Capítulo 8 (Nacadaa Aarón njite njaji lrienipe sacerdoté-carrona)
1
Caaco JLIAJI IMINALRITI Moise irso cayoji:
2
Piinai Aarón njite njaji lrienipe tsakja, pidee njaji tsaaya njite aceite parronda nanaco, jliaji toro ofrenda imatsicanaati ikjaotenaadalri, yaamana carnero, njite njaji peetje mewi-perritsa tseetoda lrico.
3
Piwaketa njaji inaiki iwaketaaca-carroda ipananoma lricó.''
4
Moise inaitja cayotsaji Dio inaa capisho lrinaitjaca, njite njaji inaiki nawacaacawa nawacaaca-carroda ipananoma lricó.
5
Njite Moise iaco narso njaji iwacaacalrio: ''Icatsa cayoji IMINALRITI inaa wanaitjaca.''
6
Moise idee Aarón njite njaji lrienipe njite lricotsona ooni shó.
7
Jlieta Aarón irso lri tsayan jalripadalri njite lripapi lritsayan nacó lriiwalre ipapi nacakjaidalri, jlieta lrinacó lri tsayan nacódalri njite jlieta lrirso lricodaita nacódalri, njite lripapi jliaji lricodaita nacódalri lrinacoa lrisho jliaji lripapi nañanikja matsia.
8
Lricadaa tsakja lrinacó njaji lriteda nacópe írroa, njite lricadaa nanaco njaji lriteda nacoperri njaji lriajishopa coajica najirrica Urim njite jliaji pada lriipitana Turim.
9
Lricadaa jliwida ncó jliaji yamacatí tsopewa sho dalri, njite lriecoa nacó lricadaa jliaji capatsite owirroita caacona carrodani, cayotsaji Dio inaa capisho lrinaitjaca.
10
Moise jipa jliaji aceite naiñjeta shopa inaiki nacó, lriarro nawacaaca-carroda nacó njite nanaco njaji lriitada niini jlienitana Dio irsowawa.
11
Jliarro aceite siete piape altar nacó, cayotsa lriniwanaca jliaji altar njite pjiomi njaji nadejishopa niini, njite jliaji ooni yárroda njite lriofacawa naco tsakja, jlienita pjiomina Dio irso
12
Njite lrinacope jliaji aceite narronda nanaco lriarroni Aarón jiwida nacó njite cayotsa jlienitacani lridejicalre nacó.
13
Moise idee njaji Aarón yénipe njite jlieta nanaco natsayaniwa jalripadalri. Lripápi naawalre nacó naawalrekja njite lriñampa njewidanacó jérriwai máca sho njewida nacó, cayotsaji Dio inaa capisho lrinaitjaca.
14
Moise inaa nadeeca jliaji toro ofrenda
imatsicanaati ikjaotenaadalri, njite Aarón, njaji lrienipe tsakja nacadaa nacaapi jliwida nacó jliaji toro nadenda imatsicanaati ikjaotenaadalri.
15
Moise inaa nainocani, njite jlipa lrirrana inacope lricaapi ricó lriarró-carro altar itsowa nacó wadee camatsicanaa shocani, lriarro tsakja írranati altar itajida nacó njite lricadaa jliaji alatar Dio iyadá-carroni lriinó-carro maaficalri lrinacó namatsicanaa ikjaotenadalri.
16
Njite Moise jita pjiomi njaji lriiti lrishapi nacope, lrishopana iiti, njite lritepe lriiti fie, njite lrimjaitana altar nacó.
17
Njite njaji toro iitepemi, lriyami, lripem njite lrimatsicanda lrimjaitani pemajle lrioya jliaji naofacawa lricó, cayotsaji DIo inaa capisho lrinaitjaca.
18
Njite Moise inaa nadeeca tsakja jliaji carnero, ofrenda namjaitaoda, njite Aarón, njaji lrienipe nacadaa nacaapi carnero jiwida nacó.
19
Lriino jliaji maaficalri njite lriarro lrirranami altar nacó pjiomi.
20
0Lricadowa jliaji carnero njite lrimjaita jliwidam, njaji lricadowaji njite lriiti tsakja.
