¹ Anima ya matangwa atatu, Esita wathzalele buthzalo bwendi bwa bu mwene waile na kukemana muchela cha thzango ya mwene, kulutwe ya njubo ya mwene. Cho mwene watumbamene achitumbamo chendi chabu mwene mu njubo yendi ya bu mwene, kukengetha ku chikoloo cha ku njubo. ² Omo mwene wamwene Esita mwene wa munakathzi nemana mu thzango ya milonga, cho watambwile bukwatho ku meshi endi. Cho wakwatele ku mande yendi ya ngolinde mu liboko lyendi. Cho Esita washwenene na nakukwata kushongo ya mande. ³ Cho mwene wendekele kuli ikeye ngwendi, "Bika ushaka Esita mwene wa munakathzi? Mbathzubwila ya nganda yange, bakayana kuli ypbe." ⁴ Cho Esita wendekele ngwendi, "Mona chibwaetha mwene ku mbunge, cho echeleni mwene na Hamani baije lelo ku chilika chije njinamubwaethela" ⁵ Chio mwene wendekele ngwendi, "Muneneni bwathi Hamani, akulinge ebi nendeka Esita." Cho mwene na Hamani baile ku chilika chije chabwaethele Esita. ⁶ Omo binyu bakile nakuipangethzela achilika, mwene wendekele ngwendi, "Bika ushaka? Bakakwana yobe. Bika ulomba? Kweta bu mbathzubwila ya nganda, ,bakayana." ⁷ Esita wakumbulwile ngwendi, "Kushaketha change na kulomba change chinapu echi, ⁸ "Umona njiwana bukwatho ku mesho a mwene cho umona chikabwaetha mwene nakunjana binji shaka na kulemetha binjalombo, cho echeleni mwene na Hamani beje ku chilika chije njikaba bwaethela imene cho njika kumbulula chihula cha mwene. ⁹ Hamani watundileko na kubwaelela alitangwa lije na kubwaha ku mbunge. Olonu omo Hamani wamwene Molindekai ku chikolo vha mwene, cho Molindekai kethekele kukatuka nameme kujaja ku mesho endi nameme lyoba limo, cho washulile na matoto a Molindekai. ¹⁰ Nameme ngocho, Hamani walithingimikile ikeye babenya na kuya ku njubo yendi babenya. Cho watumine bakwabo na kubakungulwila amolika, na munakathzi wa Zeleshi. ¹¹ Cho Hamani walumbunwine luthsimo lwa bufuko bwendi, natheteko ya kutuma cha bana babanalume, kujundula byoshe bije mwene wa mwanene, na muje wanangwile ali bakulunu boshe babipangi; na bingamba ba mwene. ¹² Hamani wendekele ngwendi, "Esita mwene wa munakathzi kathanene weka oloni yange na mwene kwija ku chilika cha bwaethele. Nameme imene lalo nanjithana amolika na mwene. ¹³ Oloni byoshe ebi kubyethi na chimo kuli yange mona ngwe njimona Molindekai ka Yundeya natumbama achikolo cha mwene" ¹⁴ Cho Zeleshi munakathzi wendi wendekele kuli Hamani nakuli bakwabo ngwendi "Bechele bapange kathandya kakushukikao munu kakupwa mu bimbandwa makumi atanu mukujunduka. Cho mutondotondo mukendeke kuli mwene mangana Molindekai bakamushukikeo. Cho yeni nakubwaelela amolika na mwene ku chilika" Echi chabwaethele Hamani ku mbunge cho wakatungile kathandya.