¹ Kaha cakele ngecize hanima ya viuma evi Njambi uesekele Avilahama. Ua handekele kuli ikeye ngueni, ''Avilahama!'' Avilaham ua handekele ngueni, ''Yange uno.'' ² Kaha Njambi ua handekele ngueni, ''Mbata muanove, muanove liamunie, uze iua lema, Isake, kaha hamoye kucifuti ca Moliya. kaha uka mu kombeleya kuze ngue cikombelo ca kutsimika ku umosi ua mincinda uze u njikakuleka. ³ Kaha Avilahama uaha hindukile cimenemene, nakulemeka cimulu ceni, naua uambatele va kuendze vavali nakuya navo hamo nayikeyi, na Isake muaneni. kaha uatiavele vikuni via cikombelo caku tsimika, kaha ua katukile nakuya kucihela cize civamulekele kuli Njambi. ⁴ Hali tangua lia mucitatu Avilahama uanduile meso eni kaha amuene cihela halako. ⁵ Avilahama ua handekele kuli vaze kuendze veni ngueni, ''Kalenu hano na cimulu kaha Ange na kanike tukuya kuze. kaha tukazumbangeya nakuhilka naua kulienu.'' ⁶ Kaha Avilahama uanonene vikuni via cikombelo caku tsimika naku tuika Isake muaneni. kaha uatambuile mulivo lieni tuhia na mpoko; kaha vaile vose vavali hamolika. ⁷ Kaha Isake ua handekele kuli Avilahama Ise ngueni, ''Tata,'' kaha ikeye ngueni, ''Yange uno, muanange.'' Ua handekele ngueni, ''Tala, hano hali tuhia na vikuni, vunoni muana mpanga ua cikombelo caku tsimika uliye?'' ⁸ Kaha Avilahama ngueni, ''Njambi ivene akuviukisa muana mpanga ua cikombelo caku tsimika, muanange.'' Ngecize vaile vose vavali, hamolika. ⁹ Omu muvahetele ku cihela cize Njambi uamu lekele, Avilahama kutunga mutula kuze na naku tsikaho vikuni. Kaha nakukuta Isake muaneni, nakumu kosesa ha mutula ua vikuni. ¹⁰ Avilahama uoluele livoko lieni na mbata mpoko mangana atsihie muaneni. ¹¹ Kaha kangelo ka Yehova uamu tambekele kufuma muilu na ku handeka ngueni, ''Avilahama, Avilahama!'' kaha ua handekele ngeni, ''Yange uno.'' ¹² Ua handekele ngueni, ''Kati usaleke livoko liove hali kanike, cipue kulinga vimo viavipi hali ikeye cahi, Ngecize vuno njantantekeya ua muvuila Njambi vuoma, omu kaua njivianeneye muanove, muanove umolika.'' ¹³ Kaha Avilahama uanduile meso eni nakutala, kunima yeni kuakele cizamba ca kasitu umosi nalizenge kuzimbinga zieni muvusito. kaha Avilahama uaile nakukuata cizamba uze nakumu kombeleya ngue cikombelo caku tsimika muku tsila muaneni. ¹⁴ Kaha Avilahama ualukile lizina kuli cize cihela, ''Yehova Yeli, '' ngue muveku handeka nakalelo nguavo, Kumuncinda ua Yehova vaka cimona.'' ¹⁵ Kaha kangelo ka Yehova ua tambekele Avilahama mutsimbu yamu civali kufuma muilu ¹⁶ kaha ngueni eci cikeko kuhandeka ca Yehova - ivene Ange njalisingi muomu ualingi eci cuma, kaha kauanja vianeneye muanove, muanove umolika, ¹⁷ Ange mavusunga njika kuvezikisa ove naua njika lanesa mbuto yove ngue tuntangantanga va mumelu, kaha nua ngue musekeseke uli kungenge ya mema; kaha mbuto yeve ikafuka mbelo yavi tozi veni. ¹⁸ Kuhitila mu mbuto yove miyati yose yaha mavu ikavezika, muomu unononoka kulizi liange.'' ¹⁹ Ngoco Avilahama ua hilukile kuli vakuendze veni, kaha vakatukile nakuya hamo ku Mbeleseva, ²⁰ Kaha cakele ngecize hanima yevi Avilahama vamulekele nguavo, ''Tala Mileka ikeye naua, naseme, vana kuli munoko Nahole.'' ²¹ Vakele Uze muaneni ua ntuantua, Mbuze muanaye, Kemuele ise ya Alame, ²² Kesende, Hazo, Pelendase, Yindelafe, na mbetuele. ²³ Kaha mbetuele uasemene Lembeka. Ava vakele vatanu nava tatu vana Mileka ua semene kuli Nahole, muanaye ya Avilahama. ²⁴ Kaha kavuhale keni, lizina lieni Leuma ua semene naua Teva, Ngahame, Tahase, na Maka.