1 Kaha omo Lakele ua muene ngecize ikeye ka semenene Yakomba, Lakele ua liveyele ndumbueni. Ua handekele kuli Yakomba ngueni, ''Njihie vana ngue cahi njikutsa.'' 2 Kaha vutenu vua Yakomba vua suamenene Lakele. Ua handekele ngueni, '' Ange njili mu cihela ca Njambi, ni uze naku vindika vusaka vua lizimo?'' 3 Ua handekele ngueni, ''Tala, ngamba yange Mbeleha. Hamoye kuli ikeye, hamosi akasema vana kuma vuli ange, kaha Ange njikakala vana kufuma kuli ikeye.'' 4 Kaha uamuhiele ngamba yeni Mbeleha kukala mpueyeni, kaha Yakomba uaile kuli ikeye. 5 Mbelaha uemitile kaha ua semene Yakomba muana ua yala. 6 Kaha Lakele ua handekele ngueni, ''Njambi nanji sompela kaha nevu lizi liange nakunjihia muana ua yala.'' Ngoco vene uamu lukile lizina lia Ndane. 7 Kaha Mbeleha ngamba ya Lakele uemitile naua naku semena Yakomba muana uamucivali ua yala. 8 Lakele ngueni, ''Nakulihuisa cakama njina liuisa na mukuluntu uange kaha njiahiana.'' Uamu lukile lizina lieni Nafatali. 9 Kaha Lea omo mua muene ngecize ikeye nalikela kusema, ua tambuile Zilipa, ngamba yeni, nakumuhia Yakomba kukala mpueyeni. 10 Kaha Zilipa, ngamba ya Lea, ua semene Yakomba muana ua yala. 11 Lea ua handekele ngueni, ''Njavezika!'' Kaha ua mulukile lizina lieni Ngande. 12 Kaha Zilipa, ngamba ya Lea, uasemene Yakomba muana uamu civali ua yala. 13 Lea ua handekele ngeni, ''Ange nja zolela! muomu vana vava mpuevo vakanjisana nguavo mukaku vezika.'' Kaha uamu lukile lizina lieni Asele. 14 Kaha Luvene ua ile kumatangua akutia tiliku, ua uanene zindzilo mu musenge kaha uazinehele kuli naye Lea. Kaha Lakele ua handekele kuli Lea ngueni, ''Njehieko njakuvudila, ku zindzilo zia muanove.'' 15 Lea ua handekele kuli ikeye ngueni, ''Cikoke cuma cakama omo unanji punda yaliange ni? Una kutonda umbate zindzilo zia muanange naua?'' Lea ngueni, ''Ngoco vene akukosa nove vutsiki vualelo, mu kulinga ou akuhia mukuavo ou akuhia mukuavo muomu ua zindzilo zia muanove.'' 16 Yakomba muafumine mu musenge na cinguezi. Lea ua ile nakumusesa ua handekele ngueni,'' Uatela kuiza kuliange, muomu Ange njaku landa na zindilo zia muanange.'' Ngoco Yakomba uakosele neni vutsiki vuze. 17 Njamba ualakanene kuli Lea, kaha uemitile na kusema muana uamu citanu ua yala. 18 Lea ngueni, ''Njambi nanjihie fueto yange, muomu njahiele ngamba yange kuli yaliange.'' Kaha uamulukile lizana lieni Isakale. 19 Kaha Lea uemitile naua nakusema muana uamu citanu naumo ua yala kuli Yakomba. 20 Lea ngueni, ''Njambi na njihie vuana vuacili. Vunoni yaliange akutumama nange, muomu Ange njamusemena vana vatanu naumo.'' Uamu lukile lizina lieni Zembulone. 21 Hanima yaco uasemene muana ua mpuevo nakumuluka lizina lieni Ndina. 22 Njambi uasanene Lakele na kuhalakana kuli ikeye. naku sokolola kulizimo liene. 23 Kaha uemitile na kusema muana ua yala. Ua handekele ngueni, ''Njambi nanjifumisa ntsoni.'' 