¹ Kapolofita Elisha wathanene umo wa bana ba tupolofita wamunalume na kwendeka kuli ikeye ngwendi, "Libwahethe uye bungethzi, cho ambata ou mutumwa wamathzi waundondo yue ku Lamoti Ngileyandi. ² Omu weta tonda Yehu muna Yehoshafati muna Nimishi, ukobelemo cho umukatule kutunda mukati ka bakwabo, nakumutwala mu chibatulo chamu kati. ³ Cho wambate ou mutumwa wamathzi nautwetila ha mutwe wendi nakwendeka ngwobe, "Yehoba nendeka ngechi: "Njinakubwabetha kupwa mwene wa Isalela." Cho shokolola chikolo, nakutewa; kethi wishwale." ⁴ Cho uje mukwenje, kapolofita wa mwanike, waile ku Lamoti Ngileyandi. ⁵ Omu etele, Kengeni, bakulunu babaka nthzita batumamene. Cho uje kapolofita wa mwanike wendekele ngwendi, 'Njinaija ha bungethzi bwa bwihi kuli yobe, mukulunu." Yehu wakumbulwile ngwendi, "Kuli umo uli muliyetu?" Uje Kapolofita wa mwanike wamukumbulwile ngwendi, "Kuli yobe, mukulunu." ⁶ Cho Yehu wakatukile nakukobela mu njubo, nauje Kapolofita wetilile mathzi ha mutwe wendi nakwendeka kuli Yehu ngwendi, "Yehoba, Njambi wa Isalela, nendeka ngechi, njinakubwabetha kupwa mwene hali banu ba Yehoba, hali Isalela. ⁷ Wapande kuthsiya nanga ya Ahabu shukwanyoko mangana njathe kumwilwithila maninga a bingamba bange tupolofita na maninga a bingamba boshe ba Yehoba aba bathsiyile kuliboko lya Yezembele. ⁸ Mwafwa nanga yoshe ya Ahabu ikanyonga, cho njikabatulako kuli Ahabu mwana woshe wamunalume, apwe ndungo nambe wakuthzituka. ⁹ Njikaungitha njubo ya Ahabu kupwa ngwe njubo ya Yelomboahamu muna Njembati cho ngwe njubo ya Mbasha muna Ahinja. ¹⁰ Tutali bakalya Yezembele mu Yezileo, cho kukukapu nambe umo wakumuthzinda."' Cho uje kapolofita washokolwele li[ito nakutewa. ¹¹ Cho Yehu watuhukile hanja kuli bingamba ba shukwaina, cho umo wendekele kuli ikeye ngwendi, "Bili bwino byuma byoshe? Bika byanethzilile ou mukwetu wakuthzaluka kuli yobe?" Yehu wabakumbulwile ngwendi, "Munu ou mumuthzibuka na byuma ebi akendeka mubithzibuka." ¹² Bendekele ngwabo, "Owo makuli. Tuleke." Yehu wakumbulwile ngwendi, "Nendekele ebi nabije kuli yange nakwendeka lalo ngwendi, 'Ebi bikebyo nendeka Yehoba ngwendi: Njinakubwabetha kupwa mwene hali Isalela.'" ¹³ Cho umo na umo bwathibwathi washulwile buthzalo bwahakamwa nakubwaka mwithi ya Yehu helu lya bindendelo. Bapembethzelele bi tolombita nakwendeka ngwabo, "Yehu mwene." ¹⁴ Mungila eyi Yehu muna Yehoshafati muna Nimishi wakwatele nthzita na Yolamu. Choni Yolamu wakele nakukinga Lamoti Ngileyandi, ikeye naba baka Isalela boshe, hamulonga wa Hazale mwene waba Alame, ¹⁵ oloni mwene Yolamu welukle ku Yezileeo na kumuthaka bimbandu ebi bamu bulumwine baka Alawe, omu alwile na Hazale mwene waba Alame. Yehu wendekele kuli bingamba ba Yolamu ngwendi, "Oshe echi chikecho kuthinganyeka chobe, cho kethi kukala umo wakutewa na kutunda mu nganda, hakulinga baye nakwambulula ou muthzimbu mu Yezileo." ¹⁶ Cho Yehu wendele mu likalu kuya ku Yezileo; Mwafwa Yolamu