Capítulo 14 (Coajica nanaitjaca matsiá-carro njaji catserreperrim)
1
Caaco JLIAJI IMINALRITI Moise irso, lriaco:
2
''Cayoatsa njaji yácoti kjaidaperri nanaco njaji inaiki irsocape natserre jálreperri nadada nacó jliadaa jécoapi matsia kenana. Lrirsotsa lriacawa sacerdote ikjaolre.
3
Jliaji sacerdote imotoatsa naofacawa ioya lricapá-carro matsia kena jliaji inaiki irsocada pia iyamikje capoadalri lridada nacó.
4
Njite jliaji sacerdote inaa watsa jliaji carrenaadalri pia lrid-carro yamaapa caafiperri yarracapeo matsiaperri, jaico cedrona, tawalrekja írraikjai njite paniatida pomenidalri iitan.
5
Sacerdote inaa watsa lriinó-carro apaapa nanakjoite njaji lrideji ooni matsiajai ricó yarropetida lricoda.
6
Njite jliaji sacerdote jipaotsa caafitsa jliaji wipjiarro lridenda, jaico cedrona, tawalrekja írraikjai njite paniatida pomenidalri iitan, njite lriapjoeta caotsa pjiomina lrírranam lricó jliaji wipjiarro lrinonda ooni matsiajai ricó.
7
Njite sacerdote iwitsicacaotsa siete piape lrinaco jliaji inaiki icotsoaca cadawa lrirrena ioya, njiteotsa sacerdote icaiteotsa lrinaco matsiadalri kenani. Njite sacerdote icadaotsa lriawa jliaji wipjiarro caafitsa awacada lricojle.
8
Njite jliaji carrená-dalri pia lricotsoatsa njaji lritsayani, lritsicolre, njite lripitaotsa ooni ricó matsia, niininaotsa matsia kenani. Njitenaotsa lritaita jliewacawa naofacawa lrico, mitsa corritoatsa lritaita jliewa catoa lripanaita lricó, lriofatoatsa pemajle lrioya siete jalredaoca.
9
Ocho jalredaoca nacó lriyoá watsa lricolre, jlirritaotsa lritsinoma njite lritjiweyo. Lrirsotsa jlirritaca lrioyawa pjiomi lridada íyo, lrirsotsa lricotsocacawa ooni ricó, lricotso lritsayan pjiomi; njite dekjenaotsa matsiani.
10
Ocho jalredaoca nacó lrirsotsa lrideeca yamana cordero atsiana matsiani petsa, apana cordero inarrona pada oniadarro ipekirrica, matsiani tsa, once kilo harinape matsiadalri aceite fiedalri ofrenda paniati inaca nacoda, njite pada taza aceite tsakja.
11
Jliaji sacerdote idejirri matsiá-carro jliaji inaiki, lricadaotsa lriemao jliaji inaiki nacodapi njaji lriderri Dio ipeyajle nawacaaca-carroda ipananoma lricó.
12
Jliaji sacerdote jipaotsa apana cordero atsiana lriinó-carro ofrenda lrimatsicanaa ikjaote, njite lricadaa tsakjaotsa jliaji aceite, jlirretaotsa jliaji ofrenda ima ofrenda njerretandaca Dio ipeyajle.
13
Lrirsotsa lriinoca jliaji cordero atsiana nainocawa njaji ofrenda namjaitaoda imatsicanaati ikjaote, nawaaca-carroda lrico, njite jliaji ofrenda imatsicanaati ikjaote lriyadacan jliaji sacerdote, cayotsaji lricayosho jliaji ofrenda caikjaolrena cádanacona, ima njenitandaca matsiadalri shó.
14
Sacerdote jipaotsa irranati inacope lriñjetá-carro jlieni rico jliaji inaiki imatsietacalriwa lrimatsicana ioya, lriñjeta tsakjaotsa lricaapjiwida makjewi nacó, njite jliipjewida makjewi nacó tsakja atsialriema-perri.
15
Njite sacerdote yarroatsa jliaji aceite taza lricoda lricaapi inarroema lrico,
16
njite lriapjoeta watsa lricaapjiwida atsialriemadalri aceite ricó inarroema lricodalri, njite lriwitsicacaotsa lrinacope lricapjiwida sho siete piape Dio ipeyajle.
17
Njite sacerdote jipaotsa aceite inacope lricaapi ricó njite lricaotsani jlieni ricó atsialriemadalri jliaji atsia imatsietaaca cádawa lrirrena ioya, lricadaa tsakjaotsa lricaapjiwida nacó makjewi njite lriipjewida makjewi naco tsakja atsialriema minitsa pjiomi. Lrirsotsa lricadaaca jliaji aceite lrinaco jliaji írranati ofrenda nacoda imatsicanaati ikjaotedalri.
