1 وِبَعْدْ إِكْدِهْ طِلِعْ يَسُوعْ لِمَدِينَة أُوْرُشَلِيمْ فِي وَاحِدْ مِنْ الأَعْيَادْ اليَهُودِيَّةِْ، 2 وِكَانْ هُنُكَّةْ بِرْكَةْ مَايْ جُرْبْ بَابْ الْغَنَمْ إِسْمُهَا بِالْلُّغَةْ الْعِبْرِيَّةْ بَيْتْ حِسْدَا، وِحَوَلِينْهَا خَمْسْ طُرْجَاتْ مَسْجُوفَةْ. 3 يُرْجُدْ فِيهَا مَرْضَى كَتِيرْ مِنْ الْعُمِي وِالْعُرْجِ وِالْمَشْلُولِينْ، يِسْتَنُّو أَحَدْ يِحَرِّكْ الْمَايْ، 4 وِكَانْ مَلاكْ يِجِي يِنْزِلْ بَيْنْ كُلْ وَكْتْ وَالْتَّانِي وَيِحَرِّكْ الْمَايْ، وِكَانْ أَوَّلْ وَاحِدْ يِنْزِلْ الْبِرْكَةْ بَعَدْ تَحْرِيكْ الْمَايْ يِنْشِفِي، مِنْ كُلْ مَرَضْ كَانْ فِيهْ. 5 وِكَانْ إهْنُكَّ رَاجِلْ عَيَّانْ مِنْ تَمَانِيَةْ وَتَلاتِينْ سَنَةْ، 6 وِشَافَهْ يَسُوعْ مَرْمِي عَلَى الأَرْضْ، وَعَلِمَ يَسُوعْ أَنَّ كَانْ عَيَّانْ مِنْ وَكْتْ طَوِيلْ، وِجَالْ لَهْ يَسُوعْ: "أَنْتَ عَاوِزْ إتْخِفْ؟" 7 وِجَاوَبْهُ الْعَيَّانْ: "يَا سِيدِي، مَافِيشْ حَدْ يِنَزِّلْنِي الْبِْركَةْ بَعَدْ مَا الْمَايْ تِتْحَرَّكْ. وِآنِي لَمَّا بَاجِي أَحَاوِلْ أَنْزِلْ، يِنْزِلْ وَاحِدْ تَانِي جِدَّامِي". 8 وِجَالْ لَهْ يَسُوعْ: "جُومْ وَشِيلْ فَرْشِتَكْ وَامْشِي". 9 وَفِي الْحَالْ الْمَرِيضْ شِفِى وَشَالْ فَرْشِتَهْ وَمَشِى. وِكَانْ دَايْتِي فِي يُومْ سَبْتْ. 10 فَجَالْ الْيَهُودْ لِلْرَاجِلْ إِللِّي شِفِي: "الْيُومْ سَبْتْ. دَا حَرَامْ عَلِيْكْ إِتْشِيلْ فَرْشِتَكْ الْيُومْ!". 11 فَجَالْ لَهُمْ "إللِّي شَفَانِي هُوَّ إللِّي جَالْ لِي: "شِيلْ فَرْشِتَكْ وَامْشِي". 12 سَأَلُوهْ: "مٍينْ الْرَّاجِلْ إللِّي جَالَّكْ شِيلْ فَرْشَِتَكْ وِامْشِي؟". 13 لَكِنْ الْرَّاجِلْ إللِّي شِفِى مَا كَانْ يَعْرِفْ مِينْ إللِّي شَفَاهْ، لأَنْ يَسُوعْ بَعَّدْ، عَلَشَانْ كَانْ فِي الْمَكَانْ جَمَعْ كِتِيرْ. 14 وَبَعْدْ إِكْدِهْ لَجَى يَسُوعْ الْرَّاجِلْ إللِّي شِفِى فِي الْهِيْكَلْ، فَجَالْ لَهْ: "أَنْتَ شِفِيتْ مَا تِرْجَعْ تَعْمِلْ خَطِيَّةْ عَلَشَانْ مَا يِصِيْبَكْ خَطِيَّةْ أَدَلْ" 15 وِلَمَّا عِرِفْ الْرَّاجِلْ أَنَّ يَسُوعُ هُوَّ إللِّي شَفَاهْ، جِرِي وِجَالَ لِلْيَهُودْ، أَنَّ يَسُوعْ هُوَّ إللِّي شَفَاهْ. 