¹ Teq tutimmo ya isenlul Juda on matawta na ginadin emad ya inad ayahmo meqniysa ihol afaqan diq iyaqta. Ya inad ayahta emaiqta na in kazaq. Ya Krais susumun ugid in ya gileh yageq imuzid ya le saw meqintab ossa ² in ya isenlul na giwaqid in yaqmo ban waqeq dimunmo os daqay haqad ya inad emaiqta. ³ Heltamo ya bilaqaiq.Ya Krais ago mat iyim ya a hi katiyaiq. Teq God ago Bugaw Dimunta ya inad wamuzsa ya igemab inad araq a hi loyinaiqmo. ⁴ Yaqgo mataw na in Isrel on matawta teq mebmebmo God in gililewunim giwaqan in ago onmin tiqiyiyta. Ad in God ahol anuwan teq ago zaway in gime anonabmo ahol waqiyta. Teq God in Isrel on mataw na gidimun tonnan haqad tuteqmo in gisesan nenaq an adugan wazyaqta. Ad teq in ago Maror Moses bilamta na tinagmo. Negan Isrel mataw gimomo in God ayon tamaz emgo adan na waqiyta. Teq God in mataw naqmo gidimun tonnan haqad gamuk hel diqmo gibilanta. ⁵ Isrel mataw gisesan aqen diqta na gibin ayah diqmo usaqta. Teq Krais in mat diq iyim Isrel-mo gisenlul giduganib gwahtiqim in ginedan araq iyim osta. Krais in nagah bun diqmo gigo danmebta iyim in giwamuzim osaqta. Ossa God agem dimunta ugsa in nazaqmo Kuluwa-kuluwmo tuqosdaqta. Hel diqtaqmo. ⁶ Tutimmo ya isenlul na Krais gileh ugsa ya ginan inad diq meqniyaqta. Teq ya inad emaiq. God Isrel on mataw gidimun tonnan bilamta agamukan na le saman diq a hi iyaqta haqaiq.Na ezaqgo Isrel bunmo in God ago on matawta iyim a hi osayta. ⁷ Ad on mataw Abraham alulib gwahtiqiyta na bunmo in Abraham ago anaynayniz diq iyim a hi osaytamo. Kwaziqmo God in Abraham bulonim bilam, Ni nitatin Aisak-mo ago onminta naqmo ginan Abraham asenlulibta haq daqay ham. ⁸ Gamuk na alulin in kazaq God ago onmin in matmo araq alulib a hi gwahtiqayta. Haiqgam. On mataw God gamuk hel diqmo bilamta agamukan na alulib gwahtiqayta naqmo in ginan Abraham asenlulibta haqaqta. ⁹ Na ezaqgo God in Abraham hel diqmo bulonim kazaq bilam, Ulig araq kob kam kazaqtab ni niwe Sara amun tiqemid teq ya muleqeq ta boldaiq ham. ¹⁰ Teq gamuk ta araq usaqmo. Rebeka ago onmin giger araqibmo giqamta na in mat amulikmo alulib gwahtiqiyta. Teq mat na in I gises Aisak-mo. ¹¹ Ta teq onmin giger na ginen agemab usad daq araq dimunta meqinta a hi emsa God anad emad amun amikta na ulum kemim aholyon waqan usta. Ad in anad amta nazaqmo diq tugwahtiqdaq haqad in Rebeka bulonim onmin giger na ginan kazaq bilam, Amun danmeb hitiqdaqta na in amikqan ago kabibiy mat tiqiydaq ham. ¹² Onmin na kabiy daq emsa teq God gibiyad ginan nazaq a hi bilamta. Haiqgam. God anadibmo mataw gilumwiyim gililewunaqta. ¹³ Na ago iyan God ago marib in gamuk kazaq bilam, Ya Jekob anan inad bilaqsa ya Iso anan inad a hi bilamta ham. ¹⁴ God daq nazaq emsa teq I ezaq haqam? God mataw giluwiyim giwaqaqta na in daq meqinta emaq haqam e?Haiq kidik! ¹⁵ God in Moses kazaq bulon, Ya on mataw ginan inad meqniynan inad usaqta naqmo ya ginan inad meqniyaqta ham. Ad ya on mataw gilowan tonna inad usaqta naqmo ya gilowan tonaiqta ham. ¹⁷ Ne ginad emiy. God ago marib in Isip gigo king Fero bulonim bilam, Yaqgo zaway ningo hib ulal iy hasdaq yaqmo niqeman ni king iyim ban ulilibta nab osaqta ham. Yaqgo zaway ningo hib ulal iysa teq on mataw og saw bunmo ya ibin tuhurit daqay ham. ¹⁸ Nazaq iyan God in mat araq anan anad meqniynan anad bilaqas in mat na anan anad timeqniyaqta. Ad in mat araq agem emid soqotnan anad bilaqsa in anadibmo nazaq tiqemaqtamo. ¹⁹ Teq luweq ne gigo araq kazaq ya ibilendaq. God