¹ Ari kam ta araqab 3 kilok imisor Juda mataw God inaq gamuk emayta akamnib nab Pita ayow Jon inaq Tempel-ib tilehiy. ² Lehim in mat araq asen meqinta sorim a bolsa tigibiyiy. Mat na anen agemab nazaqmo hitimta. Kam bunta mataw mat na soreq a le Tempel agelin ago dan ez anan Awaq Dimun haqayta nab emid osyaqta. Ossa on mataw boleq gel na aduganib loqsa in mani nagah anan sunyaqta. ³ Ari Pita ayow Jon inaq le Tempel agelin aduganib lo gwahtiqnan haqsamo mat na mani anan tisun nag. ⁴ Sun negan Pita ayow Jon inaq gihol wasihim turad in mat na ahol waninunadmo Pita in tubulon, Ni nime kazaq boleq i giger gibiy ham. ⁵ Haqan mat asen meqinta na anad am, Mataw giger ka nagah tiyagnan haqad in ahol buliyim giger na tigibiy. ⁶ Gibiysa Pita bulon, Ya gimeq haiq ham. Teq nagah ya inaq naqmo ya tinignan ham. Yesu Krais Nasaret-ibta na abinib ya ni nibilenaiq ham. Ni eraqeq loq gel ham. ⁷ Haqad in mat na aben aqabnib wazim wazan tiqeram. Eraqim hid naqmo in asen aditin bunmo awaz timeqniy. ⁸ Awaz meqniyan in ahol loyinadmo in dedibmo eraqim turad tiloq gelyaq. Samo Pita ayow Jon inaq Tempel agelin aduganib lo gwahtiqsa mat na in sor t6iktukad teq in God abin wazan tiqeraqyaq. ⁹ Sa on mataw bunmo in mat na loqgelad God abin wazan eraqsa ahol waqad ginad tiqemiy. ¹⁰ Mat ko tutimmo Templ agelin ago dan ez anan Awaz Dimun haqayta nab osad gimeq nagah anan sunyaqta naqmo amatin haqiy. Haqad in mat asen meqinta na tidimniyan ahol waqad in gihol riten lamsa ginadnad tiqem yaqay. ¹¹ Ari mat na Tempel ago veranda anan Solomon ago veranda haqayta na in Pita ayow Jon inaq giwazim giqay netsa on mataw bunmo gihol turuh nemsa in gigerab sibim bolim humab tuwoliy. ¹² Humab wolim tursa Pita gibiyad kazaq gibilan, Ne Isrel-ib mataw ham, nagaqgo ne nagah ka ago ginadnad emad ne i giger gibiy ninunay? ham. Ne towa emay, I gigo zaway inaqta iyim i mat ka wastitay haqay-ya ham. Teq ne ginad emay, Igiger God ago mataw dimun diqta iyim i mat ka wastitayan in tiloq gelaq haqay-ya ham. Na haiqgam ham. ¹³ I gisesan Abraham, Aisak teq Jekop gigo God inmo daq kkawa ne ahol tuwaqay ka amalib in ago kabibiy mat Yesus abin wazan tiqeraqaq ham. Mat ne waqim bab gibenab emiyta naqmo ham. Pailat in mat na hulosid lehgo bilamta teq haiq ham. Ne mat na gileh ugad bilaqiy, In i gigo a haiq haqad ne bilaqiy ham. ¹⁴ Mat nawa na in God ago mat tawon diqta iyim in ago daq bunmo titnon taqmo ham. Ta ne in gileh ugad ne mat ta araq mataw ginol emaqta naqmo waqnan haqad Pailat bulonan in hulosan ne gigo hib lah ham. ¹⁵ Lehsa ne mat i giyon os kayeqmo kuluwa-kuiuwmo osayta wastitay igta na wol eman tumomta ham.Moqan God hodhodab wazanta eram ham .Eraqim kayeqmo ossa i giger gimab in aqhol tuwawta iyim iyan i agamukan bilaquqta ham . ¹⁶ I Yesus Nn helmo diq haqauqta ham . Nazaq iyan Yasus aholnan naqmo in mat ka asen eamn awaz tieqniy ham .Ne mat ka ahol waqad ne ni ago tuhrit kemayta ham .Teq i Yesus anan helmo yesus -mo ne bunmo gimeb mat ka ahol wastitayan tidimniy bug ham . ¹⁷ Ya imaqbaban ham. Ya inad emaiq,Ne ginad a hiq em hasadmo ne Yesus ago hib daq meqinta na emaiq haqaiq ham. Sa negigo mataw aseseqta in ginad a hi em hasiymo ham. ¹⁸ Kwaziqmo God in ago nantut giqezab bilam, yaqgo Krais teq santitiy sordaq haqad in bilam ham. Haqad teq in negigo daq meqinta na amalib in ago gamuk bilaqan usta na tuwol net bug ham. ¹⁹ Nazaq iyan ne gigo daq teq ginad meqinta na ne gileh ugad ginad buliyiy ham. Ad ne muleqeq God ago hib ta boliy ham. Id teq God ne gigo daq meqinta na giwalemad anadin a ta hi emdaq ham. ²⁰ Ad in kam dimunta negid ne Iyahta ago hib osad ne gigem hastitaysa gihol tisinamoldaq ham.Sa abeb in Yesus emid ne gigo hib tuboldaq ham.Gog in mat naqmo ne gisuhungo haqad atowun eman osaqta ham. ²¹ Mat na in muran Heven-ib tuqosaq ham.Kwaziqmo God ago nantut tawonta na bilaq yaqay, kam abetanta nab teq God in nagah bunmo giqemid mutur tiqiydaq haq yaqay ham. An muran Yesus kam na amen emim osaqta ham. Kam na bo gwahtiqsa teq in muleqeq taboldaq ham. ²² Kwaziqmo Moses bilam, Iyahta God teq ne gilikmanib ne gimaqbab araq emid gwahtiqeq in ago nantut ya nogmo iyeq osdaq haqad in bilam ham.Osad in gamuk gibilensa ne aqez huritiy haqad in bilam ham. ²³ Ad in bilam, on mataw in aqez a hi hurit daqayta na bunmo God in gimuzid gibin tihiqiydaq haqad in bilam ham. Gibin hiqiysa in God ago on mataw nenaq a ta hi os daqay haqad in bilam ham. ²⁴ Teq God ago nantut bunmo in gamuk naqanta bilaq toniymo ham . Samuel teq God ago nantut Samuel muzim gwahtiqiy ta na bunmo kam muturta ka anan bilaqiyta ham. ²⁵ Ari God nantut nagan gisesan negmo osayta ham. Ossa God kwahziqmo ne gisesan nenaq an amugan wazim nagah negnan gibilanta na muran negmo tuwaqayta ham. God Abraham inaq an adugan wazim bulon, Ni nises abeb teq gwahtiqdaqta na amalib ya on mataw en bunmo tigidimun tondaiq haqad in bilam ham. ²⁶ Nazaq iyan muran God ne gilikmanib ago kabibiy mat na eman gwahtiqim in danmeb ne gigo hib tubol ham. In anad mat na ne gidimun tonad ginad buliysa ne bunmo ginad buliyeq gigo daq meqinta gileh ug daqay haqad in mat na eman ne gigo hib bolta ham.