Capítulo 1 (Njaji Jacob inakjoité-perri Egipto lricó)
1
Icatsa neepitanaca njaji Irael yénipe inolri Jacob iinai Egipto lricojle, nacoanamitsa naapaneta yaapiya:
2
Rubén, Simeón, Leví, Judá,
3
Isacar, Zabulón, Benjamín,
4
Dan, Neftalí, Gad njite Aser.
5
Setenta namaimaca padenirri njaji inolri pia Jacob iinai Egipto lrico. Njite José icoadatana Egipto lricona.
6
Mitsa José, lripjerrinaipe njite pjiomi njaapoco oopi mayamicana.
7
Aima neenipe njaji Iraelnai, namaimataacawa aimasho njite kjaidá-perricana; napakjanta jliaji jiipai naofalri ninio.
8
Njite padenakja talricanaati walridalri ínita iytalricanaataca Egipto lrico, pada corridalri piatsa yají José nacó.
9
Niini lriaco narso njaji lrinaikite: ''Icapa, njaji Iraelnai aimadancana njite kjaidaperri pjaaca waoyana.
10
Panaya, warsotsa wapaca coajica wanaitjaca naapiya ima namaimataacacawa kjeyao, wadeetsa wacoema ino íino fa njitentja nemaca wakjoete wacoema yapiya njitentja naawa lrioya jliaji fepaite.''
11
Ikena nacadaaca naapiyawelreo njaji iraelitanai njerrapiteeta carrona idejikjeti kjaidaperri sho. Njaji Iraelitanai nanaitja lriyacalreo jliaji Faraón. Nanaitja jliaji yacaalre Pitón njite Ramsés.
12
Mitsa njaji iraelitanai corrin yamica namaimataacacawa. Niini njaji egipcionai nafioca naiwana njaji iraelitanai.
13
Egipcionai icadaa nadejica kjaida njaji iraelitanai.
14
Nacadaa njerrapitaca pekirritsa idejikjeti sho. Nacadaa nanaitja nerroeta shopao ladrillo njite nanaitja tsakja ladrillo. Nanaitja tsakja idejikjeti idejikjeti kjaidaperri nakinkerre ricó. Pjiomi jliaji idejikjeti nanaalri nanaitjaca, idejikjeti jamiñaérricana.
15
Niini jliaji talricanaati Egipto lricoda icaite narso njaji iwapacape keenipeca njaji hebreo tadoanaipe; Sifra roipitana rsoaji apama njite Puá rsoaji apama.
16
Lriaco narso: ''Iwapaotsa icapa keenipe cadanacoatsa njaji hebreo tadoanaipe, atsia cada neenipe, inoatsani, mitsa ínarro cadaa, icaotsa caaficano.''
17
Mitsa njaji iwapacape keenipeca njaji inaitjepe nafiowa Dio iiwana, corrin nanaitja cayoji talricanaati inaa capisho nanaitjaca. Njite nacadaa catsa caafica njaji neenipe atsiadape.
18
Niini jliaji talricanaati Egipto lricoda iaco narso njaji iwapacape njaji kenipeperri: ''¿Coada corrin iino njaji neenipe atsiadape?''
19
Njite njeepacani, naaco lrirso jliaji talricanaati: Njaji hebreo tadoanaipe, cotsa cayocana nacayosho njaji egipcio tadoanaipe. Njaji inaitjepe kjaidaperricana, keenipena lripjeyatoa waocaca naikjaolre keenipe cádanacona.''
20
Dio iwapa njaji inaitjepe iwapacaperri njaji kenipeperri. Nataoña pjawa njaji iraelitanai njite kjaida pjaacana.
21
Ima njaji inaitjepe iwapacaperri njaji kenipeperri nafiocawa Dio iwana. Njite Dio icadaa neenipewa.
22
Faraón iaco narso njaji lrinaikite pjiomi: ''Ipecoatsa oni ricojle pjiomi njaji neenipe atsiadape, mkitsa icadaacatsa njaji inaitjepedape.''