Capítulo 19 (Dio inaikiteca njaji Iraelnai)
1
Caaco JLIAJI IMINALRITI Moise itrso cayoji:
2
''Picaite narso njaji iraelitanai cayoji: '' Irsotsa shenitaacacawa maatsidalri ioya, ima Icacatsa Iminalri Dio-ca Njoa corridalritsa irso imatsicanaa.
3
irsotsa icacoadataca jinirri, njite jidoa tsakja, irsotsa sheepaca iwafetacawa iwafeta carroa lrico. Icatsa Iminalri Dio-ca Njoa.
4
Maomatsa irsowao njaji idolonai miperritsa, manaitja tsakja irsowao tsipalra sho idiotewa. Icatsa Iminalri Dio-ca Njoa.
5
Iino cádanaco maaficalri Dio irso imaodaca kjeti nacó, irsotsa inaitjaca lrirso matsiani lritaitá-carroatsa lricoadatacani.
6
Irsotsa iñjacani jliadatsa inocani o tjewaijlena. Njite niini cada pjatoa lriitemi madalridaa nacojlena, irsotsa imjaitacani.
7
Iñja cadani madalridaa naco pjatoa, opina maatsini. Corrinatsa itaita icoadatacani.
8
Mitsa coca cadaa iñjani lrirsotsa lrideeca lrimatsicanaatsa lrinacoa ima lrimacoadataca jliaji njenitanda piatsa Dio irso. Irsotsa ipeecoca ioyawani wadee lriofacatoa iinai.
9
Iniwa cádanacoatsa ipanai iinaca yapananda jipaite ricó, maniwatsa pjiomi njaji lrinomapi ricoperri, wadee iniwa tsakja pjiomi njaji jiwacaperri ioya.
10
Maniwatsa pjiomi nainica njaji ipania ova, njaji jiwacapemi icadenana, maniwatsana. icadaotsana napia njaji kjenaperri njite narso njaji tekjoiteperri ínoca. Icatsa Iminalri Dio-ca Njoa.
11
Mañaitotsa. Macashatatsa. Macashatatsa irsowaaca.
12
Ma Diotatsa Noipitana nacó ishati mikjapantsa, mamatsiketatsa IMINALRI Dio iipitana. Icatsa Iminalri Dio-ca Njoa.
13
Mainoetatsa picodapídalri piñaitócarro lriyarro. Lridejicalre icoada jliaji piinaida idejica pirso pirsotsa picaoñacani jliadatsa, wadee picaoñaca tjewaijleani.
14
Corrin pitaita picaiteca yácoti maatsiperritsa mjenacolricodalrim nacó, corrin tsakja pitaita picadaaca jiipada matjidalrim ipia jliwácarroa. Icaamitsa pirsotsa pifiocawa Dio iiwana. Icatsa Iminalri Dio-ca Njoa.
15
Macaitetsa ishatitsa pada nacó. Mamenatatsa apada kjena capoatsani, corrin tsakja picaiteca matsia pada nacó caconaadalri capoatsani. Mitsa, picaite cadaa picodapidalri naco, picaite ajádalri naco.
16
Majitsa picaitepenji ishati tsa piofawenai irso, mitsa, pirsotsa piwapaca jliaji picodapídalri wadee nainocani. Icatsa Iminalri Dio-ca Njoa.
17
Merroatsa picapaca pikitsinda irso picaolre rikjoite. Caacoatsa pjia kjaida matsiacalri ricó picodapidalri irso lrimatadanda ikjaote wadee pacoaca capjia lrimatsicana nacó.
18
Maomatsa picoadawa, corrin tsakja pimatsietaca irroati pinacoa piofacawerri ikjoete, matsia pja pipeyoca jliaji picodapidalri cayoji pipeyoaca capishó pjiwacawaacatsa. Icatsa Iminalri Dio-ca Njoa.
19
Irsotsa inaitjaca cayoji noaco icaite capisho. Makewitatsa nanaikica njaji maaficalri apaana maaficalri yapiya. Makewitatsa njaji paniati ishí yapana cádanaco jipaite ricó. Manaitjatsa itsayaniwa aipaperri ioyawaaca yamacati.
