الأَصْحَاحْ 1
1
مِنْ بُولُسْ وِتِيمُوثاَوُسْ، عَبِيدِي الْمَسِيحْ يَسُوعْ، لِجَمِيعْ الْجِدِّيسِينْ فِي الْمَسِيحْ يَسُوعْ، إِللِّي عَايْشِينْ فِي مَدِينِةْ فِيلِبِّي، بِمِينْ فِيهُمْ مِنْ رُعَاةْ وِمِدَبِّرِينْ.
2
وِتْكُونْ لِيكُمْ الْنَّعْمَةْ وِالْسَّلامْ مِنْ اللهْ أَبُونَا وِالْرَّبْ يَسُوعْ الْمَسِيحْ.
3
آنِي أَشْكُرْ إِلَهِي كِلْ مَا أَفْتَكَرْتْكُمْ،
4
آنِي أَتْضَرَّعْ بِفَرَحْ عَلَشَانْكُمْ كُلُّكُمْ كِلْ وَكْتْ فِي جَمِيعْ صَلَوَاتِي،
5
عَلَشَانْ أَنْتُمْ مِسَاهْمِينْ فِي نَشْرْ الإِنْجِيلْ مِنْ أَوَّلْ يُومْ لِلْلآنْ.
6
وِلِيَّ ثِجَةْ فِي الأَمْرْ دَايْتِي بِالْذَّاتْ: إِللِّي بَدَا فِيكُمْ عَمَلْ صَالِحْ هَيِكَمِّلَهْ لِيُومْ الْمَسِيحْ يَسُوعْ.
7
حَتَّى أَنَّ مِنْ الْحَجْ أَنْ يِكُونْ لِيَّ الْشُّعُورْ دَايْتِي تِجَاهْكُمْ كُلُّكُمْ، عَلَشَانْ آنِي شَايِلْكُمْ فِي جَلْبِي، عَلَشَانْ كِلَّاتْكُمْ شُرَكَائِي بِالْنَّعْمَةْ، لَوْكُنْتْ آنِي مِجَيَّدْ أَوْ فِي الْدِّفَاعْ الإِنْجِيلْ وِتَثْبِيتَهْ.
8
عَلَشَانْ اللهْ شَاهِدْ لِيَّ كِيْفْ أَحِنْ لِيكُمْ كِلَّاتْكُمْ فِي عَوَاطِفْ الْمَسِيحْ يَسُوعْ.
9
وِصَلاتِي لأَجْلِكُمْ هِيَّ دَايْتِي: أَنْ انْتُمْ إتْزِيدْ مَحَبِّتْكُمْ أَكْتَرْ وِأَكْتَرْ فِي تَمَامْ الْمَعْرِفَةْ وِالإِدْرَاكْ،
10
عَلَشَانْ تِسْتَحْسِنُو الأَمُورْ الْمَلِيحَةْ، عَلَشَانْ إتْكُونُو طَاهْرِينْ وِخَالِينْ مِنْ الْعَتَرَاتْ لِيُومْ الْمَسِيحْ،
11
كَامْلِينْ فِي ثِمَارْ الْبِرّْ إِللِّي جَايْ بِيَسُوعْ الْمَسِيحْ، لِمَجْدْ اللهْ وِحَمْدِهْ.
12
وِكَمَانْ آنِي عَايِزْ أَنْ تَعْرِفُو، أَيُّهَا الإِخْوَةْ، أَنَّ أَحْوَالِي سَبَّبَتْ بِالْوَاجِعْ لِلإِنْتِشَارْ الإِنْجِيلْ بِنَجَاحْ،
13
حَتَّى أَنَّهْ صَارْ مَعْرُوفْ عِنْدْ الْحَرَسْ الإِمْبرَاطُورِي كِلَّهْ وِعَنْدْ الْبَاجِينْ جَمِيعَاً أَنَّ جِيُودِي هِيَّ لأَجْلْ الْمَسِيحْ. ,
14
وِزَيْ مَا كَتِيرْ مِنْ الإِخْوَةْ ، صَارُو وَاثْجِينْ بِالْرَّبْ بِسَبَبْ جِيُودِي، عَنْدِيهِمْ جُرْأَةْ لِلْتَّبْشِيْر بِكِلْمَةْ اللهْ مِنْ غيْرْ خُوْفْ.
15
حَجِيجِي أَنَّ بَعْضِيهُمْ بِبَشِّرُو بِالْمَسِيحْ عَنْ حَسَدْ وَنِزَاعْ، وَلَكِنْ الآخَرُونْ عَنْ نِيَّةْ صَافْيَةْ.