16 وِبَدَا الْيَهُودْ يِدَايْجُو يَسُوعْ عَلَشَانْ كَانْ بِيَعْمِلْ الأَعْمَالْ دَايْتِي يُومْ الْسَّبْتْ. 17 وَلَكِنْ يَسُوعْ جَالَ لَهُمْ: "أَبُويِّ لِسَّةْ يَشْتَغِلْ لِلآنْ، وِآنِي كَمَانْ أَشْتَغِلْ" 18 عَلَشَانْ إكْدِهْ الْيَهُودْ زَادُو تَصْمِيمْ عَلَى جَتْلَهْ، مِشْ بَسْ عَلَشَانْ خَالَفْ جَانُونْ الْسَّبْتْ، عَلَشَانْ كَمَانْ جَالْ أَنَّ اللهْ أَبُوهْ، وِسَاوَى نَفْسُهْ بِاللهْ. 19 فَجَالْ لَهُمْ يَسُوعْ: "الْحَجْ الْحَجْ أَجُولْ لُكُمْ إِنَّ الإِبنْ لا يَِجْدِرْ يَعْمِلْ شَيْ مِنْ نَفْسَهْ، لَكِنْ يَعْمِلْ إِللِّي يِشُوفْ الآبْ يَعْمِلَهْ، وَكُلْ مَا يَعْمَلَهْ الآبْ يَعْمِلَهْ الإبنْ كَمَانْ، 20 عَلَشانْ اللآبْ بِحِبْ الإِبْنْ، وَيِوَرِّيهْ كِلْ مَا يَعْمِلَهْ، وَهَيِوَرِّيهْ كَمَانْ إِمُورْ أَعْظَمْ مِنْ الْعَمَلْ دَايْتِي، فَتْعَجَّبُو. 21 وَكَيفْ بِجِيمْ الآبْ الْمَوتَى وَيِحْيِيهِمْ، إِكْدِهْ الإِبنْ كَمَانْ يِجَوِّمْ مِينْ يِرِيدْ. 22 وَالآبْ مَا يِحَاكِمْ حَدَاً، لَكِنَّهْ أَعْطَى الابْنْ سُلْطَةْ الْجَضَى كِلَّآتْهَا، 23 عَلَشَانْ يِجَدِّرْ الْكِلْ الإِبنْ كِيفْ مَا يِجَدِّرُو الآبْ. وَمَنْ مَا يِجَدِّرْ الإِبْنْ مَا يِجَدِّرْ الآبْ إِللِّي بَعْتَاهْ. 24 الْحَجْ الْحَجْ أَجُولُ لُكُمْ: "كِلْ مَنْ يِسْمَعْ كَلامِي وَيِآمِنْ بِاللِّي بَعتْنِي، إتْكُونْ لِيهْ الْحَيَاةْ الأَبَدِيَّةْ، وَلا يِكُونْ تَحْتْ حُكمْ الْديَنونَة فِي الْيُومْ الأَخِيرْ، لأنَّهْ إِتْنَجَّلْ مِنْ الْمَوْتْ لِلْحَيَاةْ. 25 الْحَجْ الْحَجْ أَجُولْ لُكُمْ: "إِنَّ السَّاعَةْ إللِّي يَسْمَعْ فِيهَا الأَمْوَاتْ صَوْتْ ابْنْ اللهْ جَايَّ وَهِيَّ دِلْوَكِيتِي وَاللِّي يَسْمَعُونَهْ يَحْيُونْ. 26 وِكَمَا أَنَّ اللآبْ عَنْدَهْ حَيَاةْ جُوَّاهْ أَعْطَى الإِبْنْ إتْكُونْ حَيَاةْ جُوَّاهْ، 27 وِأَعْطَاهْ الْسُّلْطَانْ أَنَّ يِدِينْ، عَلَشَانْ هُوَّ ابْنْ الإِنْسَانْ. 28 مَا تِتْعَجَّبُو مِنْ دَايْتِي: هَتِجِي سَاعَةْ يَسْمَعْ فِيهَا كُلْ إِللِّي فِي الْجُبُورْ صُوْتَهْ، 29 وَيِجُومُو مِنْهَا، وَكُلْ إِللِّي عِمِلْ الْصَّالِحْ يُخْرُجْ لِجِيَامَةْ الْحَيَاةْ، وَكُلْ مَنْ عِمِلْ الْسَّيِّئَاتْ يِرُوحْ لِلْدَّيْنُونَةْ. 