18
Jlite lriitepem jliaji aceite, sacerdote icadaotsani jliwida nacó jliaji ipiyoacalriwa lrirrena ioya, njite sacerdote ipiyoatsa lrimatsicana Dio ipeyajkle.
19
Njite jliaji sacerdote icadaotsa jliaji ofrenda imatsicanaati ikjaote njite lripiyoatsa lrimatsicanaa lrioya jliaji imatsietaacalriotsa lrirrena ioya, lriino cayami jliaji ofrenda namjaitanda.
20
Njitena sacerdote ideotsa jliaji ofrenda namjaitanda njite jliaji ofrenda napania ínaca inacope altar nacó. Sacerdote ipiyoatsa lrimatsica jliaji inaiki, ikenaotsa matsiakenani.
21
Mitsa, kjenadalri cadatsa jliaji atsia njite corrin lricoa lrirso lriinó-carro njaji maaficalri, lrirso peda lrideeca apana cordero atsiana ofrenda shó lrimatsicanaa ikjaotenaadari jlirretá carroni, lripiyoacá-carroa lrimatsicana ioya lriwaca-waacatsa, njite lridee tsakjaotsa yamada kilo harinape matsiapedalri aceite fieda ofrenda shó napania iinaca nacoda, njite apjeco aceite,
22
lridee tsakjaotsa yamapa potocadape o yamaapa tsootsobo yénipe, njaji lritaitajitsa lrioketaca; apaapa nanakjoite lrimatsicanaa ikjaotenaadalri, njite jliaji apaapa ofrenda lrimjaitaoda watsa.
23
Ocho jalredaoca nacoatsa lrirsotsa lrideecana sacerdote irso lripiayoaca shopawa, nawacaaca-carroda ipananoma lricó, Dio ipeyajle.
24
Njite sacerdote jipaotsa jliaji cordero ofrenda icaonada, njite jliaji aceite olivape, njite jlirretawatsana yénonrse Dio ipeyajle.
25
Njite lriinoatsa jliaji cordero ofrenda imatsicanaati ioyadalri, njite jlitaotsa lrírrana nakjoite njite lricadaotsa jlieni ricó jliaji ipiyoacacadawa, lricaapjiwida makjewi nacó njite jlipjewida makjewi nacó tsakja, atsialriema minitsa pjiomi.
26
Njite sacerdote yarroatsa aceite inacope lricaapi inarroema lrico,
27
njite lriapjoeta watsa lricaapjiwida atsialriemadalri aceite ricó inarroema lricodalri, njite lriwitsicacaotsa lrinacope lricapjiwida sho siete piape Dio ipeyajle.
28
Njite jliaji sacerdote icadaotsa aceite inacope lricaapi lricoda jlieni ricó jliaji ipiyoacacadawa, lricaapjiwida makjewi nacó njite jlipjewida makjewi nacó tsakja, atsialriema minitsa pjiomi, atsa lriñjeta nanaco minatsa lriñjetacawa irranati imatsicanaati ikjaotenaadalri.
29
Njite jliaji lriitepem jliaji aceite lricadaotsa jliwida nacó jliaji ipiyoacacadawa lripiyócarroatsa lrimatsicanaa lrioya Dio ipeyajle.
30
lrirsotsa lrideeca apaapa nanakjoite njaji potocadape o tsootsobo yénipe, njaji lritaitajitsa lrioketaca
31
apaapa, ofrenda lrimatsicanaa ikjaote njite jliaji apaapa ofrenda lrimjaitanda, nainaitsa njaji ofrenda paniati ínaca nacoda. Njite sacerdote ipiyoatsa lrimatsicanaa jliaji ipiyoaca cádawa Dio ipeyajle.
32
Icatsa njaji yácoti kjaidaperri naicaoda njaji inaiki irsocape itserre capoa-perri nadada nacó, njaji corrí-perri itaita icaoñaca maaficalri napiyoaca shopawa.''
33
Caaco JLIAJI IMINALRITI Moise irso njite Aarón irso, Lriaco narso:
34
Ioca cádanacoenaotsa Canaán jipaite ricojle, jliaji nocadanda irso, njite nocada cadaa donirroca iipana lriricoda jliaji jiipai nocadanda irso,
35
jliaji panti iminalri lrirsotsa lriaca lricate lrinaco sacerdote irso. Lricaiteotsa cayoji: ''Donirroca paají jliaji noopana.''