16
وِدُولْ بِتْحَرِّكْهُمْ الْمَحَبَّةْ، عَارْفِينْ أَنِّي إِتْعَيَّنْتْ عَلَشَانْ أَدْافِعْ عَنْ الإِنْجِيلْ،
17
وِالْتَّانْيِينْ دُولْ يِحَرِّكْهُمْ الْتَّحَزُّبْ، وَيِنَادُو بِالْمَسِيحْ مِنْ غِيْرْ إِخْلاصْ، وِهُمَّ بِظِنُّو أَنَّهُمْ بِضَيْجُونِي أَكْتَرْعَلَى الْجِيُودْ إِللِّي آنِي فِيهَا.
18
طَبْ وِبَعْدَاً؟ مَهْمَا يِكُونْ، وِعَلَى أَيِّ حَالْ، الْمَسِيحْ يِتْبَشَّرْ بِيهْ مَهْمَا كَانْ بِالْتَّظَاهُرْ أَوْ بِالْحَجْ. وِبِدَايْتِي آنِي هَافْرَحْ وِهَافْرَحْ كَمَانْ!
19
وِآنِي عَارِفْ أََنَّ الْمَوْضُوعْ دَايْتِي هَيِوَدِّنَا لِلْخَلاصْ، بِفَضْلْ صَلاتْكُمْ وِبِمَعُونَةْ رُوحْ يَسُوعْ الْمَسِيحْ.
20
وِزَيْ مَا أَتْوَجَّعُهْ وِاتْرَجَّاهْ: آنِي مِشْ هَافْشَلْ فِي شَيْ، لَكِنْ بِكِلْ جِرْأَةْ وِزَيْ كِلْ وَكْتْ دِلْوَكِيتِي كَمَانْ، يِتْعَظَّمْ الْمَسِيحْ فِي جَسَدِي، بِالْحَيَاةْ أََوْ بِالْمُوتْ.
21
فَالْحَيَاةْ عِنْدِي هِيَّ الْمَسِيحْ، وِالْمُوْتْ دَا رِبْحْ لِيَّ.
22
وَلَكِنْ، إِنْ كُنْتْ هَأَعِيشْ جُوَّةْ الْجَّسَدْ، فَحَيَاتِي هَاتِجْعَلْ لِيَّ ثَمَرْ كَتِيرْ. وِآنِي مِشْ عَارِفْ أَخْتَارْ مِينْ!
23
وِآنِي وَاجِعْ تحْتْ ضَغْطْ مِنْ إتْنِيْنْ: وِآنِي رَايِدْ الْرَّحِيلْ وِأَكُونْ مَعْ الْمَسِيحْ، وِدَايْتِي أَفْضَلْ بِكَتِيرْ جِدَّاً،
24
وَلَكِنْ إِنِّي أَبْجَى فِي الْجَسَدْ وِدَهْ ضَرُورِي جَوِي مِنْ أَجْلِيْكُمْ .
25
وِمَادَامْ آنِي وَاثِجْ فِي دَايْتِي، عَارِفْ إِنَّي آنِي هَأَبْجَى وِأَعِيشْ مَعَاكُمْ كُلُّكُمْ، عَلَشَانْ تِتْجَدَّمُو فِي الإِيمَانْ وتِفْرَحُو فِيهْ،
26
عَلَشَانْ يِزِيدْ بِسَبَبِي إِفْتِخارِكُمْ بِالْمَسِيحْ لَمَّا آجِي بَيْنَاتْكُمْ مِنْ تَانِي.
27
لَكِنْ عِيشُو عِيشَةْ تِلِيجْ بإِنْجِيلْ الْمَسِيحْ، عَلَشَانْ لَوْ جِيتْ وِشُفْتُكُمْ أَوْ بَجِيْتْ غَايِبْ عَنِّيكُمْ، أَسْمَعْ أَخْبَارْكُمْ وِاعْرِفْ أَنَّ أَنْتُمْ ثَابْتِينْ فِي رُوحْ وَاحِدْ، وِبِنَفْسْ وَاحْدَةْ إتْجَاهْدُو مَعْ بَعْضِيكُمْ لِأَجْلْ الإِيْمَانْ الْظَّاهِرْ فِي الإِنْجِيلْ،
28
وِمَا إِتْخَافُو مِنْ شَيْ مِنْ إللِّي بِجَاوْمُوكُمْ، عَلَشَانْ فِي مِجَاوْمِتْهُمْ شِهَادَةْ عَلَى هَلاكْهُمْ وِشِهَادَةْ عَلَى خَلاصْكُمْ أَنْتُمْ، وِدَايْتِي مِنْ عَنْدْ اللهْ.
29
وِإِتْوَهَبْ لِيكُمْ، عَلَشَانْ الْمَسِيحْ، مِشْ بَسْ إِتْآمْنُو بِيهْ، لَكِنْ تِتأَلَّمُو كَمَانْ عَشَانُهْ،
30
مِجَاهْدِينْ الْجِهَادْ دَايْتِي إِللِّي شِفْتُوهْ فِيَّ وِإللِّي سَامْعِينَهْ دِلْوَكِيتِي أَنَّهْ فِيَّ.