Capítulo 4 (Naino maaficalri namatsicanaa ikjaote corridalritsa nawaopia maatsica)
1
Caaco JLIAJI IMINALRITI Moise irso cayoji:
2
''Picaite njaji inaiki aimadan Iraelnai: ''Pada inaitja cadaa lrimatsicana corri cadanatsa lriomacalreca, lrinaitja cadaa njaji corripetsa Dio inaa inaitjaca, njaji lrifarroji inaitjaca, lrirsotsa lrinatjaca cayoji:
3
Sacerdote cadaa jliaji inaitjalri imatsicanao, lrimenakja maatsídalri inoca nanacojle njaji inaiki aimadan Iraelnai, lrirsotsa lrideeca lrimatsicana ikjaote apana toro pamoyoani toa marsocadalritsa imatsica Dio irso imatsicanaati ikjaote
4
Lrirsotsa lrideeca jliaji toro Dio ipeyajle iwacaaca, carroda ipananoma lricó, lricadaa lricaapi jliwida nacó, njite lriino jliaji toro Dio ipeyajle.
5
Jliaji naniwananda sacerdotewa jlipaotsa lrirrana inacope jliaji maaficalri njite lrideeni nawacaaca-carroda ipananoma lricojle.
6
Jliaji sacerdote jlietaotsa lricaapi írranati ricó lriwitsicá-carro Dio ipjeyajle siete piape, jliaji yofalriwa yamacati idanami, corricawatsa pacapa imatsicanaati.
7
Njite jliaji sacerdote lriarroatsa lrinacope lritsowa nacó jliaji altar namjaitacawa incienso pomení-dalri iitan Dio irso, jliaji
yemalriwa nawacaaca-carroda lricó, njite njaji lritepem toro írranami lriarroatsani lritajida naco jlaji altar namjaitacawa ofrenda, jliaji yemalriwa pjewacawa lrirso jliaji nawacaaca-carrodawa.
8
Lriyoá watsa pjiomi toro iiti lricadanda ofrenda sho lrimatsicana ikjaote, njaji lriiti lriwawalricope, pjiomi njaji lriyapi nacope,
9
njaji lritepe, njaji lriiti lrinapji nacope, lrishopana tsakja. Jlitaotsa lritepe njite njaji lrishopana pjiomi.
10
Lriyoa watsa pjiomina, cayoji lriyoá capisho lrioya jliaji toro ofrenda imaodacakjeti nacoda, njite jliaji sacerdote imjaitaotsa njaji lrinaco jliaji altar namjaitacawa ofrenda.
11
Njite jliaji toro iyami, lripe iitem, jliwida, jlipa, lrishapi, lrimatsicanda,
12
pjiomi njaji toro lrinacope, lrideewatsana pemajle lrioya jliaji yofacawa lrico napiyocawa lrico matsia Norso, naacawa napatja lriwayolremi; icatsa namjaitaca nirsena tiyeena nacó. Narsotsa namjaitacana napatjacawa pjiomi njaji namjaitaji iwayolrepemi.
13
Nanaitja cadaa namatsicanawa padenirri njaji inaiki aimadan iraelitanai corri cadanatsa naomacalreca, njite njaji iwacaaca-capewa corrin naanjí camatsicanaacana nanaitja capoa nanakjoite njaji corriperritsa Dio inaa nanaitjaca, njite caikjaolrenaacana lrikjaote,
14
niini naoca cadaa nají jliaji namatsicanaa, njaji inaiki aimadan narsotsa nainoca apana toro pamoyoani toa ofrendawa namatsicanaa ikjaote njite nadeeni
nawacaaca-carroda ipananoma lrico.
15
Njite njaji pekipenai caconaperri nacadaa nacaapi toro jiwida nacó Dio ipeyajle, njite naino jli toro Lripeyajle.
16
Jliaji naniwananda sacerdotewa jlipaotsa lrirrana inacope jliaji toro njite lrideeni nawacaaca-carroda ipananoma lricojle.
17
Jliaji sacerdote jlietaotsa lricaapi írranati ricó lriwitsicá-carro Dio ipjeyajle siete piape, jliaji yofalriwa yamacati idanam, corricawatsa pacapa imatsicanaati.
