¹ Lizi lia muene kapolofeto Havakuke. ² "Yehova, zitsimbu zingahi njikatambeka nove, kaha kaukevua? Ange njalilile kuliove, 'Luozi!'vunoni kauovokele. ³ Vika uku njimuesela vupi, nakutala vupuye? muomu kuenieka na luoze vili kumeso ange; kaha kuakala kuli zunga nakulu kandula zimpata ca katuka. ⁴ Sikaho lusimbi luazeye, na vuoloke kavueku tuhuka; muomu muka vupi nazingilika muka vuviuke ngoco vuoloke vuatuha vua kuhenga. ⁵ Talenu hakati kava vifuti, kaha talenu, nakukomoka na cikomokelo ca kama; muomu njiku panga cipanga cimo kumatangua enu, citsa kamukatsiliela vutuhu vamilekaco. ⁶ Muomu, Talenu! Ange hanjikukatula Kalendeya, muyati uze uaku sasa ua lusi - vapulakana muvuihi vua mavu, mufuka vikalo vize kati viavo. ⁷ Vakeko va zuzuisa naku vuisa mundzundzu; kusompesa cavo navukama vuavo vina kutuhuka vavene. ⁸ Tuvalu vavo naua vahiana lusi kuhambakana va ingue, vuasi kuhambakana tungunga. vaku cinguezi nakuluua; nava katuvalu vavi vakutuala kulutue nakuli halesa: cili, vakatuvalu vavo vafuma kulaako; veku pupuluka ngue cihungu omu muekuzangula kululia. ⁹ Vakeko vose vaneza nakulinga luozi; vatalesa vihanga viavo kulutue; kaha vana kukunga vindzinda ngue musekeseke. ¹⁰ Cili, a tsopa vamiangana, nava vamiata vanapu kayengu kuli ikeye; a sendumuna vimpaka viose; muomu anakukungiya mpumputa, nakuvikuata. ¹¹ Kaha luhundzi lukuntuntilaho; nakuuana mulonga, uze nakumanesa ngolo njambi yeni.'' ¹² Kati ove uafuka kumiaka yaku nima, Yehova Njambi yove, uange uakulela? katu kutsa. Yehova una mutumbula kucihiso, kaha ove, Livue unamutumbika nakumuveta. ¹³ Yove muka meso akulela ngecize kau kuasa kutala vipi, kaha ku kuasa kutala vupuye, vikandzo unatelela vaze valinga navungunga, kaha unaholokela omu mukavupi akumina uze namuhiana vuviuke; ¹⁴ nakupuesa vantu ngue vatsi vamu kalunga, ngue vaze vekukalava, kavesi na muka kuva sika? ¹⁵ Akuva sampula vose navulovo vueni; nakuva kuata muvuanda vueni, nakuveva muvuanda vueni: ¹⁶ ngoco vene akuviukilila nakuzolela. Ngoco vene kombeleya kuvuanda vueni, kaha akulumba vimba ku vuanda vueni; muomu ha vukevuo mutamba ueni uahindala, na viakulia vieni viavingi. ¹⁷ Ngoco vene akazukula vuamu vuanda vueni ini akalikela cahi nakutsiha vakavifuti ntsimbu yose?