Capítulo 9 - Nainita nanaitjaca Pascua.
1
Caaco jliaji IMINALRITI Moise irso jalrapocolri Sinai lrico, yaamapi kérri naco yamawalria nacó namoto cayamiwa Egipto jipaite lrikjoite. Lriaco lrirso:
2
''Picadaa nawacaacawa njaji iraelnai naiñjá-carro Pascua ima jlinaana lricocan, jlinaana ioca capisho manawa pawalria icoami.
3
Dainoma nacojle, catorce jalredaoca nacó, icatsots iwaadaca Pascua cyotsaji Nocadaa capisho jlinaana pawalria irso mana.Inaitjaotsani cayotsaji Nocaite capishoena, njite shepaotsa cayoji nacaite capisho njaji yácoti kjaidaperri icaitecperri lrinacoapana nacó.''
4
Niini Moise icaite njemi njaji Iraelnai nawacaacá-carrowa nawada carrojliaji Nacatima-taacá carroa Pascua lricó.
5
Cayo pia nanaitjaca pawalri inita carropi nacó, catorce jalredaoca nacó, jalrapocolri Sinai lricó. Njaji Inaiki Iraelnai njeepa pjiomi njaji yácoti Dio inaalri Moise inaitjaca.
6
Niini pia nanakjoite apepena atsianai imatsicalri nadada pada inaiki idadam mayandalrim ikjaote. Niini corrin nataita naiñjaca Pascua nainai jliadaa jécoapica. Niini naacawa Moise njite Aarón iderse jliadatsa.
7
Naaco Moise irso njaji atsianai: ''Maatsica fa pada atsia mayandalri idada ikjaote. ¿Coada corrin picadaa wainoca maaficalri wamatsicanaa ikjaote jlinaana lrico pawalria icoamdalri narsowalrepe njaji iraelitanai?''
8
Moise iaco narso: ''Iwapa toa njomí-carro coajica Dio icaiteca Njomi inacoapana.''
9
Njite JLIAJI IMINALRITI iaco Moise irso cayoji:
10
Cayoatsa picaiteca narso njaji iraelitanai aimadn: ''Coandalri cadaa cada inakjoite o njawatsa njaji walricomanai maatsi cadana pada mayandalrim idada ikjaote, o naají cada toa teecowa, nataita toatsa nawaadaca wa-MINALRI iPascuani.''
11
Nataita nawaadaca Pasccua nacó yaamapi kérri nacó, catorce jalredaoca nacó, dainoma nacojle. Narsotsaotsa naiñjacani peetje mewite sho tsa njite malritsi jipití-perri sho.
12
Corrin nataita namacaca lrinacope tjewaijle icaona, corrin tsakja nataitsa na-bplromtaca naapi. Narsotsa nanaitjaca cayotsaji Pascua inacoapa nacó.
13
Mitsa njaji matsiaperritsa njite corrin najícatoa teecowa, njite corrin nawaadaca jliaji Pascua, jliaji inaikica caidalri, irsotsa ipeecoca ioyawani wadee ikitsinda catoani corri capoa lriino maaficalri cayoji wa-Minalri itatja capisho wainai wanaitjá-carro pawalri icoam. Caidalritsaotsa lrimatsicana lrinacó.
14
Pada tekjoité-dalri iofacada iinai njite lrinaitja lriwaadá-carro Pascua Dio ípitana nacó, lrirsotsaotsa lrinaitjaca cayotsaji yacoti kjaidá-pérri icaite capisho, jliepaca njaji yácoti lrinacoapana-dalri. Pacoacatsa njaji yácoti lrirso nacayoshotsa njaji Iraelnai jiipai iminanai.''
15
Jliadaa pia neemetaca jliaji panti nawacaaca carrodawa, iyadaoca iñampa jliaji panti lriofa caroda jliaji Dio inaitja shopa yácoti naapiya. Dainoma nacojle jliaji iyadaoca irroa lriicao jliaji panti nawacaaca carroda lrico. Cayo pacapaca jliaji iyadaoca tiyé capisho a kjerreca jaalrecani.
16
Cayo pia manacatsa jliaji iyadaoca, tiyé capisho lriicao mana deepi ricó.
17
Njite lricarsa cádanaco jliaji iyadaoca nawacaaca carroda njite, njaji Iraelnai naatsakjawa njiteo. Njite a kjree cadaa lriá lrirroa jliaji iyadaoca, icatsa nanaitja catoa napanaitawa njaji iraelitanai.
18
Naawa njaji Iraelnai Dio cádanacotsa inaa naaca njiteo, njite naofawa, a kjerreca lrinaa naofacawa. Lrirro cádanacotoa jliaji iyadaoca nawacaaca carroda iicao, icatsa naofa catoa niini napanaita lrico nacoanaa.
19
Wiá cada lrírrocawa jliaji iyadaica lriicao jliaji nawacaaca carroda nacó, njaji Iraelnai narsotsa naofa catoa niiniwa njite narsotsa njeepaca coajica Dio icaiteca narso nácarrowa napeyajlewa.
20
Papiape aima jalredaoca lrirrocawa jliaji iyadaoca lriicao jliaji panti nawacaaca carroda nacó. Cayo cádanaco narsotsa njepaca coajica Dio icaiteca narso, narso piatsa naofá catoa, njite naawa Dio inaa cádanacotsa naacawa.
21
Papiape nacapa jliaji iyadaoca naofacawa lrico dainoma nakjoite atee piyompincojle. Lri carsa cádanaco piyompinacó, ikena naacwa. Lriá cadawa jliaji iyadaoca depjite njite jalrewerrico narsotsa naacawa, icaamitsa naacawa lriá cádanaco naapiya jliaji iyadaoca.
22
Lrirro cadaa jliaji iyadaoca yamadaa jalredaoca, o ápapi, o pawalria, paafe cadatsa lrirroa, njaji iraelitanai narsotsa naofacawa pafetsa naapana lricó, corrin nataita naapjacawa. Mitsa lriá cadawa naapiya, icamitsa naapjcawa.
23
Naofawa a kjerreca Dio inaa naofacawa, njite naawa a kjerreca Lrinaa naacawa. Njeepa Dio yáco cayoji Dio icaite capishona Moise nakjoite.