Capítulo 31 - Moise ino njaji madianitanai mayamica ipjeya
1
Lriaco jliaji IMINALRITI Moise irso:
2
''Pinoatsa njaji madianitanai nacoadawa njaji nanaitjalri iraelitanai irso. Njite pino cayamina, icamitsaotsa mayamica pjia piwacaaca carroatsawa naapiya njaji piferrinaipemi.
3
Ikena caacoca Moise narso njaji inaiki aimadan. Lriaco narso: ''Piwiaca naapiya njaji pinaikite nácarroatsa nainoacawa Madian ikjoete njite cayoatsa Waminalri ioma nacoadawa njaji nainoji.
4
Mil tsolrodaonai watsa nameenaca nacoami njaji Irael poco nácarro oowi ricó.''
5
Niini njaji tsolrodaonai aimadan iraelitanai, mil-pe iacawa nanakjoite oowi ricó, niini doce mil-ca namaimaca padenirri.
6
Ikena Moise imeenacana oowi ricó, mil-pe naacawa, Finees, sacerdote Eleazar irri iá nainai, njite nadee apadapena inaniti Dio ípana lrikjoite njite njaji trompeta lri-ricope napjiá-carro najishopa.
7
Nainoacawa Madian ikjoete, cayotsaji Dio ina capisho pia Moise inaitjaca.
8
Naino pjiominjaji atsianai. Naino pjiomi njaji talricanatinai Madian lricope nainaitsa njaji nanaikite: Evi, Requem, Zur, Hur njite Reba, njaji cincode talricanaatinai Madian lricope pia. Naino tsakja matseta shó Balaam, Beor irri.
9
Njaji tsolrodaonai aimadan nadee preso njaji
inaitjepe Madian lricope, neenipe, na vacan pjiomi, nápirra, njite pjiomi nayarro. Nadee pjiomi naoya.
10
Namjaita pjiomi nayacalre naofacawa lrico pia, pjiomi tsakja napana poco naofacarroji manawa.
11
Njepa naoya pjiomi nayarroaji njite njaji napresotaji pia, inaiki njite maaficalri tsakja.
12
Nadee Moise irso, sacerdote Eleazar isro njite naikjaolre njaji inaiki aimadan iraelitanai njaji inaiki napresotaji, nayarroaji, pjiomi njaji narsonipe. Nadee pjiomi naofacawa lrico piatoa pacoacaitacawa lrico jiipai Moab lrico, tsomi Jordán ioya Jericó icodapi.
13
Moise njite sacerdote Eleazar, pjiomi tsakja njaji papocoperri iofacawa iapiyawanaipe nácarro nacoadatana naofacawa lricojle pemajle.
14
Mitsa kerroa jliaji Moise naapiya njaji tsolrodaonai jiwidaapo, njaji comandantenai isocape mil ipeyajle nanaikite njite njaji capitamanai irsocape cien ipeyajle nanaikite, njaji yacapewa owi ricojle.
15
Moise iaco narso: ''¿Coada icadaa cafitsa njaji inaitjepe?''
16
Icapa coaji piaca nanaitjaca Iraelnai irso njaji inaitjepe, Balaam icadaa pia narso iacoti, niini nanaitja piaca namatsicanawa Dio ipeyajle Peor ikjaote, niinicarro mayamica njaji Dio inaikite papocoperri iofapiacawa.
17
Pino pjiomi njaji atsianai pekipenaina, njite pjiomi njaji inaitjepe jiyapacapena atsia iapiya.
18
Mitsa jipaotsa irsowao njaji inaitjepe walridarrope toa mjeyapacape toa atsia yapiya.
19
Iofa toatsa pemajle lrioya jliaji iofacawa siete jalredaoca icoa. PJiomi njaji inocape inaiki, o inotacada pada mayamdalri, irsotsa imatsietacawa madalridaa jalredaoca nacó, njite siete jalredaoca nacó inaotsa namatsietacawa njaji ideji preso.
20
Imatsieta tsakjaotsa njaji itsayani, njaji inaitjaji maaficalri iyam sho, cabra iyo sho, njite pjiomi njaji inaitjaji jaico sho tsakja.''
21
Sacerdote Eleazar iaco narso njaji tsolrodaonai iacape piawa oowi ricojle: ''Icapiatsa pada yacoti kjaidadalri Dio icaiterri pia Moise irso lrinaitjá-carro.
22
Njaji owirro, palrata, bronce, tsípalra, namanta shopa mocafepe, mocafepe,
23
njite pjiomi njaji corri-perri icodowa tiyé shó, imjaitaotsana, niniotsa matsiacana. Njiteotsa pimatsietana lrisho jliaji ooni matsiadalri picotsoshopa mana. Pjiomi njaji imacapewa pimatsietaotsana lrisho jliaji ooni.