21
Lricotso matsia njaji lrishapi, lripoita ooni shó, njite lrimjaita pjiomina altar nacó. Pada ofrenda namjaitanda cani, icadacada joiwi iitan ima namjaitandaca tiyé ricó Dio irso, cayotsaji Dio inaa capisho Moise inaitjaca.
22
Njite Moise idee jliaji apana carnero, jliaji carnero nakeepinatashopana, njite Aarón njite njaji lrienipe nacadaa nacaapi jliwida nacó.
23
Moise iino jliaji maaficalri njite jlípa lrírrana inacope, lriñjeta Aarón sheni atsialriema nacó, jlipjewida makjewi nacó, lricaapjiwida makjewi nacó tsakja atsielriema nacó pjiomi.
24
Njite lridee njaji Aarón yénipe, njite lriñjeta njeeni atsialriema nacó, njaipjewida makjewi nacó, nacaapjiwida makjewi nacó tsakja atsielriema nacó pjiomi. Njite Moise iwitsica írranati altar naco padenirri.
25
Moise jita njaji lriiti, lriitipi iiti, pjiomi lriiti lrishapí nacope, lrishopana iiti, njaji lritepe lriiti fie njite lricotsipa atsialriemá-dalri.
26
Jlita tsakja pan meewi-perritsa lrioya jliaji tseeto nacadanda Dio ipeyajle, jlipa njite njaji pan meewi-perritsa nayoají, jlipa tsakja paana pan lriñjetampe írranati shó njite paita peetje jalritaite-tsa, njite lricadaana nanacó njaji maaficalri iiti njite lricotsipa nacó.
27
Moise icadaana Aarón irso lrienipe yapiya njerretá-carro Dio ipeyajle ofrenda njerretanda Dio ipeyajle.
28
Nataita cayamina, Moise jita naoyani lrimjaitá-carrona altar nacó ima ofrenda namjaitandacani. Pada ofrenda lrimjaitanda lrikepitanata shopana niini matsiadalrica iitan. Ofrenda namjaitanda tiyé ricó Dio irsó.
29
Njite Moise jipa lricodaita jliaji maaficalri jlirretani ima ofrenda njerretandaca Dio ipeyajle. Icatsa njaji carnero inacope Moise idejirri isho lrikeepitanata cádanaco njaji sacerdotenai, cayotsaji Dio inaa capisho lrinaitjaca.
30
Moise jipa aceite inacope naiñjetshopa inaiki inaco njite lrírrana inacope altar nacóda; lriwitsica Aarón nacó, lri tsayan nacó, lrienipe nacó njite na-tsayan nacó. Cayotsa lrikepitanata Aarón, njaji lrienipe njite njaji na-tsayani Dio ipeyajle.
31
Niini Moise iaco Aarón irso njite njaji lrienipe: ''Hiyana lripe jliaji maaficalri iwacaaca-carroda ipananoma lricó, icatsaotsa iñjaca niní peetje mewidalri shó lri-ricodadalri jliaji tseeto wakeepinatashopa sha, cayotsa nonaa capisho pinaitjaca, inma nocaiteca, ''Aarón njite lrienipe watsa iñjana.''
32
Njite njaji lripe inacope imacaji njite njaji peetje inacope tsakja imjaitaotsana.
33
Yofa toatsa iwacaaca-carroda ipananoma lricó siete jalredaoca, akjerre kenaotsa wakepitanatacawa jinaana yoocawa matsia irsó. Ima jliaji IMINALRITI watsa ikepitanata sha siete jalredaoca.
34
Jliaji wanaitjalri irso jliadaa jecoapi, jliaji IMINALRITI inaa wanaitjaca wapiyó-carro ioya imatsicanaa.
35
Yofaotsa iwacaaca-carroda ipananoma lricó siete jalredaoca njite siete deepi. Shepaotsa jliaji wa-Minalri inaalri inaitjaca, ima corri cadaa sheepa, mayami caotsa shá.''
36
Aarón njite njaji lrienipe nanaitja pjiomi cayoji Dio inaa capisho nananitjaca Moise nakjoite.