18
Njite jliaji sacerdote lriarroatsa lrinacope lritsowa nacó jliaji altar namjaitacawa incienso pomení-dalri iitan Dio irso, jliaji yemalriwa nawacaaca-carroda lricó, njite njaji lritepem toro írranami lriarroatsani lritajida naco jlaji altar namjaitacawa ofrenda, jliaji yemalriwa pjewacawa lrirso jliaji nawacaaca-carrodawa.
19
Jliyoá watsa lrioya pjiomi lriiti njite lrimjaitacaotsana altar nacó.
20
Icatsa lrirsolritsa lrinaitjaca lrisho jliaji toro. Cayotsaji lrinaitja capisho lrisho jliaji toro ofrenda
namatsicanaa ikjaote-dalri, njite jliaji sacerdote lrinoca jliaji maaficalri namatsicana ikjaote njaji inaiki aimadan, nininaotsa Jliyapeta Lrioya namatsicanaa.
21
Njite lrideewatsa jliaji toro pemajle naofacawaq ioya cayotsaji lrinaitja
capisho lrisho jliaji lrinitaana. Icatsa ofrendaca namatsicana ikjaote njaji aimadan
22
Pada talricanaati inaiki irso inaitja cadaa lrimatsicanao corri cadanatsa lriomacalreca, lrinaitja capoa coajidalri catsa nanakjoite njaji Dio ifarrolri inaitjaca, njite camatsicanaani lrikjaote,
23
njite lriaji cádanaco camatsicanaacani, lrirsotsa lrideeca ofrendawa lriinócarro apana cabra atsiana, corri -dalritsa irso imastica.
24
Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle. Icatsa ofrenda imatsicanaati ikjaote.
25
Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji altar.
26
Lrimjaitaotsa pjiomi njaji lrirranapemi altar nacó, cayoji lrinaitja capisho lrisho jliaji maaficalri ofrenda imaodacakjeti nacoda. Sacerdote inoca jliaji maaficalri lrimatsicana ikjaote jliaji talricanaati, icatsa cayoji matsiaca lrimatsicana ioya jliaji talricanaati.
27
Coandalri catsa inaiki inaitja imatsicanao corri cadanatsa lriomacalreca, lrinaitja capoa coajidalri catsa nanakjoite njaji Dio ifarrolri inaitjaca, njite camatsicanaani lrikjaote,
28
njite jliwacatsa yanjí camatsicanaacani, lrirsotsa lrideeca ofrendawa lriinó-carro apana cabra inarrona, corri -dalritsa irso imastica
29
Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle.
30
Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji altar.
31
Lriyoá watsa pjiomi lriiti, cayoji lriyoá capisho lriiti jliaji nainonda ofrenda imaodacakjeti nacoda. Sacerdote imjaitaotsana altar nacó pomení-carro lriitan Dio irso. Sacerdote íno jliaji maaficalri lrimatsicanaa ikjaote jliaji atsia, njite matsiacani lrimatsicana ioya.
32
Lride cadaa apana cordero lri ofrendaniwa lrimatsicanaa ikjaotenadalri, lrideotsa apana inarrona matsini idaki ricó.
33
Lricadaotsa lricaapi jliwida nacó jliaji maaficalri njite lriinoni nainocawa njaji ofrenda namjaitanda Dio ipeyajle.
34
Jliaji sacerdote lripotsietawatsa lricapjiwida lrirranami ricó jliaji maaficalri njite lriñjetaotsa altar itsowa nacó namjaitacawa ofrenda, njite lriarrowatsa pjiomi lrirranami lritajida nacó jliaji
altar.
35
Lriyoa watsa lrioya pjiomi lriiti, cayoji lriyoá capishó lriiti jliaji cordero nainonda ofrendawa imaodacakjeti nacó, njite sacerdote imjaitaotsana nanaco njaji ofrenda Dio iyarrope namjaitanda Lrirso. Jliaji sacerdote íno jkliaji maaficalri lrimatsicana ikjaote jliaji atsia njitenaotsa matsiacani lrimatsicana ioya.