الأَصْحَاحْ 2
1
وِانْتُو عَارْفِينْ، يَا إِخْوَاتِي، إِنِّ لَمَّا جينَالْكُمْ مَا كَانِشْ بَاطِلْ.
2
وِمَعْ إِنَّهْ كُنَّا جَاسِيْنَا مِنْ الأَلَمْ وِالإِهَانَةْ فِي مَدِينِةْ فِيلِبِي، زَيْ مَا انْتُو عَارْفِينْ، جَاتْ لِينَا جُرْأَةْ فِي إِلَهِنَا أَنْ نِكَلِّمْكُمْ بِإِنْجِيلْ اللهْ مِجَاهْدِينْ فِي وَجْهْ إِللِّي بِعَارْضُونَا بِشِدَّةْ.
3
وِمَا كَانْ وَعْظِنَا صَادِرْ عَنْ ضَلالْ وَلَا عَنْ نَجَاسَةْ، وَلَا مَكْرْ،
4
لَكِنْ كُنَّا بِنِتْكَلَّمْ زَيْ إِللِّي إِتْبَيَّنْ لِيهُمْ إِخْتِبَارْ مِنْ اللهْ أَنَّهُمْ مُسْتَحِجِّينْ يِأَتِمْنُو عَالإِِنْجِيلْ، عَلَشَانْ نِرْضِي مِشْ الْنَّاسْ لَكِنْ اللهْ إِللِّي يِخْتِبِرْ جِلُوبْنَا.
5
وِزَيْ مَا أَنْتُو عَارْفِينْ كَمَانْ، مَا استَعْمَلْنَا مَعَاكُمْ الْكَلامْ الْنَّاعِمْ، وَلا أَخَدْنَا طَرِيجْ لِلْطَمَعْ لَكِنْ الله شَاهِدْ.
6
وَلا سَعْيِنَا عَلَشَانْ نَاخُدْ مَجْدْ مِنْ الْنَّاسْ، لَا مِنِّيكُمْ وَلَأ مِنْ غِيْرْكُمْ،
7
مَعْ إِنَّهْ لِينَا الْحَجْ إِنِّ إِحْنَا نِفْرُضْ نَفْسِينَا عَلِيْكُمْ بِاعْتِبَارْنَا رُسُلْ لِلْمَسِيحْ. لَكِنْ كَانْ عَنْدِينَا شفَجَةْ بِيكُمْ زَيْ أُمْ بِتْرَضِّعْ وِتْحِنْ عَلَى وِلادْهَا.
8
وِإِنْ كَانْ شَفجِتْنَا عَلِيْكُمْ شَدِيدَةْ، رِضِينَا إِنْ نِجَدِّمْ لِيكُمْ مِشْ إِنْجِيلْ اللهْ بَسْ لَكِنْ نَفْسِينَا كَمَانْ، عَلَشَانْ أَنْتُمْ أَصْبَحْتُو مَحْبُوبِينْ عَنْدِينَا.
9
وِانْتُو عَارْفِينْ يَا اخْوَاتِي، جُهْدِنَا وِتَعَبْنَا، لَمَّا بَشَّرْنَاكُمْ بِإِنْجِيلْ اللهْ وِاحْنَا بِنِشْتِغِلْ لِيْلْ وِانْهَارْ عَلَشَانْ مَا نْكُونْ حِمْلْ تَجِيلْ عَلَى وَاحِدْ مِنِّيكُمْ.
