¹ Iwapa jimi matsia enonai, Picadaa caacoca Njoa. Picadaa. Picadaa jiipai jimica njaji yacoti imotolri Nonoma lrikjoite. ² Picada jiwaca inaco jliaji nocanatanda inaco sha iyao jiwa capisho, picadaa njaji yacoti jiwacawa inaco itamana jiwa capisho, aima capisho iyao jiwacawa malritsi ipodo nacó, parro capisho ooni paniati nacó. ³ Njoa dekja icaite matsiadalrica Jliaji wa-Minalri, nocaiteca ajádalri macadalrica Jliaji wa-Diote. ⁴ Pjia Idanatacaita fa, Matsiadalrica jliaji Pidejicalre; Pinaitja Matsia pjiomi. Icatsa Jliaji Dio corridalri Imatadaca, corridalitsa irso iwaopiakje matsídalri. Icatsa Jliaji inaitjacaita Matsia njite pacoacatsa pjiomi irso. ⁵ Ima nanaitjaca maatsi Lripeyajle. Cotsa Lrienipecana, inaitja cape catsa maatsi Norso. Inaiki maatsiperri, ipicacapecawa njacoma canja. ⁶ Icatsa nacaoñaca jliaji na-Minalri cayo. Inaiki matsilri-perrimi corri-perri yanjí cocaca jliaji nanaitjalri. Icacadanatsa Jinirrica, jliaji inaitjacaita sha. Lrinaitja shá njite lricadaa iofacarrodawa. ⁷ Piwada panaya coaji piaca oopi toa, piwaopia njaji aima walria perina jiyapacawa. Pitatjaotsa pjimiwa pjinirri iinai njite lri lricaiteotsa pirsona, njite njaji pekipenai nacaiteotsa jimi coaji piaca. ⁸ Coaji piaca jliaji Yenonse-dalri pjaa pjiomi ioya Lria piaca njepaitewa njaji jalredaoca lricoperri njepaitewa, coaji piaca Jlienitaca naoyawaca njaji inaiki padenirri, njite lricaite narso kjerreca njepaiite jinaa iocacawa nacoamitsa, mitsa lriwaada tsakja nanaco njaji Iraelnai nanaikica icoam. ⁹ Ima Dio inaikite aimadanca njaji Jacob yenipenaipe. ¹⁰ Lrioketa piacana jalrapocolri ricó, metádalri rico jalrapocolri kjemacawa caolri ipjiaca niini; Jlipa lriñampani njite lriwapani tsakja, njite matsietani matsia cayoji pawapa capisho njaji patjí ipamoyoaca. ¹¹ Cayoji perri yarrajicada lrienipe narropoco lricope toa lricadácarro narracawa, cayotsa Dio imjeco njaji lrinapje lriarreta carrona Lripje naco. ¹² Padatsa Jliaji Iminalriti ideena nayoeta cádanaco jliaji jalrapocolri, corri pada nadiote njaji apana inaiki ikitsindatani. ¹³ Lricadaa nawa yenon jiipana nacó, njite Lrikeñawana jaicotjeda sho awacada lricope; Lria naperroa mapaa jiipada nacope njite aceite imotocapewa jiipana lrikjoite. ¹⁴ Lriñja tsakja vaaca inia iiti potocodalri njite lrirra tsakja nainia, naiñja tsakja cordero, carnero njite chivo tsakja Baasán lricope, trigo matsiapedalri sho, njite pirra tsakja ova iana potocoajai. ¹⁵ Mitsa kepeca jliaji maficalri Jerusún njite lriaca njiteo, kepeni ima aimacalretsa lriñaca. Lrimaca jliaji Dio inaitjacaitani, lrimenata Jliaji Idanatacaitani. ¹⁶ Nama cakerriakje kenakja jliaji Dio naikjaote njaji nadiote aimadan; cadofiakjeca Dio icapacana nini nakerroatacani. ¹⁷ Nainio maficalri demonionai irso, njaji corripetsa Dio-ca, njaji dionai corripe piatsa nanjí inaco, meyamperritsa imotocawa naikjaolre, njaji jinirrinaipepi corri pia nafioca naiwana. ¹⁸ Opi pimaca pioyawa Jliaji Idanatacaita