Capítulo 25 - Iraelnai naa matsiadalri Baal irso
1
Njaji Iraelnai naoca toa naofawa Sitim lricó, njite njaji atsianai nanaitja maatsi naapiya njaji inaitjepe Moab lricoperri,
2
ima njaji moabitanai nainaicana nainí-carro maaficalri nadiote imaimaca irso. Ikena njaji Iraelitanai nainjá naapiya njite naorso tsakja tjewacalre nanoma jiipai nacojle moabitanai idiote ipeyajle.
3
Njaji inaiki iraelitanai, naawa nainai naacarro matsiadalri Baal-peor irso, njite Dio írroa ipojliawa Irael ikjoete.
4
JLIAJI IMINALRITI iaco Moise irso: ''Piino pjiomi njaji Iraelnai iapiyawanai inaitjacape imatsicanaawa njite pipapiotsa nerroa Nopeyajle nacapá carroatsa pjiomina, njite cayoatsa noirroa idiawatsa Iraelnai ikjoete.''
5
Niini Moise iaco narso njaji apaana Iraelnai iapiyawanai manaitjacapetsa imatsicanawa nainai: ''Icoanamtsa shaa irsotsa iinoca njaji inaiki iacape nainai naacarro matsiadalri Baal-Peor irso.''
6
Njite, ape atsia nanakjoite njaji Iraelnai idee lriipaneta lrikjoite apama ínarro madianita. Moise icapa njite pjiomi njaji Iraelnai imaimaca, naiya cadanatoa nawacaaca carroda ipananoma lricó.
7
Njite Finees, Eleazar irri, sacerdote Aarón irri, lricapana, niini icaamitsa jlinico napecolrikjoite njaji aimadan, jlipa lricaapi ricó molroco.
8
Njite lripineetana napanaita lricojle, icatsa nirse Finees íno yamadapena; jliaji atsia iraelita njite rsoaji ínarro madianita. Njite icaamitsa yamica Iraelnai ioya jliaji maatsirri imatsica pialrina.
9
Venticoatro mil iraelitanai pia mayami nasho njaji maatsirri imatsica pialrina.
10
Caaco JLIAJI IMINALRITI Moise irso irso cayoji:
11
''Finees, Eleazar irri, sacerdote Aarón irri, icatsa jliaji imalrica yaamica kerroaca Njoa Iraelnai ikjoete ima kerroaca lricapaca njaji inakjoitepe inaitjacape maatsi Nokjoete. Cayo shopa corrin Noino pjiomi njaji Iraelnai Noirroa lricó.
12
Niini picaite Finees irso cayoji: ''Cayo lricaiteca JLIAJI IMINALRITI: ''Icapa, Nonaitjaca yácoti Finees iinai, Nocadaa caotsa lrimaodacá carroatsa lriofacawa.
13
Lrirso njite narso njaji lridakenai jliapodamperrimi, pada yácoti sacerdoté carroni caidalriwetsa, maatsi capoa lricapaca njaji inaitjacaperri maatsi Nokjoete, Njoa lri-Diote. Lripiyoca namatsicanaa njaji Iraelnai pjiomi.''''
14
Zimri pia lriipitana jliaji atsia iraelita, Salu irri jliaji mayamirri roinai rsoaji ínarro madianita, pada
njewidaapo pia oopi rikjoitetsa lriipaneta irso Simeón poco lricó.
15
Cozbi pia roipitana rsoaji ínarro madianita, Zur íto, pada lripaneta jiwidaapo Madian lricó.
16
Cayoshopa, lriaco JLIAJI IMINALRITI Moise irso cayoji:
17
''Picapaotsa narso njaji madianitanai picoema shó njite pínoatsana,
18
ima njatsa icapaca shaa njeponda shó maatsi capoa nacapaca irso. Njatsa icadaa inaitjá-carro maatsi jiipana Peor lrico njite roapiya rsoaji nakitsinda Cozbi, madianitanai jiwidaapo iito, rsoaji mayamirro maatsidalri ínocaojli shá jiipana Peor lrico.''