Capítulo 1 (Njaji maaficalri namjaitaope matsia)
1
Dio iwana Moise nawacaaca-carroda lrikjoite, lriaco lrirso:
2
''Picaite narso njaji Iraelnai cayoji: ''Pada inakjoite idee cadaa ofrenda Dio irso nanakjoite njaji ípirra, o ivacan cadaa.
3
Apana vaaca imjaitanda cadaa jliaji iofrendani, lrirsotsa lriaca apana vaaca atsiana corridalritsa irso imatsica. Lrirsotsa lrinaitjacani pjewacawa lrirso jliaji nawacaacacarrodawa, Dio itaitá carroatsa icoadatani.
4
Lrirsotsa lricadaaca lricaapi jliwida nacó jliaji maaficalri lrimjaitanda, niniotsa cacoadaca lrirsoni lrimatsicana ikjaote.
5
Njite lrirsotsa lriinoca jliaji toro Dio ipeyajle. Njaji sacerdotenai, Aarón yénipe, nadee lrírranapemi njite nawitsica-cana lrinaco jliaji altar yemalriwa lripananoma jiaji nawacaacacarrodawa.
6
Njite lrirsotsa lricólraca lriyam jliaji ofrenda lrimjaitanda njite lriyoatsani pawajlepeni.
7
Njiteotsa njaji sacerdote Aarón yénipe nawacaotsa tiyé altar nacó, njetaotsa tiyeena kerrá-carro jliaji tiyé.
8
Njaji sacerdotenai, Aarón yénipe, nacadaotsa njaji nacadowaji pawajlepe, jlwidam njite lriiti. Nacadaotsa naorsoawa matsia nanacowaaca tiyeena kerraperri nacó alatar nacope.
9
Njite njaji lrisapikjape njite njaji lricotsipami narsotsa njepacani ooni shó. Njite njaji sacerdotenai namjaitaotsa pjiomi njaji altar nacope ima ofrenda namjaitandacani. Matsiawatsa noajica lriitan; pada ofrenda namjaitanda Norso tiyéricó.
10
Ípirra nakjoite cadaa jliaji ofrenda, oveja cadaa o cabra cadaa, lrirsotsa icadaa apana atsiana marsocadalritsa imatsikje.
11
Lrirsotsa lriinocani atsialriema nacojle lrirso jliaji altar Dio ipeyajle, njaji sacerdotenai, Aarón yénipe, nawitsica caotsa lrírranapemi sho altar naco padenirri.
12
Njite narsotsa nacadowaacani, jliwida fie njite lriiti tsakja, njiteotsas njaji sacerdotenai nacadaotsana tiyé kerraperri nacó, altar nacope.
13
Njite njaji lrishapikjape njite njaji lricotsipami narsotsa njepacani ooni shó. Njite njaji sacerdotenai nacadaotsa pjiomina, njite namjaitaotsana altar naco. Ima ofrenda namjaitandaca. Matsia watsa lriitan Dio irso; pada ofrenda namjaitanda lrikjaote Norso tiyé ricó.
14
Njite yaa cada iofrendani nanakjoite njaji yarrajicape imjaitanda Dio irso, irsotsa ideeca Lrirso apapa potooca o apapa tsootsobo walriapalritoa.
15
Jliaji sacerdote lrirsotsa lrideecani altar nacojle, jlipaotsa pokjomi lrinorsiapji, njite lrimjaitani altar nacó. Njite lrírranapemi lrirsotsa lriarroca altar
icodapi.
16
Lrirsotsa jlitaca lrioya lriñjañjiarroda pjiomi lriitada yaapiya, njite lripeeconi jérri imotokemajle lrirso jliaji altar, lripatjacawao njaji tiyepokjoa.
17
Lrirsotsa lrimjecocani lripje nakjoite, mitsa corrin lritaita lricadowaacani pjiomi. Ikena dekja jliaji sacerdote lritaita lrimjaitacani nanaco njaji tiyena kerraperri altar nacope. Ima ofrenda namjaitandaca. Matsia watsa lriitan Dio irso; pada ofrenda namjaitanda lrikjaote Dio irso tiyé ricó.