pia pjia, Jliaji inaitjacaita pia pjinirrio, pimaodaca tsakja lrioya Jliaji Dio icadalri jicó-carro pjia ¹⁹ Jliaji Iminalriti icapa njaji njite Lrimenatana, ima njaji Lrienipe njite Lritonaipe naometani cayó carro Lrinaitjacana. ²⁰ ''Nodawa caotsa Noecoa naoya,'' Lriaco cayoji: ''Njite Nocapaotsa coajicaotsa nawayacacawa: ima inaiki matsiperri-cana njacomaca njaji, neenipe inaitjacaperri maatsi. ²¹ Nacada Nokerriacana nasho njaji nanaitjalri narso njaji dionai, niini nacadaa kerroaca Njoa nama njaji nanaitjalri miperrimtsa. Nocadaotsa namatsicaca nacapa cádanaco coajica naoya njaji apanatsa inaiki naoya; Nocadaotsa kerroacana nama njaji inaiki orraiperrimi. ²² Ima tiyé ipojliacawa nonaco Noirroa ikjaote njite lrimjaitaca tjewaca Irrirriapji ricó; Lrimatsicaca jiipai njite pjiomi njaji paniati tsakja; namaca tsakjawa pjiomi jiipana yemacawa nacope. ²³ Nocadaotsa aima matsiperri iwacaacawa nanacojle; Noyawitacaotsa pjiomi njaji Noyawitjioco naicao. ²⁴ Mawitacai inocaotsana njite macaolre caotsana jamolri kjadadalri sho, njite matsicalri ricoatsa nawayacacawa; Nomenacaotsa naiokjaolre yawi kerroaperri, api tsakja. ²⁵ Aimaotsa inonaca njaji nainoji matseta sho, njite mayamicana naapana lricotsa nafio capoa calretsa. Lriwayaketaotsa njaji walriapalripe njite njaji itacape toa, njaji yempetiapape njite njaji pekipenai tsakja jalreperrinatsa itsicojle. ²⁶ Nocaite pia nocada caotsa napocotacawa tecoa, Njotsa icada corri carroenatsa coca iwaopia nanaco njaji inaiki jalredaoca lricoperri. ²⁷ Nowada pia njacaotsa ikerroata Njoa njaji nacoema, njitentja nacaite tecojletsa, nacaite cantja: ''Faida shotsa fama wacoema,'' Corrin Dio ikitsindata fa. ²⁸ Ima njaji inaikinai Iraelnai inaki majicáperricana, niini corrin narso nanjikje. ²⁹ Matsiatsantjana narso cada nanjikje, nanjí carrontja coajicaotsa napeyajle. ³⁰ ¿Coajintja papinetaca njaji mil inaiki, njite yamadantja ipineta njaji do mil inaiki kjeya? icaamitsantja i-Minalri Dio, jliaji jiipada shodalri irso icadaaca irsona. ³¹ Ima jliaji idanatacada njaji wacoema corritsa cayodalricani wayada shó, njite cayo tsakja nacaiteca njaji wacoema. ³² Ima jliaji jaocotjeda yaná nadecana Sodoma lrikjoite nakiníkerre lrikjoite njaji Sodoma lricoperri; ima njaji jaicotjeda nirseperri capoa-perricana; jípití-perrica njaji nainaca. ³³ Api imaocolrialre shoca narso njaji jaicotjeda iana nirse perri, capoadalricani onicatserre imaocolrialre shocani. ³⁴ Njoatsa imatsieta napia jliaji jaicotjeda iana, Nomatsietana nomatsietacawa lrico njaji nonanipe. ³⁵ Njoatsa icadaa nacoema jirrapitetá carrona, njite Nomá carroatsa nacoadawa nacoema ioya coancaojlicaotsa naa namatada tsakja; ima tsomikena naoya njerrapitá-carro, njite kjeyenatsa lriocacawa naikjaolre jliaji jiyapalriotsa nanacó.'' ³⁶ Ima Jliaji Iminalriti lrinaitjaotsa matsia lrinaikite aimadan irso, kjenaotsa Lridiaca lricapa narso njaji lrirsoperri. Lricapaotsa mjaida kenaotsana, nacapá cádanacoatsa