpai nani, ina agam ma giringnant igin amuk. ³³ Yisu gini zua gisunani, "Garam ma gimintung lam ka gikab umpun o gihangkasib i baket amuk. Miya, kurinai gikab i pisit ka garam-sagat giba tagurr wasak, yangan kurinai yararab pisit arunanai. ³⁴ Agu maran gam nanai lam agu rinin kitamp gan anai. Ini agu maran gam mimunk, agu rinin kitamp gam yahuank wat pisit. Ina ini agu maran gam mais, agu rinin kitamp yampai kamikuan. ³⁵ Gisunanai ka agu wamari rungam, pisit aru mmpai wasak i agua ganai yatip yasu mikuan zua. ³⁶ Ini, agu rinin gam sib pisipayat ka mangan ma mikuan amukAgu rinin gam sib yami pisit yasu zarh lam gan yakapiri pisit wat agua." ³⁷ Gubuak Yisu gini hup sah ayang, Farisi mangan gikantui Yisu i yaha wat yaga nam tagurr gan. Ka Yisu wat giha gigan. ³⁸ Farisi arunanai gubuak santan rugirarab gisu, Yisu ma gikanuk bangkian gisu kandaham kurinai gan ka i gimpahub ka gigan. ³⁹ Ina Garam Raham gini wat gisunani, "Agam Farisi gamari kumpiak hahuan gan wat kambi, ina sampan agm gam gihuank wat kandaham rarab rungam i rarab rungam tak ka kandaham mais. ⁴⁰ Agam subaba garam! Garam mangan gigab gum i pisit, gisu i ma yagab gum i wasak a? ⁴¹ Agam wakab wat garam maragayab ausa gimi wasak, ka agam wah mangan sib yami pisit. ⁴² " Ina agam kuri Farisi, agam wamari rungam. Agam giikab hahan ka ganagkiruak gum gan tak yasu 10 hain, ina agam ma gikab nuguan i Anutu gamuk ka agam gingkit i kandaham mimunk. Nanai yangan mimunk zua ini agam gab kandaham mimunk ka gigab kandaham kab nuguan i Anutu, ka ma gingkiti lo hiruk. ⁴³ Agam Farisi, agam manangk. Agam gisu nuguan i yaku sia nungkayang i mpai wasak i tagur sunta, ka agam gini garam sagat santan yani gubuak wat agam i parat kab ganangkiruak ya. ⁴⁴ Agam manangk. Agam gisu bumpui guapayang, ka garam sagat ma gararab amuk hin gabanua hahuan ya. ⁴⁵ Kidungwaga basinta lo gan giyangua hup karunai ka gini wat Yesu gisuni, "Kidungwaga, hup aus agu niagayang gikab agai sampan barabin nizun." ⁴⁶ Ka Yesu ginia, "Agam manangk, agam kidungwaga lo gan! Agam gikab garam sagat gabariang barabin raham, aus agam rungam ma gikab wa mangan i yamari kurinai amuk. ⁴⁷ Agam manangk, i aus agam gikab bumpui profet gan i rumpun agam gam nungk yas ayang. ⁴⁸ I nangkuraham karunai agam gikab piri i garam sagat gisuni, agam sampan basinta wat rumpun wasam. I aus, kurinai giyas profet ka agam gatihun kurinai. ⁴⁹ I mimungk ka wayant Anutu gan gini hup gisuni, 'Zi yakab profet wat aposel, ingka kurinai yasu mais i kurinai ka yayas kuri hiruk gan yamamp ayang.' ⁵⁰ Buik profet an nungk gihus i gubuak Anutu kab kitamp kasayang i giba karuni, garam sagat kurinai mpai gubuak karunai yaku mais kuri hiruk an nungk yas profet mamp ayang. ⁵¹ Nungk i Abel ba gubuak kuri yas Sekeraia. Nanai profet karunai kurinai yas i tagur sunta, wasak i alta ka i tagur Anutu gan. Ihi, zi gini wat garam sagat kurinai mpai karuni yaku barabin garam hiruk nungk yas profet. ⁵² Agam manangk, agam kidungwaga lo gan. Agam giku pias ki wayant an. Agam rungam ma gakatang gihan amuk, ingka agam santing nangkuraham i kuri hiruk gini yahan ayang." ⁵³ Yesu gini hup sib ka gingkiti tagur arunai ka gihan. Ka garam wayant yas ayang lo gan ka Farisi kurinai sampan mais i Yesu ka kurinai gakantui Yesu i hup rugarugan. ⁵⁴ Kurinai gini yagarui barabin i hup wasak Yesu niagayang.