nazaq emsun ta nagaqgo mataw daq meqinta emsa in nan negaqta haqdaq? In on mataw ginan bilamta nazaq in gigo hib gwahtiqsa araq diq God anad na othasgo ago zaway haiqta haqdaq. ²⁰ Mat ni nazaq God wadaqta na ni naga matin diq? Kagoh araq in mat kagoh emaqta na susumun ugeq bilaqdaq, Nagaqgo ni kazaq ya iqam haqad in nazaq bilaqdaq e? ²¹ Mat kagoh emaqta na in og soskaq waqeq amalib kagoh giger tiqemdaq.In araq kabiy dimunta emgo tiqemda. Emid teq nog in mat kagoh giqamta na bulondaq, Ni daq meqin emaq haqdaq? Na haiqgam. Mat na anadibmo nazaq emgo inmo aholib usaqta. ²² Ad nazaqmo God kagoh asor gimeqin tongo tigiwastitayan osaymo. Abeb in kagoh na ginan agem meqiniysa gibay zilayad in ago zaway teq in ago agem meqniy na on mataw bunmo tigiqisihundaq. In nazaq haqad kagoh meqinta giqeman osayta. Teq in kagoh meqinta na gihulosan sisaqmo tuqosiy. ²³ Na ezaqgo in kagoh asor dimdimunta inmo abin dimunta teq in ago os dimunta negnan haqad tigiwastitayan osaymo.In anad emaq, Ya kagoh dimdimunta na ginan inad meqniysa yaqgo nagah dimdimunta nagan ayahmo tigibiy daqay haqaq. ²⁴ Ari kagoh dimdimunta na in i on mataw God tigililewunan osauqta naqmo. Teq in on mataw giliewunad in Juda on mataw gimomo a hi giwamta. Haiqgam. In on mataw en ta asor Juda a haiqta nagan gigo asor inaqmo tigiwammo. ²⁵ Nantut Hosea bilamta nazaqmo in tiqam. Hosea God aqez tutim bilam, Ya on mataw yaqgo dauhib a haiqta na ginan yaqgo dauh tihaqdaiq ham. Ad ya on mataw ginan inad a hi bilamta na ginan ya iqutilmo diq tihaqdaiq ham. Haqad in kazaq ta bilammo. ²⁶ Teq uliq saw ginan bilaq yaqay, Ne God ago dauh a haiq haq yaqayta nab in gibin God kayeqmo osaqta na ago onminta tuqusdaq ham. ²⁷ Ari teq Aisaya in Isrel on matawta na ginan atoranmo kazaq bilam, Isrel gigo on mataw in kabemmo diq bilaqne kamisib ibur nog iyim osayta ham. Ta teq Iyahta in mataw na gilikmanib amulik -mulikmo gilumsiheq tigiwaqdaq ham. ²⁸ Na ezaqgo in og kab on mataw meqinta giyon bilamta na adan emad in agudan a hi emdaq ham. Ad in on mataw na bunmo gigo daq amenin negad in araq diq a hi hulosdaq ham. ²⁹ Haqad Aisaya ta bilam, Bab mataw Heven-ib osayta gigo Iyahta na in Isrel gigo asor gihulosid a hi oseq in gihol amagin tartay nagta ham. Uliq giger Sodom ayow Gomora inaq gigo on mataw bunmo tihiqiy bugiyta nazaq in tihiqiy bug nagiymo ham. An Aisaya bilamta nazaqmo diq tugwahtim. ³⁰ Ari teq i ezad haqam? I kazaq diq bilaqam. On mataw en ta asor Juda a haiqta nagan in giholtuw bulad God ameb titnonta a hi iyiy haqam. In God aqez anan helmo haqsamo God in ginan titnonta tiham haqam. ³¹ Ari Isrel on mataw na in God ago maror Moses bilamta na muzinnad in giholtuw diq bulad luwayta. Ta teq in maror na ago gunun a hi wol net bugad in God ameb titnonta a hi iyayta. ³² Nagaqgo in God ameb titnonta a hi iyayta? In God aqezmo anan helmo haqid God in ginan titnonta haqdaq nazaq in ginad a hi emayta na ago iyan. In ginad emay, I God ago maror Moses igta na ahaqenib iyeq ago gunun muz bugeq teq i God ameb titnonta iyam haqayta. Ta teq in dante na muzad luwsa gig gisen woltadaqta na gisen woltaysa in tuwoqata. ³³ God ago mar bilamta nazaqmo in emayta. Gamuk na bilam, Ahol waqiy ham. Ya uliq Sayon-ib gig araq mataw gisen woltayid woq daqayta na eman tuqusaq ham. On mataw gig na ahol a hi waqadmo lehsa gig na gisen woltayid in tuwoq daqay ham. Ari on mataw gig na anan helmo haqayta na bunmo in ya imeb turad gimebay a hi woqdaq ham.