¹ Mat ayah Tiyofilus, ya wagam danmeb man toata nab Yesus in ago kabiy alulin tiqemim ago kabiy daq emad teq in ago. Suleq on mataw gibilenad luwsa le God in waqim ad heven-ib gwalahta na awagamun bunmo ya man ton nigta. ² Teq in a hi gwalehadmo in ago aposel inmo gilumim giwamta na gigo hib gwahtiqim in God ago Bugaw Dimunta ago zaway amalib mataw na kabiy negad gamuk awaz meqinta gibilan. ³ Yesus santity sorim moqin kayeq ta iyim teq in aposel gigo hib gwahtimta. Gwahtiqim in gimen daq azawayin inaqta kabemmo giqeman gwahtiqsa aposel ginad tiqemiy. Helmo Yesus hodhodab tiqeram haqiy. So kam 40 nazaq aduganib Yesus tuteqmo mataw na gimeb gwahtiqad in God ago maror agamuban gibilenyaq. ⁴ Ad in nenaq osad in atoranmo kazaq gibilan, ne uliq Jerusalem huloseq hi lehiy ham. Ne uliq kab osad nagah ya imam negnan hel diqmo bilamta na ne amen emad osiy ham. Kwaziqmo ya nagah na anan ne tigibilenta ta ham. ⁵ Ya bilay, Jon yuwibmo on mataw huz negyaqta hay ham. Ari babaeq misereq teq God in ago Bugaw Dimunta ne tinegdaiq hay ham. ⁶ An abeb Aposel bo Yesus ago hib humab wolim tisusumun ugiy, Iyahta haqiy, luweq muran kam kab ni Israel gigo maror woqim usaqta na wazta iraqid in gigo king inaq a ta iy daqay ya? haqiy. ⁷ Haqan Yesus gibilan, ya imam in mo ago zawayib daq bunmo gwahtiqdaqta na akamun tibilaqan usaqta ham. Nagah na ne gigo a haiq ta iyan ne kam na ago a hi hurit daqay ham. ⁸ Ta teq God ago bugaw dimuta ne giholib ayahmo tuboldaq ham.Bolid teq ne zaway waqeq nagah ne gimeb ahol waqiyta na teq ya iwagamun bunmo ne uliq Jerusalem-ub teq saw Samariya-ib uliq bunmo luwad nab ne yaqgo gamuk na on mataw gibilen daqaymo ham. Gibilenad teq ne saw giger na gihuloseq og saw bunmo lehad on mataw gibilensaq in tuhurit daqaymo ham. ⁹ Yesus gamuk na tibilaqim hiqiyan Aposel ahol waqad tursamo il tonan Aposel ahol a ta hi waqiy. ¹⁰ Ad in gime kaitab gwalehad tursamo mataw giger tubusan husta emiyta in gigerab gwahtiqim tituriy. ¹¹ Turad in bilaqiy, Galiliy-ib mataw haqiy nagaqgo ne turad kaitab gime gwalehaq? haqiy .Muran Godin mat anan Yesus haqayta ka ne gibenab walemim in waqim ad heven -ib tugwalah haqiy.Teq in heven -ib gwalehsa ne ahol waqiyta nazaqmo in muleqeq ta gewoqdaqta haqiy. ¹² Ari aposel garah anan Oliv haqayta na hulosim in muleqim Jerusalem-ub wo tulehiy. Garah Oliv na in Jerusalem agerab sinsinmo usaqta, kilomita amulikmo nazaq. ¹³ In garah na hulosim le uliq Jerusalem-ub gwahtiqim bit in os yaqayta nab tilehiy. Lehim in bit na adugan ulilib osayta nab gwahlehim tuqosiy. Mataw na ginan kazaq: Pita, Jon, Jems, Andru, Filip, Tomas, Bantolomyu, Matyu, teq Alfiyus atatin Jems teq Saimon mat Rom nenaq bab emyaqta amatin