¹ E Paul, oilo la totorobola te Kraist Isus, me tabarabarala e Timoti, soio taume e Pilimon, e tabarabara miteu ale amite vigolu vikapopo, ² E Apia e lohatavile miteu, soio tai taume e Akipus etabara miteu tela vaubila, me soio tela lotu te Kraist ale vikapopo oilo la luma taume. ³ La gilogo ge taume mela tia madila te Deo e tama gato me la Uru e Isus kraist. ⁴ Bibi eau vei tataho e Deo taku la imamala eau gabutala eme oilo kilaka taku tomi, ⁵ La vuhula eau loloti la tautaulailo ale eme tahokea iolo tela uru e Isus mela ilisulisu ale eme tahokea soio tegite la valua tetala ale maroka. ⁶ La kilaka taku via la vitabarila tela tautaulailo taume age vagari, ila eme ge rovi matagaga tomi la papaga ale tartigi ale amite tahokea iolo te Kraist. ⁷ Eau tahoka la sagegela mela vagari la vuhula tela gilogo taume, la vuhula la hate gite la valua te Deo ale maroka eme vivagarigari egiteu tabaragu. ⁸ Oilo vola, eau tahoka la vagari oilo te Kraist ge bahataro eme ge igo la rova eme koramuli ge igoa, ⁹ Soloio la vuhula la gilogo, eau kaka lou emei- eau, e Paul, eau uru ti, igoie eau pou la kilisi te Kraist Isus. ¹⁰ Eau ga tahi lalai me te latugu e Onesimus, eau baumuli eia mae e latugu tela imala eau pou tela kilisi. ¹¹ La imala isa eia mae la tahalo bulahu moli soio taume, alamoli ale igoe eia ge vaisuli sele soio taume me taku tai, ¹² Eau bahataro rivu ti eia soio taume le, eia la hategu sele, ¹³ .Eau gabutala viage sautola eia omai taku me eia ge igoluagu me eia ge taume la imala ale eau ge oilo la kilisi tela merera te uru moli. ¹⁴ Alamoli eau kama masaga ge igo bulahu moli isa la paga lotigu la pokemu. eau kama masaga la igolu taume ale tartigi ge loio tela gilabulabu ouka age loilo sele la hatemu. ¹⁵ A sele eia ba malau taro emei la imala isasa, tio ale eme ge abi rivu lou eia a kati ge beuriv loua. ¹⁶ Eia katige la tahalo la igolu bulahu moli, eia ge isapolo loio tela tahalo la igolu, eia ge e tabaramu la hatemu, la masagala uru sele oio tetala, ale lomai taku, soio taume tai, oio tela vovo me oilo tela uru tai ¹⁷ Mae moli eme abi eau mae e tala isasa moli, eme ge abi eia mae tai eau. ¹⁸ Mae eia tahoka la tikumula soio taume ouka eia makodo isa la paga oio taume, tau la papaga tomi oata taku. ¹⁹ Eau, e Paul, kekesila la limagu lou. eau lou ge koli rivua- umala via eme makodo eau eme rivu lou! ²⁰ Asele, tabaragu, eme ge igoa gu isa la paga oilo tela Uru; vahalaba la hategu oilo te Kraist. ²¹ Eau abi la vagari tela iromulila taume,eau kekesi somai taume. eau rovia eme ge igolu loata teale eau tahi me ovola. ²² Tela imala alele, raragi isa la kapi utu la vikapopola taku, eau matamulia via oilo la kilaka taume egite ge abi rivu eau somai taume. ²³ E Epapras, amila pou la kilisi oilo te Kraist Isus, sagege robo emei, ²⁴ E Mak tai igoa maele, e Aritakus, e Demas me Luk, amite vigolu vikapopo. ²⁵ La gilogo tela Uru gatou e Isus Kraist ge vikapopo mela kalulumu. Amen.