Capítulo 19 - Vaaca irraini
1
Caaco Moise njite Aaró irso. Lriaco narso:
2
''Pada yácoti kjaidadalri jliaji Nocaiterri irso yofá carroatsa matsia: Icaiteotsa njaji Iraelnai nadee carroatsa irso apana vaaca irraini matserrenetsa, marsocadalri idapalri, corri-darrotoa nacadaa ideeca jamiñadalri.
3
Yawatsano sacerdote Eleazar irso. Ideotsano pemajle iofacawa ioya, njite pada irsotsa ínocano Eleazar ipeyajle.
4
Sacerdote Eleazar jipaotsa roirrana inacope njite lriwitsica watsa siete piape lripananoma icoemjete jliaji iwacaaca carroda.
5
Njite ape sacerdote irsotsa imjaaitaca rsoaji vaaca lricapatsa. Irsotsa imjaitaca royam, roipe, roirrana njite pjiomi lrimatsicanda fie.
6
Jliaji sacerdote lrirsotsa jlipaca jaico cedro, hisopo njite maficalri íyo irraidalri.
7
Njitedalri, lrirsotsa lricotsoca lritsayai njite lripita ooni ricó. Njite dekjena lritaita jliewacawa iofacawa lricó, niniotsa maatsi catoani papienirri deepi nacojle.
8
Jliaji ínocada jliaji vaaca írraini lrirsotsa lricotsoca lritsayai njite lripita ooni ricó. Niniotsa maatsi catoani papienirri dainoma nacojle.
9
Njite pada corridalritsa irso imatsicanaa icatsaotsa jliaji itaitalrica vaaca namjaitanda iwayolrem lridee-carroni iofacawa pemajle mapirra-cawatsa. Imatsietaotsa matsia narsowalreo njaji papocoperri iofacawa Iraelnai. Nárroatsa ooni lri-ricoda napiyoacá carroatsa namatsicanaa ioya, ima ofrendaca jliaji vaaca iwayolremi imatsicanaati ikjaotenadalri.
10
Njite jliaji iniwacada vaaca iwayolremi lrirso tsaotsaa lricotsoca lritsani matsia. Njite maatsi catoatsa papienirri dainoma nacojle. Yacoti kjaidadalrica narso njaji Iraelnai caidalriwetsa, njite narso tsakja njaji iofacape nainai pikeetemwa.
11
Coca cadaa inota pada inaiki mayamdalri idada siete jalredaoca watsa maatsicani.
12
Jliatsa jliaji inaiki lrirsotsa lrimatsietaacawa jliwaca-waacatsa madalridaa jalredaoca nacó njite siete jalredaoca naco tsakja. Niniotsa matsiacani. Mitsa corri cadaa lrimatsietaacawa madalridaa nacó, corrin tsakjaotsa matsiacani siete jalredaoca nacó.
13
Coca cadaa inota pada inaiki mayamdalri idada, njite corri cadaa lrimatsietaacawa lrimatsicanaa ioya lrinota cayamini, lrimatsicaotsa jliaji Dio iipana. Niini jliaji inaiki cayodalri, Irsotsa jitaca ipeeco naoya njaji Iraelnai corri capoa nacotsoni lrisho jliaji ooni matsiadalri. Maatsidalri catsaotsani, lrinaco minicatsaotsa lrimatsicanaa.
14
Cayoatsa yácoti kjaidadalri mayami cadaa pada inaiki lriipana lricó. Pada sheewa cada lri-ricoda o niini cadena pada lri-ricoda icaamitsa maatsicani siete jalredaoca.
15
Pjiomi njaji yarropetidape marsocapetsa naapanaita maatsi tsakjaotsana.
16
Pacuaca tsakja jliada naco tsakja, coca cadaa inota mayadalrim nainonda matseeta shó, o coandalri catsa mayandalrim, naapipem, o irrirrim icaamitsaotsa maatsica jliaji inaiki siete jalredaoca.
17
Cayoatsa pinaitjaca njaji inaiki maatsiperri mayandalrim ikjaote: Pjipaotsa lriwayolre jliaji ofrenda imatsicanaati ikjaote-naadalri njite piarroatsa apana litro ooni walriajai taazapi ricó.
18
Njite jliaji matsiadlritsa jlipaotsa papoco lriida jipitiperri, lripotsietani ooni ricó, njite lriwitsica lrinaco ooni shó jliaji panti, pjiomi njaji lriitada, nanaco njaji inaiki sheewacape pia niinio, njite nanaco pjiomi njaji inotacapem mayandalrim nainonda maatseta shó, naapipepem, irrirrim.
19
Madalridaa nacó, njite siete jalredaoca nacó, jliaji inaiki matsiadalritsa lriwitsicaotsa lrinacó jliaji maatsidalri. Siete jalredaoca nacó lrisotsa lrimatsietaacawa jliwaaca waacatsa. Lrirsotsa lricotsoacawa njite lritsayan tsakja ooni ricó. Njite matsia kenaotsa deepi ricó.
20
Mitsa corridalri imatsietaacawa, corri capoatsa lrioma lrimatsietaacawa, icaamitsaotsa jitaca ioyawani iofacawa ioya, ima lrimatsicaca Dio iipana matsiadalri. Corriotsa nárro-carro ooni lrinacó. icaamitsaotsa maatsicani.
21
Caidalriwenatsaotsa jliaji yacoti kjaidadalri lrinacoapaná-dalri. Jliaji iarrocada ooni lrinacó matsiá carroni lrirsotsa lricotsoca lritsayani. Njite maatsi catoatsani papienirri deepi nacojle.
22
Coca cadaotsa lrinota jliaji maatsidalri, maatsicaotsani. Maatsicani papienirri deepi nacojle.''