¹ Mamuan mamuan ingking hup gimin, hup gimin bi Anutu, ingka hup anai Anutu. ² Ingka hup anai, mamuan ingking gimi bi Anutu. ³ Wah mangamangan santan nanai gikab, ingka nanai mu gimin, yangan wah mangan miah yakas, in yamin ayang. ⁴ maratac gimi wasac i nanai, ingka maratac anai zah garam sagat santan gan. ⁵ Zah anai girim i kamikuan ingka mikuan mu gazaum igin amuc. ⁶ Anutu gikab garam basinta giba, bingan gan anai Jon. ⁷ Nanai giba ginia hup zah i pisit yangan garam sagat yamunti bumul iayah. ⁸ Jon rungan, mu zah anai amuc miah, giba ginia hup zah anai pisit. ⁹ Nanai gisu zah nizun yaba kitamp in yakab zah wat garamsagat santan. ¹⁰ Rungan gimpai i kintamp gan kab ayang, nka garamsagat ma gararab amuc miayah. ¹¹ Nanai giba parat wain gan, nka garam sagat gan mu gikua gamuc miah. ¹² Nka garamsagat hiruc wie kua nanai, ingka munti bumul i bingan gan, rungan gikab bingan wat i gimpai gisu Anutu gariac gan. ¹³ Garam wie ma kas i buic ma kas i linin ma kas i garam, nanai gikas i Anutu. ¹⁴ Hup gikas gisu garam in gimpai wasac iagi. Bingan wat i bumul gan raham bingan agi gararab, nanai gariac ku bingan raham ba i Anutu, ingka nanai gihuangk i Anutu sampan nuh ayang wat hup nizun. ¹⁵ Jon gakayac in gini hup harab gisuni, "Garam arunanai zi ginia gisuni, nanai yaba tamur izi nka nanai giku bingan i haus mamuan ginungk gimpai in zi. ¹⁶ Nanai gihuangk sampan nuhayang ingka sampan nuhayang aru nanai rungan gimari agi santan. ¹⁷ Moses gikab lo tac, Yisu kirisi gikab sampan nuhayang wat hup nizun. ¹⁸ Gubuac mangan garam mangan mu gararab Anutu gamuc miaah. Nanai Anutu basinta wie mpai simpingk bi Ramangk, nanai gikab Ramangk i gikas pisit. ¹⁹ Ingka nanai Jon hup gan, gubuac Juda kab garam pris wat livai i Jerusalem ba kantui gin, ''Agua wie nizun?'' ²⁰ Nanai mu gahumpun hup amuc nka gikab hup i pisit gisunani, ''Zi mu Kirisi.'' ²¹ Ingka garam anai gakantui gin, ''Agua wie nizun? Agua Ilaija?'' Ingka Jon ginia gisuni, ''Mu izi gamuc.'' Garam gikantui zuah, ''Ini agua propet awah?'' Jon ginia, ''Miaah.'' ²² Garam anai ginia Jon, ''Agu wie nizun, yangan agai yaku hup yahai garam kab agai bagayang? Agu yani rungam yasu haaus?'' ²³ Jon ginia, Zi gisu kuangk ru kayac parat sarasiri miaah: 'Nagab Suraham nangkuraham gan nami surung,'gisu propet Aisaia nia gaiyang.'' ²⁴ Ingka garam Farisi gikab garam gan hiruc gihan nai. Kurinai gikantui Jon in ginia gisuni, ²⁵ ''Gisuhaus in agua garurub garam, ini agua ma Kirisi ma Ilaija ma propet?'' ²⁶ Jon ginia hup gihai garam anai in ginia, ''Zi garurub agam i mpuie tac. Nka garam mangan gimpai wasac i agam. Nka agam maram gararab amuc. ²⁷ Garam arunai yaba kirikian izi, zi mu mimungk i yatirac buac i hagarumpun gan amuc.'' ²⁸ Gisunai parat Betani Jodan mpui marahain, Jon gigab mpururub. ²⁹ Gubuac mangan Jon gararab Yisu ba i gin in ginia, ''Wararab, karunanai Anutu gariac sipsip gan wie