na teq Jems ta araq atatin Judas. ¹⁴ Mataw na bunmo teq on asor Yesus museq inaq leh yaqayta na teq Yesus anen Mariya teq Yesus amagnis inaqmobunmo in gigem amulikmo iyad tuteqmo in bit adugan nab humab woleq God inaq gamuk emad os yaqayta. ¹⁵ An kam araqab on mataw Yesus anan helmo haqad maqbab iyim osiyta 120 nazaq humab wolim ossa Pita in gilikmanib eraqim turad kazaq gibilan. ¹⁶ Ya iyogniz ham kwaziqmo God ago Bugaw Dimunta Devit aqezab gamuk araq eman gwahtiqsa in Judas-mo anan bilamta ham. An God ago gamuk bilamta nazaqmo Judas ago hib tugwahtim ham. Mat na a hi gwahtiqsa Bugaw Dimunta in anan tibilaqan usta ham. Ussa teq mat na gwahtiqim gamuk na muzinim in mataw dan giqisuhunim giqad lehan in Yesus waziyta ham. ¹⁷ Na ezaqgo in i giyow mat araq iyim in i inaq garabmo kabiy ka wamta ham. ¹⁸ (Teq Judas ago daq meqintab na anawun mani silva waqim a lehim in og araq tizay. Zayim in lehim og nab ban araq meqintab woqim agem mutiran in agembeteoq bunmo mutbalim gwahtim. ¹⁹ Ari abeb mataw Jerusalem-ub osiyta na bunmo in daq na ago huritim in gigo nanib in saw na anan Akeldama tihaqiy'' na in 'og anednaqta' haqad in og na anan nazaqbiyiy.''] ²⁰ Ari Pita bilam, Gamuk araq Buk Song-ib mar tonan usaqta na kazaq bilam ham. In ago bit samanmo usan haqad in bilam ham. Teq buk nab gamuk araq kazaq bilammo ham. Mat ta araq in ago ban waqeq kabiy eman haqad in bilam ham. ²¹ Nazaqiyan muran i mat araq Judas ago ban waqdaqta na tinagun ham.Nagunadin mat araq kazaqta waqam ham. Iyahta Yesus i gilile wunim giwaqim ginaq ieh bolad liwyaqta kam nab mat na in luw osta ham. ²² Teq Yesus Jon huz ugsa mat na in ahol wamta ham. Ad Yesus ago kaliy alulin emsa in ahol wamtamo ham. Teq God i gibenab Yesus waqim ad guralehsa in nab turtamo ham. Mat araq naqanta in daq nagan bunmo ahol wamta naqmo in ulum kemeq waquq ham. Id teq Yesus hodhodab eraqan in ameb ahol wamta na agamukan in i inaq garabmo tibilaqam ham. ²³ Pita nazaq bilaqan mataw nab osiyta na in mataw gigermo ginan tiqemiy.Araq na anan Josep haqayta. In anan giger barabas teq Jastus haqaytamo. Teq ta araq na anan Matiyas haqayta. ²⁴ In mataw giger na ginan emim teq in kazaq God buloniy. Iyahta haqiy, ni mataw bunmo gigo gigem tuhuritta haqiy. Ni mataw giger ka gilikmanib mat doqag diq ni wamta na ni i giqisihum haqiy. ²⁵ Giqisihunid teq mat na Judas ago ban waqeq in Aposel araq iyeq kabiy ka asor in tisordaqmo haqiy. Judas kabiy ka tuhulosim in moqim saw in osdaqta nabtilah. ²⁶ Haqad in God inaq gamuk nazaq bilaqim tihiqiyan in gig amikmikta giwaqim mataw giger na ginan mar tonim teq hunegiy. Hunegan Matiyas-mo anan tugwahtim. Gwahtiqan in Matiyas waqim Aposel 11 na nenaq tigiwastaniy.