30 وِآنِي مَا بَجْدِرْ أَعْمِلْ شَيْ مِنْ نَفْسِي، لَكِنْ أَحْكُمْ كِيفْ مَا بَاسْمَعْ، وَحُكْمِي عَادِلْ، عَلَشَانْ مَا بَاسْعَى لِتَحْجِِيجْ إِرَادْتِي لَكِنْ إرَادِةْ إللِّي أَرْسَلْنِي. 31 لَوْ كُنْتْ أَتْكَلَّمْ عَنْ نَفْسِي، كَانَتْ كَلامِي غَيرْ صَادِجْ. 32 لَكِنْ غَيِرِي لَمَّا يَشْهَدْ لِي، وِآنِي عَالِمْ أَنَّ شَهَادْتَهْ لِيْ حَجْ. 33 وِكَمَانْ بَعَدْتُمْ رُسُلْ لِيُوحَنَّا وَشِهِدْ لِلْحَجْ. 34 وِآنِي أَجُولْ دَايْتِي مِشْ عَلَشَانْ بَعْتَمِدْ عَلَى شِهَادِةْ إِنْسَانْ، لَكِنْ مِنْ أَجْلْ خَلاصْكُمْ. 35 كَانْ يُوحَنَّا مُصْبَاحَاً مُنَوَّرْ جَوِي، وَكُنْتُمْ عَاوْزِينْ أَنْ تَسْتَمْتِعُو بِنُورَهْ مُدَّةْ مِنْ الْزَّمَنْ 36 وَلَكِنْ لِي شِهَادَةْ أَعْظَمْ مِنْ شَهَادَةْ يُوحَنَّا، وَهِيَّ شَهَادَةْ الأَعْمَالْ إللِّي كَلَّفْنِي الآبْ أَنْ أَعْمِلْهَا ، فَهِيَ تِشْهَدْ لِي وَتْوَضَّحْ أَنَّ الآبْ هُوَّ إللِّي بَعَتْنِي، 37 وِالآبْ إللِّي بَعَتْنِي هُوَّ نَفْسَهْ كَمَانْ يِشْهَدْ لِي. وَانْتُمْ مَا سَمَعْتَهْ صُوْتَهْ وَاصِلْ، وَلا شُفْتُو هَيْئِتَهْ، 38 وَلا ثِبْتِتْ كِلْمِتُهْ فِي جُلُوبْكُمْ، بِدَلِيلْ إِنَّكُمْ لا تَُصدِّجُونْ إللِّي أَرْسَلَهْ 39 أَنْتُمْ تِدْرِسُونْ الْكُتُبْ لانَّكُمْ تِعْتِجْدُونْ أَنَّهَا هَتِهْدِيكُمْ لِلْحَيَاة الأَبَدِيَّةْ. الْكُتُبْ دَايْتِي تِشْهَدْ لِي، 40 وَانْتُو تِرفِضُو تِيجُو إِليَّ لِتْكُونْ لِيكُمْ الْحَيَاةْ. 41 آنِي لَسْتُ أَجْبَلْ مَجْدْ مِنْ الْنَّاسْ. 42 وَلَكِنِّي آنِي بَعْرِفْكُمْ، وِبَعْرِفْ كَمَانْ أَنَّ مَحَبَّةْ اللهْ مِشْ فِي نُفُوسْكُمْ. 43 آنِي جِيتْ بِاسْمْ أَبُويْ وَلَمْ تَجْبَلُونِي، وَلَكِنَّكُمْ ْْإتْرَحْبُونْ بِمِينْ يِجِي باسْمِ نَفْسَهْ. 44 مِنْ وَيْنْ لِيكُمْ أَنْ تؤمِنُو بِي وَانْتُمْ تِجْبَلُو الْمَجْدْ بَعْضِكُمْ مِنْ بَعْضْ، وَمَا إبْتَسْعُو فِي طَلَبْ الْمَجْدْ إللِّي مَا بيعْطِيهْ إلاَّ اللهْ! 45 لا إتْفَكْرُو أَنَّ آنِي إشْتَكْكُمْ لِلآبْ، لَكِنْ إهْنُكَّ مَينْ يِشْتَكِيكُمْ، وَهُوَّ مُوسَى إللِّي حَطِّيْتُو أَمَالْكُمْ عَلِيْهْ، 46 لَوْ كُنْتُمْ صَدَّجْتُمْ مُوسَى، لَكُنْتُمْ صَدَّجْتُونِي، لِأَنَّهْ هُوَّ كَتَبْ عَنِّي. 47 وَإِنْ كُنْتُمْ مَا تِصَدِّجُو مَا كَتَبْ مُوسَى عَنِّي فَكِيفْ تُصَدِّجُو كَلامِي.