¹ Ari i mataw ginad helta tizilimta na i mataw ginad helta teqmo zilimaqta na gigo gunun ahaqenib iyeq gilumsihsa i ginadibmo hi luwaq. ² Haiqgam. I bunmo i giyogniz gigi gunun ahaqenib iysa in i ginan ginad dimniysa in ginad helta na zilim bugan . ³ Na ezaqgo Krais anadibmo a hi luwta. Haiqgam. God ago marib gamuk araq bilamta nazaqmo in amta. Gamuk na bilam, Mataw ni ninad gamuk meqinta bugiyta na agamukan yaqmo waqim ihol ug bug ham. ⁴ God ago gamuk kwaziqmo mar tonayta na bunmo in I suleq gigo mar tonayta. Mar tonan I gamuk na anadin emad gigem zaway iysa afaqan sorad i gituw a hi hiqiyaqta. Gituw a hiqiysa God teq i gidimun tondaq haqad i amen emim osauqta. ⁵ Teq ya inad ayahta ne gigo hib kazaq usaq. God zaway igsa i gituw a hi hiqiyaqta na inmo ne giqemid ne bunmo ginad amulikmo Krais Yesus anad nog iyeq ne araqibmo osiy haqaiq. 6 Osad ne bunmo giqez araqibmo rom toneq ne i gigo Iyahta Yesus Krais amam God-mo abin iluwad osiy haqaiq. ⁷ Nazaq iyan ne Krais asen muzeq in agem dimunta negad nenaq osaqta nazaqmo ne bunmo an alowab tonad osaymo. Ad ne daq nazaq emad ne God abin emid ayah iyan. ⁸ Ne yaqgo gamuk ka hurit kemiy. Kwaziqmo God in Juda gisesan gidimun tonan haqad hel diqtaqmo gibilanta. Gibilenan teq Krais in God ago gamuk helta na emid anon inaq iydaq haqad in Juda gigo kabiy mat nog gwahtimta. ⁹ Teq in on mataw en ta asor Juda a haiqta naganGod ago anad meqniy giqisihunid in God abin tiqiluw daqay haqad in gwahtimtamo. God ago marib gamuk bilamta nazaq. Gamuk na bilam, Ya on mataw en ta asor Juda a haiqta nagan gilikmanib osad ya nibin tiqiluwdaiq ham. Ad ya bar wazad niholnan wazid tiqeraqdaqmo ham. ¹⁰ Ad God ago mar ta bilam,Ne on mataw en ta asor Juda a haiqta na ham ne God ago on mataw nenaq ginad dimniysa osiy ham. ¹¹ Teq in a ta bilam, Ne on mataw en ta asor Juda a haiqta nagan bunmo Iyahta abin iluwiy ham. Ad on mataw en bun diqmo God abin sorad ulilibmo gwalehan ham. ¹² Teq ta Aisaya bilam,Jesi asenlulib king araq tugwahtiqdaq ham. Gwahtiqeq in on mataw en bunmo tigiwamuzdaq ham. Giwamuzsa on mataw en ta asor juda a haiqta nagan in king naqmo ago hib gihol bunmo emad in ginad em daqay, God teq mat kaqmo amalib i gidimun tondaq haq daqay ham. ¹³ God nazaq ne gidimun tonan bilaqan ya in inaq gamuk emad ya ne gimen kazaq bulonaiq. God haqaiq. Rom mataw na in ni ninad helmo haqad nibaq tonim ossa ni in giwamuzhaqaiq. Giwamuzsa in gigem kute nemsa ginad dimniysa osayta na in giholib ate gwaleq usan haqaiq. Ussa in ningo Bugaw Dimunta ago zaway amalib nibaq tonad in giwaz meqniyeq osiy haqaiq. ¹⁴ Ya imaqbaban, Ya igemabmo diq ne ginan inad kazaq emaiq. Ne daq dimdimunta emad osayta teq ne nagah bunmo ago ginad em hasayta tea ne an suleq gigo azawayin ne giholib ayahmo usaqta haqaiq. ¹⁵ Teq ya a hi rabad ya ne giyon gamuk mar tonta kab ya ne ginad enqenungo haqad gamuk asor awaz meqinta kawa Umar ton. Na ezaqgo God agem dimunta yagad in ya itowun eman ya in ago kabiy nazaq atoranmo emgo iyim osaiqta. ¹⁶ In ya itowun eman ya Krais Yesus ago kabibiy mat iyim ya on mataw en ta asor Juda a haiqta nagan gilikmanib in ago kabiy emayta. Kabiy emad ya on mataw en amo amona gigo mat tamaz emaqta nog iyim ya in gigo hib God I gimen dante amta na agamukan dimunta na gibilenaiqta. Gibilensa Bugaw Dimunta in on mataw na asor giqemid in God ago