10
وِانْتُو شَاهْدِينْ، وِيِشْهَدْ اللهْ، كِيْفْ إِتْصَرَّفْنَا بِيْنَاتْكُمْ، انْتُو الْمُؤْمِنِينْ، بِطَهَارَةْ وِاسْتِجَامَةْ وِبَرِيئينْ مِنْ كُلِّ لُوْمْ،
11
وِانْتُو عَارْفِينْ كَمَانْ كِيْفْ عَامَلْنَاكُمْ زَيْ الأَبْ لِأَوْلادَهْ، وِكُنَّا بِنُوْعَظْ كُلْ وَاحِدْ مِنْكُمْ وِانْشَجِّعْكُمْ
12
وِنِنْصَحْكُمْ أَنْ تِسْلِكُو سِلُوكْ يِلِيجْ بِالله، دَايْتِي إِللِّي بِجَدِّمْ الْدَّعْوَةْ لِيكُمْ لِمَلَكُوتَهْ وِمَجْدَهْ.
13
وِعَلَشَانْ إِكْدِهْ إِحْنَا كَمَانْ نِجَدِّمْ الْشُّكْرْ لِلهْ عَلِى طُولْ، عَلَشَانْ لَمَّا اسْتَجْبَلْتُمْ مِنِّينَا كِلْمِةْ الْبِشَارَةْ مِنْ اللهْ، جِبِلْتُوهَا مِشْ كَاَنَّهَا كِلْمِةْ بَشَرْ، لَكِنْ زَيْ مَا هِيَ فِي الْحَجِيجَةْ: وِاعْتَبَرْتُوهَا كِلْمِةْ اللهْ إِللِّي شَغَّالَةْ فِيكُمْ كَمَانْ انْتُو الْمُؤمِنِينْ.
14
وِانْتُو، يَا اخْوَاتِي، صِرْتُو زَيْ كَنَايِسْ اللهْ إِللِّي فِي مَنْطِجَةْ الْيَهُودِيَّةْ إِللِّي هِيَ فِي الْمَسِيحْ يَسُوعْ. وِانْتُو كَمَانْ عَانِيْتُو كَتِيرْ عَلَى يَدْ وِلَادْ جِنْسِكُمْ وِاللِّي عَانُوهْ هُمَّ عَلَى أَدِيْنْ الْيَهُودْ،
15
إِللِّي جَتَلُو الْرَّبْ يَسُوعْ وِالأَنْبِيَا وِاضْطَهَدُونَا إِحْنَا كَمَانْ، وِهُمَّ مَا بِيِرْضُو اللهْ وِيِعَادُو الْنَّاسْ كِلَّاتْهُمْ،
16
وِهُمَّ بِيِمْنَعُونَا مِنْ تَجْدِيمْ الْبِشَارَةْ لِلأُمَمْ عَلَشَانْ يِتْخَلَّصُو، وِبِكْدِهْ يِكَمِّلُو خَطَيَاهُمْ كُلْ الْوَكْتْ، لَكِنْ الْغَضَبْ حَلَّ بِيهُمْ لِأَقْصَى حَدْ.
17
وَلَكِنْ إِحْنَا، يَا إِخْوَاتِي، إِتْفَصَلْنَا عَنِّيكُمْ لِمُدَّةْ جِصَيَّرَةْ، بِالْوَجْهْ مِشْ بِالْجَلْبْ، وِبَذَلْنَا جِهْدْ كَتِيرْ جَوِي عَلَشَانْ نِشُوفْ وِجُوهْكُمْ وِإِحْنَا مِشْتاجِينْ جَوِي لِيكُمْ.
18
عَلَشَانْ إِكْدِهْ نَاوِيْنَا نِيجِي لِيكُمْ، وِبِالأَخَصْ أَنَا بُولُسْ كَذَا مَرَّةْ، وِالْشِّيطَانْ كَانْ بِيِعَطِّلْنَا.
19
وِآيْهْ هُوَ رَجَانَا أَوْ فَرَحْنَا أَوْ إِكْلِيلْ فَخْرِينَا جِدَّامْ رَبَِّنَا يَسُوعْ لَمَّا يِجِي تَانِي؟ مِشْ أَنْتُمْ؟ نَعَمْ،
20
عَلَشَانْ أَنْتُمْ إِفْتِخَارْنَا وِفَرَحْنَا.