Capítulo 7

1 Wa-Minalri iaco Noé irso: Pjiewenawa lancha lrico njite njaji piipaneta tsakja, ima nocapaca mamatsicanaadalrica pjia Nopeyajle njaacoma ipecolrico njaji inaiki. 2 Nanakjoite njaji maaficalri matsiaperri piorrocoetaotsa piinaiwa sietena atsiana njite sietena iinarrona. Njite njaji maaficalri corriperritsa matsiaca, yaamanape tsaotsa piorrocoetaca, atsiana njite iinarrona. 3 Njaji wipjiarro iarrajicape eeno iekjoete naco, piorrocoetaotsa sieteapa atsiapa njite sieteapa inarroapa, manacó-carroatsa njaji nanakjoite-perri jalredaoca lrico. 4 Ima siete jalredaoca naco nocaotsa iiyao jiwacawa jiipai nacojle. Iiyaotsani coarenta jalredaoca njite coarenta deepi tsakja. Nowayaketaotsa jiipai lricoperri pjiomi njaji caafiperri nonaitjaji.'' 5 Noé inaitja pjiomi njaji Dio inaalri lrinaitjaca. 6 Noé irsopiakena seiciento oonia jlieta caojli pia jliaji jalredaoca. 7 Noé, njaji lrienipe, Noé iino, lrirrinonaipe njeewawa lancha lrico padenirri ima ooni sheteetaca-na. 8 Njaji maaficalri matsiaperri njite njaji maaficalri corriperri matsiacana, njaji wipjiarro, pjiomi njaji yaacapewa nawawa sho jiipai nacojle, 9 njerracawa yaamadapewa Noé iinai njeewá-carro lancha lrico, Cayotsa Dio inaa capirso pia Noé inaitjaca. 10 Niini siete jalredaoca shaapodam, ooni sheeteta kena jliaji jiipai. 11 Seiciento oonia nacó Noé shaawajli, yaamapi kerri naco pawalria iniitacarropi naco, diecisiete jalredaoca naco, jliadatsa jalredaoca-ca pjiomi njaji ooni macapeki jiipai ricope namjecoacawa, njite eeno imjecoacawa tsakjao. 12 Ikena iiyao iinita jiwacawa jiipai nacojle coarenta jalredaoca njite coarenta deepi. 13 Njite jliadatsa jalredaoca Noé njite njaji lrienipe, Noé iino, njaji lrirrinonaipe njeewawa lancha lrico. 14 Njewawa pacoacatsa nainai njaji maaficalri awacada lricope nacoamitsa, cayo tsakja njaji vaaca teecojle-perri naoyawaaca, caitsakja njaji maaficalri yajicapewa nawawa sho jiipai nacojle, coshoca naoyawaaca, cai tsakja njaji wipjiarro coshoca naoyawaacana, pjiomi njaji wipjiarro teecojleperri naoyawaaca. 15 Yamadape pjiomi njaji caafiperri caolri sho njerrawa Noé iinai lancaha lrico. 16 Njaji maaficalri jirralriwa apana atsiana njite apana iinarrona nacoanamtsa njaji maaficalri; Njerrawa cayotsa Dio inaa capirso. Ikena Dio iitaca jliaji pantinoma njeewa cayamiwa. 17 Coarenta jalredaoca shaapodam jlietawa jliaji jiipai ooni sho, lrimotawa jliaji ooni njite lritamo tsakjawa jliaji lancha jiipai ioya. 18 Ooni iita pjiomi jiipai, njite lancha itamowa ooni yeecoa naco. 19 Ooni itaoñawa pekirritsa jiipai naco niini pjiomi njaji jiipana yenomperri eeno yapjiteperri ooni iita pjiomina. 20 Ooni imotawa sei metro pja naicao njaji jiipana yenonperri. 21 Pjiomi njaji caafiperri yajicapepiawa jiipai nacojle mayamicana: wipjiarro, vaaca, maaficalri awacada lricoperri, njaji maaficadalridape aimaperri yajicapewa, njite pjiomi njaji inaikinai. 22 Pjiomi njaji caafiperri yofacapepiawa jiipai rico, njaji jirsaacapepia icaolrewa njetaco lrico, mayamina. 23 Niini pjiomi njaji caafiperri yajicapepiawa jiipai nacojle oopi nawayacawa, inaiki nakjoite njite njaji maaficalri macanipe, pjiomi njaji yajicapewa nawawasho tsakja, njaji yarrajicapewa tsakja. Padeenirri nawayacacawa. Icaamitsa Noé njite njaji lriinaiperri, icaamitsa njaji yomjerri. 24 Ciento cincoenta jalredaoca lrirrocawa jliaji ooni jiipai naco.