¹ مِنْ بُولُسْ، عَبْدْ اللهْ وِرَسُولْ يَسُوعْ الْمَسِيحْ فِي طَرِيجْ إِيْمَانْ مينْ اخْتارْهُمْ اللهْ، وِمَعْرِفِتْهُمْ لِلْحَجْ الْمُوافِجْ لِلْتَجْوَى، ² فِي رَجَاءْ الْحَيَاةْ الأَبَدِيَّةْ، إللِّي وَعَدْ بِيهَا اللهْ إللِّي مَا بِيِكْدِبْ، مِنْ جَبْلْ زَمَانْ الأَزَلْ، ³ وِبَعْدَاً بَيَّنْ كِلْمِتَهْ فِي وَكْتَهَا الْمُعَيَّنْ، بِالبِشَارَةْ إللِّي إتْحَطَّتْ أَمَانَةْ بِيَدَيَّ بِتَكْلِيفْ مِنْ مُخَلِّصْنَا اللهْ . ⁴ وِلْتِيطُسْ، وَلَدِي الْحَجِيجِي بِالْنِسْبَةْ لِلْإِيْمَانْ الْمُشْتَرَكْ بِيْنَاتْنَا. وِإتْكُونْ لِيكْ نِعْمَةْ وِسَلامْ مِن اللهْ الآبْ، وِالْمَسِيحْ يَسُوعْ مُخَلِّصْنَا! ⁵ سِبْتَكْ فِي جَزِيرِةْ كِرِيتْ عَلَشَانْ إِتْكَمِّلْ تَرْتِيبْ الأَمُورْ الْبَاجِيَةْ، وِإِتْجِيمْ شِيُوخْ فِي كِلْ بَلَدْ، زَيْ مَا أَمَرْتَكْ. ⁶ عَلَى إنُّهْ يِكُونْ الْوَاحِدْ مِنْهُمْ مِشْ مُتَّهَمْ بِأَيْ تُهْمَةْ، زُوجْ لِمَرَةْ وَاحْدَةْ، وِأَبْ لِأَولادْ مُؤمِنِينْ مِشْ مُتَّهَمِينْ بِالْخَلاعَةْ وِالْتَمَرُّدْ. ⁷ وِدايتي عَلَشَانْ الْرَاعِي لازِمْ أَنْ يِكُونْ بَرِيءْ مِنْ أَيْ تُهْمَةْ عَلَشَانْ هُوَّ وَكِيلْ لِلَّهْ مِشْ مُعْجَبْ بِنَفْسَهْ وِلا طَبْعُهْ وَاعِرْ، وِمِشْ سِكِّيرْ، وِمِشْ شَرِسْ، وِمِشْ بِدَوَّرْ عَلَى الْمَكْسَبْ الْرَّدِي. ⁸ لَكِنْ بِضَيِّفْ الْنَاسْ، وِيِحِبْ الْصَّلاحْ، عَاجِلْ، بَارْ، تَجِي، يِتْحَكَّمْ بِنَفْسَهْ، ⁹ مِدَاوِمْ عَلَى جِرَايِةْ كِلْمِةْ اللهْ الْمُوَافَجَةْ لِلْتَعْلِيمْ، عَلَشَانْ يِكُونْ جَادِرْ عَلَى تَشْجِيعْ الْمُؤمِنِينْ بِالْتَّعْلِيمْ الْمَظْبُوطْ وِعَلَى تَسْكِيتْ الْمِعَارْضِينْ. ويِوَبِّخْ إللِّي مِشْ بِيَعْمِلْ الْصَّالِحْ. ¹⁰ عَلَشَانْ فِي إِكْتَارْ مِنْ مِعَلِّمِينْ الْبُطُلْ الْمِتْمَرِّدِينْ وِيِخْدَعُو عِجُولْ الْنَاسْ، وِبِالأَخَصْ إللِّي بِآمْنُو بِالْخِتَانْ. ¹¹ وِدُولْ لازِمْ يِتْسَدْ خَشْمَهُمْ. عَلَشَانْ دُولْ بِخَرِّبُو بِيُوتْ بِأَكْمَلِهَا، عَلَشَانْ دُولْ بِعَلِّمُو تَعْلِيمْ غَلَطْ فِي سَبِيلْ مَكْسَبْ رَدِي. ¹² وِجَالْ وَاحِدْ مِنِّيهُمْ، وِهُوَّ كَانْ عَنْديهُمْ زَيْ نَبِي مَخْصُوصْ لِيهُمْ: "أَهْلْ كِرِيتْ دَايْمَاً كَدَّابِينْ، ووُحُوش مِفْتِرْسَةْ، وِكَسَالَةْ". ¹³ وِدَايْتِي شِهَادَةْ حَجْ. عَلَشَانْ إِكْدِهْ إِتْكُونْ جَوِي فِي تَوْبِيخْهُمْ، عَلَشَانْ يِكُونُو فِي إِيْمَانْ مَظْبُوطْ، ¹⁴ مَا يِحَوِّلُو عِجُولْهُمْ لِخُرَافَاتْ يَهُودِيَّةْ وِتَعَالِيمْ نَاسْ بِعْدُو جَوِي عَنْ الْحَجْ. ¹⁵ عِنْدْ الْطَّاهِرِينْ كِلْ شَيْ طَاهِرْ. وَلَكِنْ عِنْدْ الْنَّاجْسِينْ وِغَيْرْ الْمُؤمِنِينْ كِلْ شَيْ مِشْ طَاهِرْ، وِعِجُولْهُمْ وِضَمَايِرْهُمْ كَمَانْ صَارِتْ نِجْسَةْ. ¹⁶ وِهُمَّ شَاهْدِينْ وِمِعْتِرْفِينْ بإنِّهُمْ يَعْرِفُو اللهْ، لَكِنْ بِأَعْمَالْهِمْ يِنْكِرُوُهْ، عَلَشَانْ هُمَّ مَكْرُوهُونْ وِغَيْرْ طَايِعِينْ، وِإتْبَيَّنْ إنِّهُمْ غَيْرْ مِسْتَحِجِّينْ يَعْمِلُو أَيْ عَمَلْ مَلِيحْ.