yaku mais kitamp ani gan pias! ³⁰ Zi ginungk ginia garam arunanai, 'Garam ba tamur izi giku namba i haus in ginungk gimpai mamuan ie zi.' ³¹ Zi mu marangk gihuar amuc, ka zi giba garurub garam i mpuie nka nanai yangan yami pisit i garamsagat Isrel.'' ³² Ingka Jon ginia hup harab ie pisit, ''Zi gararab marapayam gimi ganungkun in giba buamp gisu gaziab mangan subi balus in giba gimpai hahuan ie Yisu. ³³ Zi mu marangk gihuar amuc, garam kab izi ba rurub garam ie mpui ginia wat izi, Garam wie agu rarab marapayam ba buamp in mpai hahuan iayah, nanai garam yarurub garam ie marapayam. ³⁴ Zi gararab in ginia harab gisu nanai Anutu gariac gan Yisu.'' ³⁵ Kirikian gan, i gubuac mangan, Jon ru munti bi disaipel gan hirukangkuah, ³⁶ Kurinai girarab Yisu banua ba hanayang, ingka Jon ginia, ''Wararab, Anutu gariac sipsip gan.'' ³⁷ Jon disaipel gan hirukangkua gayangua Jon niahup annai ingka kurinai gihan gisantamp Yisu. ³⁸ In Yisu ginic in garab kurinai santampayang ingka Yisu gikantui kurinai, ''Agam gisunai hausa?'' Ingka kurinai ginia, ''Garam gabkatangayang'' (hugun gan ginia ''Tisa'') ''Agua gimpai abingka?'' ³⁹ Yisu ginia wat kurinai, ''waba gin wararab.'' In kurinai giba gin girarab ie mpai aiyah. Igubuac arunai kurinai wat gimpai ie haus gubuac maran ru hirah 4kilok. ⁴⁰ Disaipel hirukangkua gannai mangan gan wi yangua hup Jon niahgayang anai in santamp Yisu hanayang nanai Andru raingan Saimon Pita. ⁴¹ Nanai bampan gan, gingan girarab raingan Saimon in ginia wat, ''Agai ru gararab Mesaia'' (hugun gan gisuni: 'Kirisi'). ⁴² Andru giku Saimon Pita gibai Yisu. Ingka Yisu girarab in ginia, ''Saimon, agua Jon gariac gan. garam yagan yania agua Sifas'' (hugun gan Pita). ⁴³ I gubuac mangan, Yisu gini yabanua yahan Galili, Yisu gararab Pilip in ginia wat gisuni, ''wasantamp izi.'' ⁴⁴ Pilip ingka Andru ingka Pita kurinai taun gan Betsaida. ⁴⁵ Pilip gararab Nataniel in ginia wat gisuni, ''garam aru Moses lo gan, wat garam propet niah gayang ubuah, agaie ru gararab, nanai Yisu, Josep gariac gan parat gan Nasaret.'' ⁴⁶ Nataniel ginia nai Yisu, ''Gisangk waah mimungk mangan yakas Nasaret?'' ingka Pilip ginia wat, ''waba gin wararab.'' ⁴⁷ Yisu gararab Nataniel baii gin in ginia, ''Wararab nanai garam nizun Isrel gan, mu garam zuhup ayang amuc!'' ⁴⁸ Nataniel ginia, ''Agu gararab izi gisu hausa?'' Ingka Yisu ginia hup gisuni, ''Pilip mu gakayac i agua gamuc,i gubuac agua mpai gai fik ragurun, zi ginungk gararab aguah.'' ⁴⁹ Nataniel ginia gisuni, ''Kidungwaga, Aguah Anutu gariac gan! Aguah King Isrel gan!'' ⁵⁰ Yisu ginia hup i gan wat in ginia, ''Zi ginia wat aguah, Zi girarab aguah mpai gai fik ragurun? Aguah gabilip izi? Aguah yangan yararab waah raham nushs nani gan.'' ⁵¹ Yisu ginia, nizun bingan, Zi giniah wat aguah, aguah yangan yararab ganungkun zagarat, ingka Anutu angira gan han wagungk ingka ba warangk i Anutu gariac gan.''