¹ Paulu, Siluano, na Timoteo ku cikunguluilo ca Tesolonika muli Njambi Tata yetu na Muagana Yesu Kilisitu. ² Kavumbi kulienu na ngozi kufuma kuli Njambi Tata yetu na Muangana Yesu Kilisitu. ³ Tuatela kuhana kutsantsela kuli Njambi cenu, vamuanetu, muomu ya lutsielielo luenu lunakukola cikumakuma, na cilemo mukati kenu hali umo namukuavo cisumpuoke. ⁴ Kaha etu vavene kuhandeka nakulipamba hali enu mu cikunguluilo ca Njambi hakusimpa cenu na lutsilielo muku yanda, namu tuyando tumuahitimo. ⁵ Eci cikeko cimueso ca vuololoke kusompesa, mangana vakamitande muacili mu vuangana via Njambi, vikevuo naua vimumuli nakuyandela. ⁶ Muomu mukeko, vuololoke vua Njambi nakuhiluisa kuyanda kuli vaze vami yandesele enu, ⁷ nakuli enu muna kuyanda netu, tsimbu Muangana uetu Yesu kilisitu akasolola kufuma muilu nava ngelo zieni va zindzili ⁸ mumu langi ua tuhia, kayandesa na kuzangamesa vaze kava ntantekeyele Njambi kaha naze kavononokelele muzimbu uaYesu Kilisitu. ⁹ Kukakala kuzangamesa na cihiso ca muono uahia miaka yose kufuma mukati ka Muangana na kufuma ku vumpau via zindzili zieni. ¹⁰ Akalinga eci tsimbu yali keza hali tangua lize liva kumu zumbangeya kuva ntu vakulela na kukomoka hali vaze vaku tailiela, muomu ua vukaleho vuetu kulienu mua vutsilielielele. ¹¹ Muomu yeci etu naua tua vundila nakutualelaho, nguetu Njambi yetu akakutande ove muacili kukusana cove na zindzili ziove akasulisa viose via cili na vipangi via lutsilielo. ¹² Tua vundila ecil mangana lizana lia muangana Yesu vali zumbangeye mulienu, kaha enu muli ikeye, nakuesekesa kuka vumbi ka Njambi yetu na Muangana uetu Yesu kilisitu.