20
Coca cadaa idakita apama irsodarro yempeti toa yapiya roinirriope iweñandena, mitsa corridarrotoa lricaoñandacano lricadaa carroena roawa jliaji rominalri, irsotsa jirrapiteetaca jliaji atsia inaitjalri rorso maatsi. Njite corrin itaita ínoca rsoaji inarro ima rominalri inaidarro catoano.
21
Pada atsia irsotsa ideeca lri-ofrendaniwa apana carnero lrimatsicana ikjaote iwacaaca carroda ipananoma lricó. Ofrenda lrimatsicanaa ikjaotedalri.
22
Njite jliaji sacerdote ipiyoatsa lrioya lrimatsicana lrinaitjalri lrisho jliaji carnero ofrenda lrimatsicanaa ikjaote Dio ipeyajle. Niininaotsa matsiacani naoya njaji imatsicanaati lrinaitjaji, icaamitsa njeyapacawa lrioya.
23
Sheewa cádanacoenaotsa jipaite ricó njite yaapana pjiomi paniati paiñjanda iinaca, njite cainaca cádanaoenana corri toatsa itaita carrocatoa iñjaca nainaca.
24
Madalriwalria watsa corricawa itaita iñjaca nainaca. Mitsa coatro walria nacoena shenitaotsa njaji nainica, paana ofrenda iashopa matsiadalri Dio irso.
25
Njite cinco walria nacoena itaitena iñjaca ipania iinaca, iwapa capoa wiá aimaotsa nainaca njaji ipania. Icatsa IMINALRI Dio-ca Njoa.
26
Corrin itaita iñjaca maaficalri iipe kerranadalritoa. Matatjatsa malrirrinai iinai coajicaotsa ipeya, njite corrin tsakja itaita imanalrietaca pada iwaopiakje malrirricalri ricó.
27
Manaitjatsa nacayosho njaji apana inaiki maatsiperri, njaji jirritacape natsicolre njeeni icaoperri, o nayoaca natsinoma iwaipoco.
28
Mayoatsa idada nacó mayamperrimi ikjaote o idanaca njenapjiami idada nacó. Icatsa IMINALRI Dio-ca Njoa.
29
Mamacadawalretatsa iitonaipe icaaacarrona cawilreperrim shó, njitenantja cawilre tsakja njaji inaiki naikjaote njite napakjantanta jalredaoca imatsicanaati shó.
30
Irsotsa iwafetacawa iwafeeta carrodaa lricó inaitjá-carro matsia iwacaaca-carroda lrico. Icatsa IMINALRI Dio-ca Njoa.
31
Maatsa naikjaore njaji caacoperri napiya njaji mayamperrimi o icaojleti iinai. Maomatsana ima namatsiketa caotsa sha. Icatsa IMINALRI Dio-ca Njoa.
32
Irsotsa jinicoca yemawa lripeyajle jliaji pekirrina, irsotsa icacoadataca njaji pekipenai. Irsotsa ifiocawa Dio iwana. Icatsa Iminalri Dio-ca Njoa.
33
Pada tekjoite-dalri iofá cadaa ipecolrico jipaite ricó, manaitjatsa maatsi lrirso.
34
Irsotsa icapaca lrirso jliaji tekjoite-dalri ikitsinda iraelita shotsa jiico capisho jipaite ricotsa, yofacada iinai, irsotsa ipeyocani ipeyoaca capishotsa jiwacawaacatsa, ima tekjoité-perri poiaca sha Egipto jipaite ricó. Icatsa IMINALRI Dio-ca Njoa.
35
Macashatsa iwi cadanacoatsa jliwalripaca, jlimiñaca, o lrimaimaca.
36
Irsotsa irsoca matsiaperri njaji jimiñatashopa, iwishopa njamiñaca, iwishopa namaimaca matsiaperri. Icatsa IMINALRI Dio-ca Njoa.
37
Irsotsa shepaca
noaco, pjiomi njaji yácoti kjaidaperri irsitsa inaitjaca. Icatsa IMINALRI Dio-ca Njoa.