¹ Taravatu gunana na mai ena toma-diho haheganidia bona mai ena dubu tanobada ai. ² Badina be guriguri kalagana helagana e karaia, murimuri daiutuna ai be lamepa iato-kauna gauna bona pata bona Dirava vairanai e atoa flaoana; una na gabu helagana e gwauraia. ³ Seseahu iharuana lalonai be Helaga Herea daiutuna ta e gwauraia hidi. ⁴ Ia lalonai pata helagana ta gold ai e karaia, muramura mai bonana patana bunai; bona taravatu mauana ta danu gold ai e havavaia hegege; bona maua lalonai be gold kibona auta, anina be mana; bona Arona ena itotohi, e gara kau gauna; bona taravatu nadidia danu una maua lalonai. ⁵ Maua daenai hairai kerubidia ese hebogahisi teronana e hakerukeruava. To unu gau harihari basia herevalai hagau hagau diba. ⁶ Unu gau be unu e seu toma; bena hahelaga taudia na murimuri daiutuna lalonai e raka vareai loulou, boubou gaudia e hahelagadia. ⁷ A laloma daiutuna be hahelaga tauna badana mo sibona lagani ta lalonai nega tamona e raka vareai, rara e vareailaia, e hahelagaia, ia sibona dainai, bona bese taudia edia kara kerere-kerere daidiai. ⁸ Ini amo Lauma Helaga ese e hadibadamu: Helaga Herea gabuna iraka-vareaina dalana do se hekeho, murimuri daiutuna dounu gini negana ai. ⁹ Una na hereva hegeregerena, ina nega ena. Herahia gaudia bona boubou gaudia vada e hahelagamu, gau tamona idia na asi siahudia toma-diho tauna lalona ihagoevana. ¹⁰ Badina be edia siahu badidia be ini mo; aniani gaudia, inuinu gaudia, digu karadia haida, tauanina taravatudia; e hagini, taunimanima ese bae badina ela bona hahematamata negana. ¹¹ A Keriso ema, vada evara gaudia edia hahelaga tauna badana. Bena guriguri kalagana bada-hereana bona namo-hereana amo e raka hanai, dia taunimanima imadiai e karaia gauna bona dia ina tanobada gauna. ¹² To dia nani bona boromakau, natudia raradia a ia sibona rarana e varealaia Helaga Herea gabunai hahemauri hanaihanai e havaraia. ¹³ Badina be nani raradia bona boromakau maruanedia raradia bona boromakau natudia lahi ese e gole oho kahudia amo na dika taudia bema gigidia tao, bena tauanidia bema goevagoeva; ¹⁴ o Keriso rarana, Noho-hanaihanai Laumana dainai sibona Dirava e henia tauna rarana, asi bebeka-bebekana tauna rarana, siahuna basinema herea a, umui lalomui mase karadia amo bema hagoeva, bona Mauri Diravana ena hesiai taudia ai bema halaomui ani? ¹⁵ Una dainai, ia na taravatu matamatana ena herohemaino tauna, taravatu gunana vada e tataia utu taudia na mase ta ai e hamauridiamu, bona e boiridia taudia na mia-hanaihanai ahudia e henidiamu, ena gwauhamata hegeregerena. ¹⁶ Badina be tau ta dihina ese ahudia basie abi ela bona una tau baine mase momokani. ¹⁷ Ena kohu iharidia herevadia na mai siahuna ena mase dainai, a ena mauri negana ai idia na asi siahudia. ¹⁸ Unuhetomana taravatu gunana danu rara ese e hamomokania. ¹⁹ Badina be Mose ena taravatu ena hahegani iboudiai na bese taudia iboudiai e herevalai henidiava, bena boromakau natudia raradia bona nani raradia bona ranu e abi, mamoe huina kakakakna bona husopo danu e abi bena buka bona bese taudia iboudiai e nevarilaidia, ²⁰ eto "Ina na Dirava ese vada e haganilaimui taravatuna rarana." ²¹ Unuhetomana danu ia ese guriguri kalagana bona helaga gaudia iboudiai rara ai nevarida. ²² Oibe; taravatu henuna gaudia momo herea rara ese ehagoevadiamu; bona rara basinema hebubu, dika igwau-taodia bema lasi. ²³ Benaini, guba gaudia ihahegeregeredia gaudia na ini helaga karadia amo e hagoeva, a guba gaudia korikori na boubou namodia amo bae hagoeva. ²⁴ Badina be Keriso vada e raka vareai dubuna na dia taunimanima imadia amo e karaia gauna dubu korikorina ihahegeregerena, a guba ai vada e raka vareai, Dirava vairanai e hedinaraimu ita daidai. ²⁵ Bona ia na se raka vareai sibona boubou gauna ai bainela loulou, hahelaga tauna badana na heto, ia ese lagani ta ta amo Helaga Herea gabuna lalonai e raka vareai, rara e vareailaia, to dia ia rarana. ²⁶ Unu bema heto, Keriso na nega diagau bema hisihisi, tanobada matamatana ema bona harihari. A ia be nega tamona, ina nega dokona ai, vada eme hedinarai, sibona boubou gauna ai vada ela dika iabi-ohona. ²⁷ Una dainai edia mase na tamona, murinai hahemaoro bae abia; ²⁸ unuhetomana Keriso danu nega tamona boubou gauna ai vada a halaoa, hutuma edia kara dika ihuadia. Ma baine hedinarai lou, dia kara dika ihamaoromaorona totona, a mai helarodia ida e nariamu taudia ihamauridia.