36
Njite jliaji sacerdote inaa toatsa namotoca lrioya jliaji panti lripeya jliewaca lricapa lridonirroca jliaji pantí, wadentja maatsica pjiomi njaji panti-ricope. Jliapodamina sacerdote sheewawa pani ircó lricapá-carro.
37
Lriomaotsa lricapa matsia nerrocadawa panti iwai nacó njaji nonirró-perri, jipolré -perri cadana o irraipishia cadaana nerrocawa pantiwai nacó.
38
Njite lrirso cadaa lridonirroca jliaji panti sacerdote imotoatsa lrioya
njite lriitaca panti-ipananoma siete jalredaoca.
39
Ocho jalredaoca shapodam sacerdote idia tsenakjaotsa icapa jliaji panti lripocotá cadawa jliaji lridonirroca lriwai nacó jliaji panti.
40
Njite cay- cadaa, sacerdote inaa watsa njetaca jliaji jiipada nerrocawa njaji maatsiperri napeecó-carro pemajle lrioya jliaji nayacalre napeecocawa njaji matsiperri.
41
Narsotsa njerritaca panti-iwai idaa, njite njetaotsa jliaji maatsidalri irrocawa njerritandena nadee-carro napeeco pemajle lrioya jliaji yacaalre napecocawa njaji maatsí-perri.
42
Njite nerroetaotsa paana jiipada walriperri nárrontacao njaji maatsiperrimi, njite nadaata tsenakjaotsa jliaji panti caalri walriperri shó.
43
Njite donirro cadaa lripieta jliaji panti-iwai namatsieta cayami piena pjiomi jliaji panti,
44
sacerdote idia tsenakjaotsa shewawa panti lricó
lricapá-carro napocota cadawa njaji panti idonirroca. Cayo cadaa, ikenaotsa lrijica maatsídalrica jliaji imotolriwa panti nacó, nininaotsa maatsidalrica jliaji panti.
45
Narsotsa napeecoca jliawawa jliaji panti. Njite narsotsa nadee napeeco pjiomi njaji lrinacoperri jiipada, jaico, pjiomi njaji nacaalrita shopami pemajle lrioya jliaji yacaalre napeeco cawa lrico njaji maatsiperri.
46
Coca cadaa sheewawa lri-ricoda jliaji panti sacerdote inaa caojli piatoa naitacani maatsi catoani atee dainoma nacojle.
47
Njite cocadaa imaa lri-ricoda jliaji panti lrirsotsa lricotsoca lritsayani, caitsakja jliaji ijacada pia lri-ricoda jliaji panti lricotsoca lritsayani.
48
Sacerdote sheewa cadaa lri-ricoda jliaji panti lricapá-carro corri ketsa pacapa lrimatsica jliaji panti nadia cayami namatsietani, njite corri cadetsa pacapa, nininaotsa lricaite matsia kena jliaji panti.
49
Njite sacerdote irsotsa jipaca yamaapa wipjiarro lripiyoshopa jliaji panti, jaico cedrona, tawalrekja írraikjai njite paniati papocodalri.
50
Lriinoatsa apaapa nanakjoite njaji wipjiarro ooni matsiajai caalriapi ricoda.
51
Jlipaotsa jliaji jaico cedrona, tawalrekja írraikjai, njite jliaji wipjiarro cafiaparro, njite lriapjoetaotsana roirrana lrico jliaji wipjiarro lrinonda, ooni matsiajai lricoda, njite lriwitsicaca siete piape panti nacó.
52
Lrimatsiteaotsa jliaji panti wipjiarro írrana shó njite ooni matsiajai shó, wipjiarro cafidarro shó, jaico cedrona shó, paniatida poco njite tawalrekja írraokjaidalri.
53
Mitsa lricadaotsa roawa rsoaji wipjiarro cafiaparro pemajle lrioya jliaji yacaalre awacada lricó. Icatsa lrinaitjaca cayo lripiyó-carro jliaji panti, njite ikena matsiacani.
54
Icatsa yácoti kjaidaperri nanaco njaji ipoati capoaperri nadada nacope njite njaji imalri mana weecana nadaki nacó,
55
tsaya nacó cadaa njite panti nacope,
56
íshacadao, caacaiperri naco, njite itserreti jaalré-perri,
57
inaitá-carro yají maatsidalri cada jliaji narsolri njite coanca matsiakenani lrimatsica ioya lridada nacoda o paiti-iwai ioya.