الأَصْحَاحْ 5
1
وِمَسْأَلِةْ الأَزْمِنَةْ وِالأَوْجَاتْ إِللِّي مِحَدَّدَةْ، أَنْتُمْ مِشْ مِحْتَاجِينْ حَاجَةْ عَلَشَانْ يِتْكِتِبْ لِيكُمْ فِيهَا.
2
عَلَشَانْ أَنْتُمْ تِعْرِفُو كِوَيِّسْ أَنِّ يُومْ الْرَّبْ جَايْ زَيْ مَا يِجِي الْحَرَامِي فِي الْلِّيْلْ.
3
وِيِكُونْ الْنَّاسْ بِيجُولُو: جِهْ الْسَّلامْ وِالْأَمْنْ! يِهْجِمْ عَلِيْهُمْ الْهَلاكْ فَجْأَةْ زَيْ الْمُخَاضْ إِللِّي يِهْجِمْ عَالْحِبْلَى، وِمَا يِجْدَرُو يِفْلِتُو أَبَدَاً.
4
غِيْرْ إِنَّكُمْ، يَا إِخْوَةْ، انْتُمْ مِشْ فِي الْظَّلْمَةْ عَلَشَانْ يِهْجِمْ عَلِيْكُمْ الْيُوْمْ دَايْتِي كأَنُّو لِصّْ.
5
وِانْتُو كِلَّاتْكُمْ أَوْلادْ الْنُّورْ وِأَبْنَاء الْنَّهَارْ. وِاحْنَا مِشْ أَهْلْ الْلِّيْلْ وَلا أَهْلْ الْظَّلْمَةْ.
6
عَلَشَانْ إِكْدِهْ، مَا نِنْعَسْ زَيْ مَا يِنْعَسْ الْنَّاسْ الْتَّانْيِينْ، لَكِنْ نِفْضَلْ سَاهْرَنِينْ وِصَاحْيِينْ،
7
لأَنَّهْ فِي الْلِّيلْ بِيِنْعَسْ إِللِّي بِيِنْعَسُو، وِيِسْكَرْ إِللِّي بِيِسْكَرُو.
8
لَكِنْ إِحْنَا، أَهْلْ الْنَّهَار، فَنِفْضَلْ صَاحْيِينْ، وِاخْدِينْ مِنْ الإِيمَانْ وِالْمَحَبَّةْ دِرْعْ لِصَدِرْنَا، وِمِنْ الْرَّجَا بِالْخَلاصْ خُوذَةْ لِرَاسْنَا.
9
وِان اللهْ عَيَّنْنَا مِشْ عَلَشَانْ يِنَزِّلْ عَلِيْنَا الْغَضَبْ لَكِنْ عَلَشَانْ يَعْطِينَا الْخَلاصْ بِرَبَّنَا يَسُوعْ الْمَسِيحْ،
10
إِللِّي مَاتْ عَنَّا عَلَشَانْ نِحْيَا كِلَّاتْنَا مَعَاهْ، سِوَاءْ كُنَّا سَهْرَانِينْ فِي الْحَيَاةْ أَوْ فِي رُجَادْ الْمُوْتْ!
11
عَلَشَانْ إِكْدِهْ عَزُّو بَعْضِيكُمْ الْبَعَضْ وِكُلْ وَاحِدْ يِشَدِّدْ الْتَّانِي، زَيْ مَا انْتُو بِتَعْمِلُو.
12
عَلَى أَنَّهْ بِنِتْرَجَّى مِنِّيكُمْ ، يَا إِخْوَةْ، أَنْ يِكُونْ عَنْدِيكُمْ تَمْيِيزْ لِلِّي بِيِجْتِهْدُو بِيْنَاتْكُمْ، وِيِرْعُوكُمْ زَيْ مَا بِرِيدْ الْرَّبْ، وِيِوعَظُكُمْ،
13
وِاتْجَدِّرُوهُمْ تَجْدِيرْ كَبِيرْ جَوِي فِي الْمَحَبَّةْ، عَلَشَانْ عَمَلْهُمْ. عِيشُو بِسَلامْ بَعْضِيكُمْ مَعْ بَعَضْ.
14
وِإِحْنَا بِنْوَصِّيكُمْ يَا إِخْوَةْ، إِنِّكُمْ تُوعَظُو إِللِّي حَيَاتْهُمْ فَوْضَى، وِتْشَدِّدُو إِللِّي مَا عَنْدِيهُمْ عَزْمْ، وِاتْسَانْدُو الْضُّعَفَاءْ، وِاتْعَامْلُو الْكُلْ بِطُولتْ بَالْ.
15
وِاحْذَرُو أَنَّ يِرُدْ وَاحِدْ مِنْكُمْ عَنْ شَرْ بِشَرْ زَيَّه. لَكِنْ إِسْعُو دَايْمَاً لِخِيْرْ فِي مُعَامَلاتْكُمْ بَعْضِيكُمْ مَعْ بَعَضْ وِللْنَّاسْ الْتَّانْيَةْ كِلَّاتْهُمْ.
16
إِفْرَحُو دَايْمَاً،
17
صَلُّو وِمَا إتْبَطِّلُو صَلَةْ،
18
أَُشْكُرُو فِي كُلْ الأَحْوَالْ: وِهِيَّ دَهْ إِرَادِةْ اللهْ لِيكُمْ فِي الْمَسِيحْ يَسُوعْ.
19
مَا تِخْمِدُو الْرُّوحْ،
20
مَا تَحْتِجْرُو الْنُّبُواتْ؛
21
وِاخْتِبْرُو كِلْ شَيْ وِاتْمَسَّكُو بِالْمَلِيحْ.
22
وِابْعَدُو عَنْ كِلْ شَيْ فِي شِبْهْ شَرّْ.
23
وِإِلَهْ الْسَّلامْ بِنَفْسَهْ يِجَدِّسْكُمْ بِالْتَّمَامْ وِيِحْفَظْ رُوحْكُمْ وِنَفْسِكُمْ وِجَسَدْكُمْ سَالْمِينْ، عَلَشَانْ مَا يِكُونْ عَنْدُكُمْ لُوْمْ لَمَّا رَبِّنَا يَسوُعْ الْمَسِيحْ يِرْجَعْ.
24
وِأَنْ اللهْ إِللِّي بِيِدْعُوكُمْ صَادِجْ، وَهَايِتَمِّمْ كُلْ دَهْ.
25
يَا إِخْوَةْ، صَلُّو مِنْ أَجْلِنَا.
26
سَلِّمُو عَلَى كُلْ الإِخْوَةْ بِجُبْلَةْ طَاهْرَةْ!
27
عَلَشَانْ خَاطْرْ الْرَّبْ تِجْرُو الْرِّسَالَةْ دَايْتِي عَلَى كُلْ الإِخْوَةْ.
28
وِنِعْمِةْ رَبِّنَا يَسُوعْ الْمَسِيحْ تِكُونْ مَعَاكُمْ.