on mataw tawon diqta iyid teq ya in giwaqeq tamaz nog God ugid in akabiyan tidimniydaq haqad ya kabiy emaiqta. ¹⁷ Ya Krais Yesus-mo aholib soqotim inaq osad ya God ayon kabiy na emaiqta. Nazaq iyan ya ihol abin iluwad bilaqaiq. Yesus-mo yaqgo kabiy ka balaw tonsa anon emaqta haqaiq. ¹⁸ Ya kabiy araq yaqgo zawayib emta na agamukan araq a hi bilaqdaiq. Haiqgam. Krais ya gimalib kabiy emsa on mataw en ta asor Juda a haiqta nagan in yaqgo gamuk huritad teq in yaqgo daq ahol waqad in God anad muzinim Krais anan helmo haqayta naqm o amomo ya bilaqdaqta. ¹⁹ Teq Bugaw Dimunta daq azawayin inaqta amo amo ya ibenab emad in yaqgo kabiy zaway ugaqtamo. In nazaq emsa ya uliq Jerusalem-ub Krais awagamun dimunta na bilaqim teq ya le og saw bunmo luwad gamuk naqmo ya on mataw bunmo gibilenim gibilenim le saw ilirikum-ubmo tiqiy. ²⁰ Yaqgo inad ayahta usaqta na ya leheq uliq eden Krais abin a hi usaqta nabmo ya Yesus awagamun gibilendaiq haqaiqta. Na ezaqgo ya mat araq gituw tilayta na amalib bit wazan gituw hiqiya. ²¹ Ya God ago marib gamuk araq bilamta nazaqmo ya emnan inad bilaqaq. Gamuk na bilam, On mataw mat na awagamun asor a hi huritayta na in mat na ahol tuwaq daqay ham. Ad on mataw in abin asor a hi huritiyta na in ago tuhurit kem daqay ham. ²² Nazaq iyan yaqgo kabiy kabemmo na tuteqmo iwasihsa ya le ne a hi gibiyyaiqta. ²³ Teq muran ya kabiy emdaiqta abanab saw kab tihiqiy. Hiqiyan ya ulig kabemmo ne gibiygo inad emaiqta nazaqmo ya inad a ta emaiq. ²⁴ Inad emad ya kantri Spen-ib lehad ya le ne gibiyad teq Spen-ib tilehdaiq haqaiq. Ya le ne gibiyad osid teq ne ya ilumsihad giqemid ya inad dimniysa Spen-ib tilehdaiq haqaiq. ²⁵ Ta teq muran ya uliq Jerusalem-ub leheq God ago on mataw tawonta asor kam meqinta waqim osayta na tigilumsihnan. ²⁶ Na ezaqgo Yesus ago on mataw saw Masedoniya-ibta na teq saw Akaya-ibta na in an adugan wazim mani asor human tubuliy. Human wolim in God ago on mataw tawonta uliq Jerusalem-ub osay na gilikmanib asor nagah ago siqim iyayta na gilumsihgo haqad. ²⁷ Mataw na ginad diq bilaqsa mani na emiyta. Na ezaqgo Juda on mataw gigo amenin ayahmo in gigo hib usaqta. on mataw en ta asor Juda a haiqta nagan in Juda gigo hib giwitango nagah dimunta samanmo waqiyta.*Nazaq iyan on mataw na in gimo gigo nagah giholgota na amalib in Juda mataw Gina haiqta na tigilumsih daqay. ²⁸ Ari ya mani na ad Jerusalem-ub leheq mataw na gibenad emeq kabiy na tihiqiyid tea ya ihol buliyeq Spen-ib tilehad nab teq ya le ne tigibiydaiq. ²⁹ Ad ya inad emaiq, Ya ne gigo hib gwahtiqsaiqta nab Krais anad dimunta i gimalib tuwoq bugdaq haqaiq. ³⁰ Ari ya imaqbaban, I araqibmo i gigo Iyahta Yesus Krais anan helmo haqauqta. Sa Bugaw Dimunta i ginad wamuzsa i an anan ginad bilaqsa osauqta. Nazaq iyan ya inad awaz meqin amalib kazaq ne gibilenaiq. Ne ya ilumsihad yaqmen God buloniy haqaiq. ³¹ Bulonsa in Juda mataw in ago gamuk othasayta na gibenab ya giwaqid mataw na hi gimeqin toniy haqaiq. Ad ne bulonsa ya uliq Jerusalem-ub God ago on mataw tawonta Gina haiqta na gilumsihsad mani na ibersa in yaqgo kabiy na anan ginad bilaqanm haqaiq. ³² Nazaq iyid teq ya God anad muzinad luwad le ne gigo hib tugwahtiqeq ya nenaq ginad dimniysa osad ya igem hastitaysa zaway muturta ta waqdaiq haqaiq. ³³ Ari God I gigem eman midemimmo usaqta na in tuteqmo ne nenaq osan. Hel diqtaqmo.