wakele kuje nakuhwima. Choni Ahaziya mwene wa Yunda wethzile nakumona Yolamu. ¹⁷ Mukakunyunga wemanene ha Kaposhi mu Yezileo, cho wamwene ije mbunga ya Yehu hathimbu bakele nakwija ha lyala; wendekele ngwendi, "Njinakumona mbunga ya banu ili nakwija." Yolamu wendekele ngwendi, "Ambateni muka kabalu, nakumutuma akaliwane nabo; mwihuleni ngweni, 'Muli nakwija mukwoloka ndi?"' ¹⁸ Cho munu bamutumine hanima ya kabalu nakuliwana nabo; wendekele ngwendi, "Mwene nendeka ngechi: 'Muli na kwija mukwoloka ndi?'" Cho Yehu wendekele ngwendi, "Ulinge bati na kwoloka? Tenguluka na kwendela kunima yange." Cho mukakunyunga walekele mwene ngwendi, "Uje kanganda naliwana nabo, oloni kethi na kwiluka." ¹⁹ Cho watumine munu wamuchibali hanima ya kabalu, ou ethzile kuli bakebo nakwendeka ngwendi, "Mwene nendeka ngechi: 'Muli nakwija mukwoloka ndi?" Yehu wakumbulwile ngwendi, "Mulinge nacho bika kwoloka? Tenguluka na kwendela kunima yange." ²⁰ Mukakunyunga wambulwile lalo, "Naliwana nabo, oloni kethi nakwiluka. Mwafwa mungila banakwendethelamo likalu ikeko ngila akendethelamo Yehu muna Nimushi; anakwendetha na bukenya." ²¹ Cho Yolamu wendekele ngwendi, "Bwahetheni likalu lyange." Cho ba bwahethele likalu lyendi , mukemo Yolamu mwene wa Isalela na Ahaziya mwene wa Yunda balondeleho nakuya, munu ha munu mu likalu lyendi, nakuliwana na Yehu. Bamuwanene ku bikwata bya Namboti ka Yezilite. ²² Omu Yolamu wamwene Yehu, wendekele ngwendi, "Uli nakwija mu kwoloka ndi, Yehu?" Wakumbulwile ngwendi, "Kwoloka muka kuliho, oho balinga bya buponya bya bukwithzi na bulothzi bya nyoko Yezembele binatumu?" ²³ Cho Yolamu watengulwile likalu lyendi nakutewa na kwendeka kuli Ahaziya ngwendi, "Kuli kutubandelela, Ahaziya." ²⁴ Cho Yehu wakokele buta bwendi na nthzili yakushuka nakwasha Yolamu mukati kabithzili byendi; mukili wapulyathanene mu mbunge yendi, cho wathziminine mwithi ya lukalu lyendi. ²⁵ Cho Yehu wendekele kuli Mbindika mukulunu wendi ngwendi, "Mwambateni nakumumbila mu lihya lya Namboti uje ka Yezilite. Ichithinganyekeni omu yobe nange twachovwele hamo kuli ishe Ahabu, Yehoba wakele obu bupolofita kutunda kuli ikeye: ²⁶ Ithzau njinamwene maninga a Namboti na maninga a bana bendi - mwa nendeka Yehoba -- cho buthunga bene njikunenetha kubifwetela kuno kulihya -- mwanendeka Yehoba. Choni, munoneni nakumumbila mulihya eli, kwetheka na lijwi lya Yehoba." ²⁷ Omu Ahaziya mwene wa Yunda wamwene echi, watewele ku kanduka mukwakwa wakuya kuMBeti Hangani. Oloni Yehu wamukabele, nakwendeka ngwendi, "Muthsiyileni naikeye mu likalu," cho bamwashelele kuje kukuthikumuka ku Ngale, echi chakala kuyehi na Imbileyamu. Ahaziya watewelele mu Mengindo nakuthsilako. ²⁸ Bingamba bendi bambatele mubila wendi mu likalu kuya ku Yelusalema nakumuthsinda mu mbumbo yendi hamo nabaishe mu nganda ya Ndabiti. ²⁹ Cho chakele mu mwaka wabu likumi naumo wa Yolamu muna Ahabu omu Ahaziya ashangumukile kuyula hali ba Yunda.