corriketsa coca iofawa nanakjoite, corrin njerrapitetaji, corrin tsakja corriperritsa njerrapitetaca. ³⁷ Niininaotsa Lricaite narso cayoji: ''¿A kjerrena njaji idiote, njaji idanatacape pia sha? ³⁸ Njaji idiotenai iñjacape pia neeti njaji maficalri inoji narso njite nairra pia tsakja njaji jaicotjeda iana ideji ofrenda sho? Picadena njenicó-carro nakitsindatá-carro sha; picadaa njá-carro iwapaca sha. ³⁹ Icapaotsa coajica Njoa panaya, icatsa Njoa, Dio-ca Njoa, corrin pacapa apada dio caitalriji Nocayosho; Notaita Noinoca, njite Notaita tsakja Nocadaca caficani; Njoatsa icadaa narrenawa, njite Njoatsa itapena, njite corrin pacapa apada itaita cada iyomjtetacacawa Njoida ioya. ⁴⁰ Ima Njorretaca Nocaapi eenolricojle njite Noaco cayoji: ''Ajádalri corrica coancaojlica nowayacacawa, noinaitjaotsa cayo. ⁴¹ Nokemata cádanaco jliaji No-matsetan kerraite, njite Noinita cádanaco Nodeeca njaji maatsirri nanacojle. Nocadaotsa Njopondape iomaca icoadawa, njite nocaoña watsa njaji matsiperri icapaca Njoa. ⁴² Nodewanetacaotsa njaji Noyawitjioco irranati sho, njite jliaji nomatsetani lriwayaketaotsa njaji ipeti, irranatifie nayapemi njaji mayamperrimi njaji presonai pia, njite njewida sho njaji njewidapo njaji nocoema.'' ⁴³ Icatimatacawa sha jiipai macacoepe, naapiya njaji Dio inaikite, ima lrioma caotsa nacoada njaji irsoperri nainoji; Lricadaotsa shamaca njaji icoema, njite Lrimatsietacaotsa matsia jipaite, Lrinaikite ikjaote. ⁴⁴ Moise ino njite lriccaite pjiomi njaji yácoti canción lricope njemi-werrico njaji ianaiki aimadan, jlia njite Josué, Nun irri. ⁴⁵ Njite, Moise itaita icaiteca njaji yácoti narso njaji Iraelnai. ⁴⁶ Lriaco narso: Icapatja matsia iwaopiakje ricó naikjaote njaji iacoti Nocaiterri irso panaya, ina carroatsa njaji yénipe nanaitjá-cacrro cayoji nacaite capisho nají iacoti kjaidaperri. ⁴⁷ Ima pada yacoti canacaidalri irso, ima caficalri caní, njite naikjaotena wiá watsa iofacawa jalredaoca lrico pjiomi sha iyoetalriotsa jliaji Ooni Jordán iyada carroenaotsa jliaji jiipai.'' ⁴⁸ Njite caacoca Dio Moise irso jliadatsa jecoapi njite lriaco lrirso: ⁴⁹ Pjirrawa caijleji lrinaco jliaji jiipana Abiram, Jiipana Nebo iicao, Moab jipaite lricoda, Jericó icoawajli. Picapaotsa jlite Canaán jipaite, jliaji Noalri narso njaji aimadan Iraelnai nayadá carroni. ⁵⁰ Mayamicaotsa pjia lrinaco jliaji jiipana pjirralriotsa inaco, piwacaaca caotsawa naapiya njaji pikitsiñape mayamirrina pipjeya, cayotsaji Aarón icayosho, pikitsinda iraelita, mayamirri jiipana Hor nacó njite lriwacaacawa tsakja lrikitsiñape iapiya tsakja. ⁵¹ Cayotsa jiyapacawa ima corrica inaitja matsia Norso napecolrico njaji Nonaikite iraelnai ooni Meriba lrico Cades Lrico, jalrapocolri Sinai lricoda; Ima corrica inaitja matsia Norso, corrin ifioca noiwana nainai njaji Iraelnai. ⁵² Niini picapacatsa jliaji jiipai pipeyajle, mitsa corriotsa piocá carroca nirse, lrinacojle jliaji jiipai Nocadalri narso njaji aimadan Iraelnai.''