Capítulo 8 (Dio jirrapiteeta njaji egipcionai)
1
Njite caaco tsenakja wa-Minalri Moise irso, ''Pia picaite Faraón irso cayoji: Picadaa naawa njaji nonaikite aimadan nácarro naa Norso matsiadalri.
2
Corri cadaa picadaa naawa, Nomatsiketa caotsa pjiomi pjipaite paitsi shó.
3
Pakjamiotsa ooni paitsi shó. Njenicoatsa njite iipana lricojle, imaacawa lrico, pjiomi iamaki ricó. Njeewa tsakjaotsa irsoperri iipana lrico. Cayo tsakjaotsa pjiomi njaji inaikite, iyanacawa lrico, ipalangana lrico tsakja inaitja shopa injao.
4
Nanaitjaotsa maatsi pirso njaji paitsi, coshoca narso njaji pirsoperri.''
5
Wa-Minalri iaco Moise irso: ''Picaite Aarón irso: Pipiajleta picaapi njite jliaji pjiecote naikjaolre njaji ooni macapeki, oonipaokja nacojle, ooni nadanatanda nacojle, paitsi imotó carroatsa Egipto jipaite nacojle pjiomi.
6
Ikena Aarón ipiajletaca lricaapi naikjaolre njaji ooni Egipto lricope njite paitsi imaimaca jinicoa ooni rikjoite njite napakjantaacawa pjiomi Egipto ijipaite ricó.
7
Mitsa njaji malrirrinai nanaitja tsakja cayo namalrirrica sho: nacadaa paitsi imotoa Egipto ijipaite nacojle
8
Njite Faraón iwana lrikjaolre Moise njite Aarón, lriaco narso: ''Itatjá Dio iinai jlitá-carro nooya njite naoya njaji nonaikite nja paitsi. Njite dekjaotsa nocadaa naawa njaji inaiki aimadan, nácarro naino Lrirso maaficalri.
9
Moise iaco Faraón irso: ''Pjia irso matsiacalri picaité-carro norso coancaojlica pioma notatjaca Dio pinaco, pirsoperri inaco njite njaji pinaikite, Jlitá-carro nja paitsi pioya, piipana ioya njite nadiá-carro naofawa ooni ricojle.
10
Njite Faraón iaco lrirso: ''Tjewena.'' Moise sheepani: ''Cayo pedaotsa picaite capishó, pitaitá carroatsa pianjíi corrica pacapa apada lricayosho jliaji wa-Minalri Dio.
11
Naawatsa pioya njaji njaji paitsi, piipana ioya njite naoya njaji pinaikite. A tsaotsa naofawa ooni ricó.
12
Moise njite Aarón nadiá namotoa Faraón ioya. Njite Moise itatjaca Dio iinai nanaco njaji paitsi Lricadaaji Faraón irso.
13
Moise inaitja cayoji wa-Minalri inaa capishoni: Mayami njaji paitsi naapana lrico, talricanaati dapana lrico macada awacada lrico.
14
Njaji inaiki nawaketana aima shó njite eecoca pjiomi jliaji jiipai.
15
Mitsa Faraón icapa cádanaco matsia kena pjiomi, lritarrata lricaolre njite corrin jlimi Moise irso njite Aarón, cayotsa Dio icaite capisho.
16
Wa-Minalri iaco Moise irso: Picaite Aarón irso: pipiajleta pjiecote njite piñaawatsa jiipai italre nacojle napadama carroatsa tothonwa pjiomi
Egipto ijipaite nacojle.''
17
Njite nanaitja cayó: Aarón ipiajleta lricaapi njite jliecolre. Lriñá jiipai italre nacó. Naocawa tothon nanaco njaji inaiki njite nanaco nja maaficalri. Pjiomi jiipai italre ipadamao tothonwa pjiomi Egipto ijipaite nacojle
18
Njaji malrirrinai naoma tja nanaitja tsakja tothon namalrirrica shó, mitsa corrin nataita. Aima pia tothon nanaco njaji inaiki njite nanaco njaji maaficalri.
19
Njaji malrirrinai naaco Faraón irso: ''Dio jiidatsa jliaji.'' Mitsa tarraca Faraón icaolre naoya, corrin lrioma jlimica narso. Cayotsa Dio icaite capisho Faraón inaitja caotsa.
20
Wa-Minalri iaco Moise irso: ''Pia watsa tjewa
piyompinaco Faraón iderse lria cadanacoatsawa ooni canjerse. Picaite lrirso: Cayo lricaiteca wa-Minalri: ''Picadaa naawa njaji Nonaikite nácarro naa norso matsiadalri.
21
Corri cadaotsa picadaa naawa njaji nonaikite aimadan, Nomeenacaotsa pikjaolre dolrio imaimaca, pinaikite nacojle naapana lricó. Pakjamiotsa dolrio imaimaca egipcionai iipana lrico, njite pakjamiotsana dolrio sho pjiomi Egipto jipaite ricó.
22
Mitsa jliadá watsa jeecoapi, nowapaotsa jliaji jiipai Gosen, jliaji jiipai naofalri irricoda njaji nonaikite aimadan, corriotsa dolrio imaimaca iocacawa nanacojle. Nonaitja cayó yají-carro Njoaca IMINALRITI iofalri lri-ricoda jliaji jiipai.
23
Njoenitacaotsa njaji nonaikite naoya njaji pinaikite. Tjewenaotsa icapa jliaji nonaitjalri Njoida shó.''
24
Wa-Minalri inaithja cayo, njite aima dolrio iocawa Faraón iipana lricojle, njite lrirsoperri iipana naco tsakja. Pjiomi Egipto jipaite ricó pakjanca dolrio shó, njite namatsikeetaca jliaji jiipai namaimaca shó.
25
Faraón iwana Moise njite Aarón lrikjaolrewa, lriaco narso: ''Warsena iawa inó-carro maaficalri Dio irso fepaite ricó.''
26
Moise iaco lrirso: ''Cotsa matsialrica waso wanaitjacani atsaji, ima waino cadaa maaficalri wa-Minalri Dio irso cotsa matsialrica icapacan, shá Egipto lricope, corrin waoma iinoca faa jiipada shó lrikjaote.
27
Corrin, madalridaa watsa jécoapi waacawa jalapocolri ricó, nirse watsa waa waino maaficalri wa Diote irso, ima coyoca Lrinaa wanaitjaca.''
28
Faraón iaco shepacan: ''nocadeniotsa iawa iácarro íno maaficalri IMINALRI Dio irso jalrapocolri ricojle. Corriotsa itaita iacawa teecoa njite itatjawatsa Dio nonaco.
29
Moise iaco lrirso: ''Nomoto catsaotsa pioya notatjaotsa Dio pinaco naa carroatsa pioya nja dolrio imaimaca, pioya pjia Faraón, pirsoperri njite njaji pinaikite tjewena. Mitsa corrin nooma picashataca fá wadentja corrica picadaa waacawa wainó-carro maaficalri Dio irso.
30
Moise imoto Faraón ioya njiyte lritatja Dio lrinaco.
31
Dio inaitja cayoji Moise itatja capisho lriinai. Lricadaa naawa njaji dolrio imaimaca Faraón ioya, lrirsoperri ioya njite lrinaikite ioya tsakja. Corrinatsa coca pacapa.
32
Mkitsa Faraón itarrata lricaolre tsenakja, corrin lricadaa naawa njaji inaiki aimadan.