¹ Kaha Yehova ualekele Mosesa, ngueni, ² ''Halitangua lia katete lia ngonde yaku livanga ukatungisa tavenakulu, ya mbalaka ya ciuaneno, ³ Kaha ukahakamo cikasa ca vukaleho, kaha uka fuika kucikasa na ntanga yaku fuika. ⁴ Kaha uka kovelesamo mesa, naku viukisila limo viuma vilimo; kaha uka kovelesamo ndaya, naku suameka zindeya zioyo. ⁵ Kaha uka tumbika mutula ua olu uaku lumbika vihemba kulutue lua cikasa ca vukaleho, naku haka cifuiko ca lipito lia tavenakulu. ⁶ Kaha uka tumbika mutula uaku tsimika vikombelo kulutue lua lipito lia tavenakulu ya mbalaka ya ciuaneno. ⁷ Kaha uka lumbika mbasiya hakati ka mbalaka ya ciuaneno na mutula, kaha uka tilamo mema. ⁸ Kaha ukatunga citungu naku izingilika, naku zendzeleka cifuiko ca mbelo ya citungu. ⁹ Kaha uka none mazi aku vuavesa, naku vuavesa tavenakulu, na viose: kaha ikalela. ¹⁰ Kaha uka vuavesa mutula uaku tsimika vikombelo, na vitenga viauo viose, nakulelesa mutula: kaha mutula uka hiana kulela. ¹¹ Kaha uka vuavesa mbasiya namukono uayo, naku ilelesa. ¹² Kaha ukaneha Alone na vana veni kumbelo ya mbalaka ya ciuaneno, naku vatanesa na mema. ¹³ Kaha ukazimika Alone na vizalo viakulela nakumu vuavesa, nakumu lelesa, linga anjipangele ku cipanga ca vusasendote. ¹⁴ Kaha ukanehe vana veni nakuva zika natuzaku; ¹⁵ Kaha ukava vuavesa, ngue muze muva vuavesele Iseavo, linga vanjipangele ku cipanga ca vusasendote vua kumiaka yose ku mazimo avo ose. ¹⁶ Mukemuo mua lingile Mosesa: ngue ku viose. Yehova uamu sikile, mualingile. ¹⁷ Kaha cakele ngecize ku ngonde ya katete ku muaka uamu civali, kuli tangua lia katete Mosesa ua tungile tavenakulu. ¹⁸ Kaha Mosesa ua tungile tavenakulu, nakuhaka manunga ayo nakumesa mavaya ayo,naku kovelesamo mikambo yayo, naku mesa zingundzi ziayo. ¹⁹ Kaha ualele mbalaka naku haka cifuiko haze, ngue Yehova muamulekele ikeye. ²⁰ Kaha uanonene litavasiano nakuhaka mucikasa. Kaha naua uahakele zingundzi mu cikasa nakuhakako cifuiko. ²¹ Kaha ua nehele cakasa mu tavenekulu. Kaha ua zendzelekele ntanga manga isueke cikasa ca vukaleho, ngue Yehova muamu sikile. ²² Kaha ua hakele mesa mu mbalaka, ya ciuaeno kumutamba ua tavenakulu, uaku nolote hambandza ya ntanga ya kufuika. ²³ Kaha uahakele muka mucili ha mesa kumesa a Yehova, ngue Yehova muamu sikile ikeye. ²⁴ Kaha ua hakele ndeya ha mbalaka ya ciuaneno, kufuma hasinia lia mesa, kumutamba ua tavenakulu uaku sulu. ²⁵ Kaha ua suamekele zindeya kumesa a Yehova, ngue muamu sikile ikeye. ²⁶ Kaha ua tumbikile mutula ua olu mu mbalaka ya ciuaneno ku lutue lua ntanga ya kufuika: ²⁷ Kaha ua lumbililileho vihemba via kulembuluka; ngue Yehova mua sikile Mosesa. ²⁸ Kaha ua hakele cifuika ca mbelo ya tavenekulu. ²⁹ Kaha uatumbikle mutula ua cikombelo via kutsimika ku mbelo ya tavenakulu ya mbalaka, ya ciuaneno. aku kumbeleya cikombelo ca kustimika na cikombelo ca vunga, ngue Yehova muasikiel Mosesa. ³⁰ Kaha uatumbikile mbasiya hakati ka mbalaka ya ciuaneno na mutula, na kuhamo mema akutana. ³¹ Mosesa, Alone, na vana veni vava mala vatanene kumavoko na kuviliato viavo kufuma ha mbasiya ³² omu vakovelele mu mbalaka ya ciuaneno nomo va suenene kumutula. Valitanesele vavenene, ngue muasikile Yehova Mosesa. ³³ Mosesa ua tungile citungu nakuzingulula tavenakulu na mutula. Kaha uahakele cifuiko ca mbelo ya citungu. munjila nkana eyi Mosesa uamanesele vipangi. ³⁴ Kaha liselua lia fuikile mbalaka ya ciuaneno, na vumpahu vua Yehova vua sulisile tavenakulu. ³⁵ Mosesa kahasele kuingila mbalaka ya ciuaneno liselua lia tumameneho, vumpahu vua Yehova vua sulisile tavenakulu. ³⁶ Kaha omo liselua lia fumine ku tavenakulu, va Isaleli vendele vungendzi vuovo vuose. ³⁷ Vunoni ngue liselua kalia fumine ha tavenakulu menga vantu tsa kavendele. Menga vatumamene noho litagua lia fumineho. ³⁸ Muomu liselua lia Yehova liakele ha tavenakulu kumutana, kaha tuhia vakeleho kuvutsiki, kumeso ose a ndzivo ya isalel kuvungendzi vuavo vuose.