¹ Aua akeo Mazina avana va Isaleli vezile mu Ingito na Yakomba, ou navaka ndzivo yeni ou naua navaka ndzivo yeni: ² Luvene, Simeone, Levi na Yunda, ³ Isakale, Zembulone, na Mbenjamini, ⁴ Ndane, Nafatali, Ngande na Asele. ⁵ Vantu vose vatuhukile kuzintungi zia Yakomba vakele makumi atanu na vali. Yosefe te ali laza mu Ingito. ⁶ Kaha Yosefe, vana vanaye vose, na mazimo ose atsile. ⁷ Kaha vana va Isaleli vetile naku semunuina, cikumakuma mukuva tanda, kaha vakele vaka zindzili; cifuti cose casulile nava keko. ⁸ Vuno kuakatkile muangana ua muha mu Ingito, ikeye kantantekeyele Yosefe. ⁹ Ua handekele na vantu veni ngueni, ''tala, vana va Isaleli vana tuhia kulana na muvukama . ¹⁰ Tuaya, tulinge navo muma ngana, ngue cahi vakutualelelaho kulana, kaha ngue ndzita imosi ikuheta, vakevo naua vakali pandakana navitozi vetu, nakulua netu, naku seza cifutu.'' ¹¹ Ngoco vene vava hakelele vaka kupangesa mukuva pakesa navi hundangana viavo. kaha vaka tungila Falao mbembo avisete: Pitome na Lamese. ¹² Vunoni omo vaku hiana kuva yandesa vakeko, vakeko va hianene kuli lanesa nakuli kamesa. Kaha mitima yavo yalavele na vana va Isaleli. ¹³ Kaha vaka Ingito vapangesele vana va Isaleli via vikalu. ¹⁴ Kaha vasasele miono yavo navi pangi via vikalu kundaka na matafuali, nakuvi pangi vakuavo viakuli sezaseza mu mehia. Viose vava pangeselevio na vukalu. ¹⁵ Kaha muanguana ua Ingito ua handekele na vifunguizi via vaHevelu; lizina lia umo Silifa, kaha mukuavo ikeye Pua. ¹⁶ Ua handekele ngueni, ''Ngue ukukuasa mpuevo kaHevelu ha kusema, ukatale muacili ha tsimbu yakusema. Ngue muana ua yala, kaha uatela kumutsiha; vunoni ngue muana ua mpuevo, kaha atela kuyoya.'' ¹⁷ Vunoni vifunguizi vavuile Njambi vuoma kaha kavalingile ngue muavalekele muangana ua Ingito kulinga; mangana vece vana vava mala vayoye. ¹⁸ Kaha muangana ua Ingito uasanene vifunguizi na kuhandeka kuli vakeko ngueni, '' Muomu vika viua pangela eci, nakuseza vana va vamaka na muono?'' ¹⁹ Kaha vifunguizi va kuniene Falao nguavo, ''Va mpuevo vaHevelu kava lifuile ngue va mpuevo va Ingito. Muomu va takama kaha vana sulumuna kusema te kanda vifunguizi kanda vaheta kuli vakevo.'' ²⁰ Njambi ua niungile ava vifunguize. Kaha vantu vali lanesele muku tanda kaha vakele na ndzili. ²¹ Muomu vifunguizi va vuile Njambi vuoma, uava hiele vantanga. ²² Falao uasikile vantu veni vose, ''Uatela kumbila vana vamala vaze vana semukila mundonga, vunoni muana ua mpuevo ouse akakale na muono.''