24 Uamu lukile lizina liene Yosefe, ngueni, ''Yehova nahakelako muana mukuavo kuliange.'' 25 Hanima Lakele yakusema Yosefe, Yakomba ua handekele kuli Lambane, ''Njitume kuange linga njiye, naku ciguti cange. 26 Njihie vampuevo vange nava vana vange vanji naku pangela, kaha njitave njiye, muomu ua ntantekeya vipangi viange vinjakuhie ove.'' 27 Lambane ua handekele kuli ikeye ngueni, ''Ngue njiauana kavumbi mumeso ove, vandamena, muomu njinamono ngecize Yehova nanji vezikisa muomu yove.'' 28 Kaha ngueni, ''Njisike fueto yove, kaha njika kuhiayo.'' 29 Ýukomba ua handekele kuli ikeye ngueni, ''Ua ntantekeya munjinaku pangela, kaha vati vimuna vove vakele nange. 30 Muomu uakele na cacindende tekanda Ange njiza, kaha cakama cikuma. Yehova naku vezikisa ove na viose vinjaku pangelele. Vuovuno naua litangua linjika pangela vaka ndzivo yange?'' 31 Kaha Lambane ua handekele ngueni. ''Vika Ange vinji kukufueta?'' Yakomba ngueni, ''Kaukunjihia amba cimo. Ngue ukunjilingila eci cuma, Ange njikulisa vimuna vove nakuva niunga. 32 Lelo njiku hitangana kuvu ntanga vuove vuose, naku fumisa vose va vuantsangua nauze kesi nava vamala vamala, navose va lava hakati kava mpanga, kaha nava va mampega na vuantsangua hakati kava mpembe. Ava vakala fueto yange. 33 Vuviuke vuange vuakala vukaleho vuange kanda. omo mukeze nakutala fueto yange. Uose kesi na vuantsangua na vama mpenge hakati va mpembe, nava valava hakati kava mpanga, ngue hali umu vamuuana nange kaha nguetu uakuiva.'' 34 Lambane ngueni, ''Njatava. Ecenu cikale kuesekesesa na lizi liove.'' 35 Kaha ua fumusile litangua olio vizamba va vampembe vakele na mavala mavala na vuantsangua navose valuhavo va mpembe vakele na vuantsangua nava vamavala mavala, vose vakele vitoma vuaku vuka, navose vaku lava hakati kava mpanga, kaha uava hiele kumavoko a vana veni. 36 Lambane naua uahakele matangua atatu avu ngendzi mukati ka Yakomba. Ngoco Yakomba uatualeleho nakulama matanga a Lambabe. 37 Kaha Yakomba uanonene milamu ya muti ua alamo, na mungongo, na kastanielu, kaha uoluele mavala akuvuka mu ikeyo, naku tuhula vuvuke vuze vuakele mumilamu. 38 Kaha uahakele milamu i a nolele sinia lizi lia matanga muvina mu mato amema muze muezile matanga nakunua. 39 Kaha matanga emitile ku lutue lua milamu, kaha matanga a semene va mavala mavala nava va vuantsangua nava va vitoma. 40 Kaha Yakomba ua tepesele vana vava mpanga ua talekesele matanga kuli vaze vamavala mavala navose vaku lava mu vuntanga vua Lambane. Kaha ua hanguniune matanga eni kua lika liavo kaha kava hakele kuvutanga vua Lambane. 41 Kaha cakele ngecize tsimbu yose omo vaze va hianene ngolo mu vutanga vemitile, kaha Yakomba ua hakele milamu ku meso a vutanga muvina, linga vemite hakati kamilamu. 42 Vunoni omo vutanga vua zeyele, kaihakele, ngoco vaze vazeyele vakevo va Lambane, nava zindzili vakevo va Yakomba. 43 Kaha yala uze ua likulisile cikumakuma. uakele na matanga akama na tumelu na vimulu.