24
Icotsoatsa itsayani siete jalredaoca nacó, Ikenaotsa matsiacana. Njitenaotsa itaita idecana iofacawa lrico sha Iraelnai.''
25
Njite Dio iaco Moise irso cayoji:
26
''Piniweta pjiomi njaji ideji njite, njaji inaiki njite njaji maficalri. Pjia, sacerdote Eleazar njite njaji Iraelnai jiwidapo naapaneta icoam.
27
Pjienetaotsa njaji nadeji yamapocowa. Narso njaji tsolrodaonai iacapemi oowi ricó njite naapiya njaji inaikinai Irael lricoperri.
28
Njite picadaotsa nacaoñacacawa njaji tsolrodaonai iacapewa oowi ricó naikjaote njaji narsolri nataitá carroatsa naaca Norsoni. Naawatsa quiniento nakjoite pada inaiki, vaaca, borro, oveja, cabra tsakja.
29
Nanakjoite njaji pamoyoaperri nacaoña shopa njite piawatsana sacerdote Eleazar irso pada ofrenda idenipe Norso Nopeyajle.
30
Njite pamoyoa nakjoite njaji Iraelnai jitaji nacoema ioya, jitaotsa padape cincuenta nakjoite inaitjepe, vaaca, oveja, cabra. Iawatsa narso njaji levitanai nawapa shopa jliaji noopana.''
31
Niini Moise njite sacerdote Eleazar nanaitja cayoji Dio inaa capisho nanaitjaca.
32
Njaji njepalri pia njaji tsolrodaonai icapiatsa njaji: sesenta cinco mil oveja,
33
setenta do mil buey,
34
setenta un mil borro,
35
njite trenta do mil inaitjepe walridarrope mjeyapacape atsia iapiya.
36
Njite njaji njenitalri narsowawa njaji tsolrodaonai treciento trenta siete mil oveja namaimaca.
37
Njite njaji oveja Waminalri iyape icapiatsa njaji, seiciento setenta cinco mil oveja.
38
Trenta sei mil buey, njite njaji nacaoñashopa Waminalri irso setenta do.
39
Trenta mil quiniento namaimaca njaji borro njite nanakjoite njaji sesenta uno WAMINALRI iyapecana.
40
Diesisei mil inaitjepe njite trenta do nanakjoite njaji inaitjepe WAMINALRI iyapecana, nacaoñaca shopawa.
41
Moise jipa njaji nacaoñaca shopa pjiomi ofrendawa lrideoda DIo irso. Lriana sacerdote Eleazar irso, cayotsaji Dio inaa capisho Moise inaitjaca.
42
Mitsa nayape njaji papoco Iraelnai, nanakjoite njaji Moise iniwa pia nacarro oowi ricó,
43
icapoiatsa namaimaca cayoji, treciento trenta siete mil quiniento oveja,
44
trenta sei mil buey,
45
trenta mil quiniento borro,
46
njite diesisei mil inaitjepe.
47
Nanakjoite njaji diesisei mil Iraelitanai ipamoyoaca, Moise jita naoya padatsa cincoenta nakjoite, coshoca atsianai njite maficalri tsakja. Lriana narso njaji levitanai njaji iwapacape Dio ipana, cayotsaji Dio inaa capisho Moise inaitjaca.
48
Njite njaji tsolrodaonai iapiyawanai, njaji comandantenai irsocaperri mil ipjeyajle nanakite, njite njaji capitamanai irsocaperri cien ipjeyajle nanaikite, naawa Moise iderse.
49
Naaco lrirso: ''njaji pirsoperri naniweta pjiomi njaji atsianai warsoperri, corrin njeyapa apada atsia nanakjoite.
50
Wadenina njaji ofrenda Dio iyarrope, naokenatji nacoamitsa njaji atsianai, nanaitjaji owirro sho, nanaapapi, nacapirro nakjenanata shopa, njentada, napatjepi naita shopa wamatsicana waoya Dio ipeyajle.
51
Moise njite jliaji sacerdote Elezar jipa nakjoete pjiomi njaji owirro njite pjiomi nayeca nanaitjaji.
52
Pjiomi njaji ofrenda naaji Dio irso, njaji ofrenda naaji njaji comandantenai irsocape mil ipeyajle nanaikite, njite njaji capitamanai irsocape cien ipeyajle nanaikite, naniwa ciento ochenta cuatro mil kilo padenirri.
53
Nacoanam njaji tsolrodaonai njepa pia inaniti, njepa tsakja inaiki narsowao.
54
Moise njite sacerdote Eleazar njepa owirro naoya njaji comandantenai irsocape mil ipeyajle nanaikite, njite njaji capitamanai irsocape cien ipeyajle nanaikite. Njepa ndeni nacadá-carro naofawa Dio ipana lrico iraelitanai iwadá-carro Dio.