1 وَفِي الْيُومْ التَّالِتْ كَانْ فِي فَرَحْ فِي الْبَلَدْ إللِّي إِسْمَهَا جَانَا فِي مَنْطِجَةْ الْجَلِيلْ، وِكَانَتْ هِنَاكْ إِمْ يَسُوعْ . 2 وِإتْعَزَمْ كَمَانْ يَسُوعْ لِلْفَرَحْ هُوَّ وِتْلامِيِذَهْ. 3 وِلَمَّا الْخَمْرْ خِلْصِتْ، رَاحِتْ أُمْ يَسُوعْ لِيهْ وِجَالَتْ: "الْخَمْرْ خِلِصْ مِنْ عَنْدِهُمْ" 4 فَجَالْ لَهَا يَسُوعْ: "يَا إِمْرَأَةْ مَالِي وِمَالِكْ؟ سَاعْتِي مَا إِجِتْ بَعَدْ" 5 وِجَالَتْ أُمُّهْ لِلْخَدَمْ : "أَعْمِلُو كُلْ مَا يِجُولْ لَكُمْ عَلِيْهْ". 6 وِكَانْ إهْنُكَّ سِتْ مَوَاعِينْ مِنْ حِجَارَةْ، يِمْلُوهَا الْيَهُودْ مَايْ لِلْتَطْهِيِرْ، كُلْ وَاحِدْ مِنْهَا يِشِيلْ بَيْنْ مِكْيَالِينْ أَوْ تَلاتَةْ. 7 فَجَالْ يَسُوعْ لِلْخَدَمْ: "مَلُّو الأَجْرَانْ مَايْ. فَمَلُوُهَا لِلآخِرْ. 8 وِجَالْ لُهُمْ: "دِلْوَكِيتِي إغْرَفُو مِنْهَا وَجَدِّمُو لِصَاحِبْ الْفَرَحْ" وِعَمْلُو إكْدِهْ. 9 فَلَمَّا دَاجْ رَيِّسْ الْفَرَحْ الْمَايْ إللِّي إتْحَوَّلْ لِخَمْرْ، وِمَا كَانْ يَعْرِفْ مِنْ وَيْنْ إِجَى، وِالْخَدَمْ إللِّي جَدَّمُوُهْ كَانُو عَارْفِينْ، وِنَادَمْ عَلَى الْعَرِيسْ، 10 وِجَالْ لَهْ: "كِلْ الْنَّاسْ بِجَدِّمُو الْخَمْرْالمَلِيحَةْ فِي الأوَّلْ ، وِلَمَّا يِسْكَرُو الْمَعَازِيمْ يِجَدَّمُوا لِِيهُمْ الْخَمْرْالْرَّدِيَّةْ، وَلَكِنْ أَنْتَ بَجِّيْتْ الْخَمْرْ الْمَلِيحَةْ لِلآنْ". 11 دَايْتِي أَوَّلْ الْمُعْجِزَةْ إللِّي عَمِلْهَا يَسُوعْ فِي جَانَا الْجَلِيلْ، وِبَيَّنْ بِهَا مَجْدَهْ فَآمَنْ بِهْ إتْلامِيذَهْ. 12 وِبَعْدْ إكْدِهْ نِزِلْ يَسُوعْ وِأُمَّهْ وِاخْوَاتَهْ وتْلامِيذَهْ عَلَى كَفْرْنَاحُومْ، وِجَعَدُو هُنُكَّ شِوَيِّةْ أَيَّامْ. 13 وِلَمَّا جَرَّبْ عِيدْ الْفُصْحْ الْيَهُودِي، طِلِعْ يَسُوعْ لِأُوْرُشَلِيِمْ، 14 فَلَجَى فِي الْهَيْكَلْ بَيَّاعِينْ بَجَرْ، وِغَنَمْ وِحَمَامْ، وِصَرَّافِينْ جَاعْدِينْ عَلَى طَوَايِلْهِمْ 15 وَرَاحْ عَمَلْ كَرْبَاجْ مِنْ حِبَالْ مَجْدُولْ، وِطَرَدْ الْكُلْ مِنْ الْهِيْكَلْ، الْغَنَمْ وِالْبَجَرْ، وِجَلَبْ مَنَضِدْهُمْ ، 16 وِجَالْ لِبَيَّاعِينْ الْحَمَامْ: "أُخْرُجُو مِنْ إهْنِهْ، وَمَا إتْخَلُّوُ بِيْتْ أَبُويْ بَيْتْ لِلْتِجَارَةْ". 17 وَافْتَكَرْ تَلامِيذَهْ إنَّهْ مَكْتُوبْ: "غِيرَةْ بَيْتَكْ كَلَتْنِي". 18 وِ وَجَفْ الْيَهُودْ جِدَّامْ يَسُوعْ وِجَالُو لَهْ: "أَيَّ مُعْجِزَةْ تُوَرِّينَا عَلَشَانْ تَعْمِلْ الْعَمَايِلْ دِيْ بِينَا" 19 وِجَاوَبْهُمْ يَسُوعْ "هِدُّو الْهِيْكَلْ دَايْتِي، وِآنِي أَجَوُّمُهْ افِ تَلآتْ تِيَّامْ". 20 فَجَالْ لَهْ الْيَهُودْ: "فِي سِتَّةْ وِأَرْبَعِينَ سَنَةْ إتْبَنَى الْهَيْكَلْ دَايْتِي، وِانْتَ إتْجِيمَهْ افْ تَلآتْ تِيَّامْ. 21 لَكِنَّهْ كَانْ عَنْ هِيْكَلْ جَسَدَهْ بِيِتْكَلَّمْ. 22 فَلَمَّا يَسُوعْ جَامْ مِنْ بِيْنْ الأمْوَاتْ إفْتَكَرْ إتْلامِيذَهْ إِنَّهْ جَالْ إِكْدِهْ، فَآمْنُو بِالْكِتَابْ وَبِالْكَلامْ إللِّي جَالْ لَهْ يَسُوعْ. 23 وِلمَّا كَانْ فِي عِيدْ الْفُصْحْ فِي أُوْرَشَلِيمْ، آمَنْ نَاسْ كَتِيرْ بِاسْمَهْ لَمَّا شَافُو الْمُعْجِزَاتْ اللِّي عَمَلْهَا. 24 لَكِنْ يَسُوعْ مَا إِئتَمَنْهُمْ عَلَى نَفْسُهْ، لإِنَّهْ كَانْ عَارِفْهُمْ كُلُّهُمْ 25 وَمَا كَانْ مِحْتَاجْ لِلِّي يِشْهَدْ لِيهْ فِي إِمُورْ الإِنْسَانْ، لأَنَّهْ كَانْ عَارِفْ بِاللِّي بِدَاخِلْ الإِنْسَانْ.