Capítulo 12 - Iacawa matsiadalri Dio irso
1
Icatsa njaji lrinacoapana-perri njaji yácoti pinaitjalriotsa lri-ricoda jliaji jiipai lricadalri pirso Jliaji Piminalri Dio, na Diote njaji pjinirrinaipemi oopi, yifa cádanaco lri-ricoda jiipaica.
2
Ipekjoeniotsa pa pjiomi nacawa pia matsiadalri nadiiote irso njaji inaiki shamaji, nanaitjaji jiipana nacó, jipana ipamoyiaca naco, njite napjitepe njaji jaico cafinepetsa.
3
Pipecoatsa njewao pjiomi njaji altar nanaitjaji pia njite pjioomi tsakja njaji nadiote iemacarronape pia nanaitjai jiipada sho, njite pimjaita tsakjaotsa rsoaji nadiote Aserá; pjiomi njaji nadiote nanaitjaji icapacanawa njite neepitana tsakja, ipecoatsa pjiomina.
4
Corriotsa iacarro matsiadalri pi-Minalri Dio irso cayoji nacayosho.
5
Mitsa jliaji pi-Minalri Dio iniwananda lrirsowao nanakjoite njaji inaiki jalredaoca lricoperri catjiná-carro lriipitana niini, icatsaotsa niini Lriofacawa iinai, icatsa pialricaotsa nirse.
6
Icatsa nirse pidecaotsa njaji pi-ofrendani pimjaitanipe, maaficalri pinoji, pi-diezmoni, njaji ofrenda pinaitjaji picapi sho, njaji ofrenda picaiteji Dio irso, njaji ofrenda pideji picaolre rikjoitepe, pidecawa tsakjaotsa njaji pivacan yenipe pjerritinaipe njite pjiomi njaji pípirra.
7
Icatsa nirse piñjacaotsa njite picatimataca caotsawa pi-Minalri ipeyajle nanaco njaji pidejicalre, pjia njite piipaneta, lricadalri pioca nini matsiá-carro pjia Jliaji pi-Minalri Dio.
8
Nirse cádanacoenaotsa sha, corriotsa iacarroca matsiadalri cayoji inaitja capisho atoaji, ima coajicatsa panaitjaca cayoji lriwada capisho matsiaca lrirso,
9
ima corricatoa piocawa lri-ricoda jliaji jiipai pi-Minbalri Dio icadalri piaca piwafetawa nirse, jliaji lricadanda pisho piyadawa.
10
Mitsa ioca iyoeta cádanacoenaotsa ooni Jordán njite iofa kenaotsa lri-ricoda jliaji jiipai pi-Minalri Dio icadalri irso iydácarroni, njite lricadaa cádanacoenaotsa iwafetawa naoya naji icoema icodapiperri, iofá carroenaotsa imaodacatsa,
11
niniotsa jliaji pi-inalri Dio iniwanalri iofacarrodawa Lripitana iocawaotsa niini, njite idecaotsa pjiomi njaji nonalri ideca: pi-ofrendani pimjaitanipe, maaficalri pinoji, pi-diezmoni, njaji ofrenda pinaitjaji picapi sho, njaji ofrenda picaiteji Dio irso, njaji ofrenda pideji picaolre rikjoitepe, pidecawa tsakjaotsa njaji pivacan yenipe pjerritinaipe njite pjiomi njaji pípirra.
12
Icatimataaca caotsawa pi-minalri Dio ipeyajle: pjia, pienipenaipe, pitonaipe, pirsoperri atsianai njite
inaitjepe, njite njaji levitanai iofacape iyacalre ricó, imja corridalrica irso jipaite cayoji icayosho.
13
Icapaotsa ioyawa inacowaacatsa wade ideca njaji ofrenda imjaitaji coancawa catsa matsia icapaca.;
14
icamitsaotsa itaita ideeca njaji imjaitaji a kjerrecawaotsa i-Minalri Dio iniwanaca irsowao inakjoite poco, icatsa dekja itaita inaitjaca pjiomi njaji nonalri inaitjaca.
15
itsa, itaita dekja ínoca iñjá-carro maaficalri pjiomi iyacalre ricó a kjerrecawajle catsa, njaji iMinalri Dio icadaji irso; pjiomi inaiki matsiaperri o mátsiperri nataita naiñjacana pacoacatsa njaji maficalri nérri macani njite tsoni tsakja.
16
Mitsa corrin itaita iñjaca nerrana fie; irsotsa icadaca lriarroca lrioya jiipai nacojle parrocaji ooni.
17
Corrin pitaita piñjaca pyacalre ricó njaji pi-ofrendani pimjaitanipe, maaficalri pinoji, pi-diezmoni, njaji ofrenda pinaitjaji picapi sho, njaji ofrenda picaiteji Dio irso, njaji ofrenda pideji picaolre rikjoitepe, pidecawa tsakjaotsa njaji pivacan yenipe pjerritinaipe njite pjiomi njaji pípirra.
18
Icamitsaotsa pitaitaotsa piñjaca Lricadaacawa lricotsa Jliaji piMInalri Dio, lri-ricoda jliaji Lriniwananda pirso; icatsaotsa piñjaca niini, pjia, pienipe atsianai, pitonaipe, pirsoperri atsianai njite inaitjepe, njaji levitanai piyacalre ricope; icatimatacawatsawa i-Minalri Dio ipeyajle nakjaote njaji pidejicalre.
19
Icapaotsa ioyawa matsia wade imaodacaca naoya njaji Levitanai iofalriwa iyacalre ricó.
20
Pi-Minalri imacaiteta cádanaacoatsa jipaite cayoji Lricaite capisho pirso, njite picaite: ''Noiñjacaotsa maficalri ípe, pioma capoa piñjaca maficalri ípe, piñjacaotsa maficalri ípe cayoji pioma capisho.
21
Teeco cadaa pioya jliaji yacaalre pi-Minalri Dio
iniwanaji pirso lricadacawa Lriipitana iofácarro lri-ricoda, nini pitaita piinoca nanakjoite njaji pivacan, pípirra nakjoite pi-Minalri Dio icadajitsa pirso, cayotsaji nonaa capisho sha panaya, pitaiteniotsa piñjaca piyacalre ricó cayoji ioma capisho.
22
Itaiytajitsa iñjaca njaji nerri tsoni njite macani tsakja; inaiki matsiadalri o matsidalritsa nataita naiñjacana pacoacatsa.
23
Icamitsa picapa wadee piñjaca írranati, ima írranatica ipeti icafica; niini corrin itaita iñjaca lricafica lripe yapiyatsa.
24
Corrin pitaita piñjaca írranati; piarroatsani jiipai ricó parro capisho ooni.
25
Corrin pitaita piñjacani, matsia carroatsa pjia, njaji pienipe pjiapodam, pinaitjacarroatsa matsia Dio ipeyajle.
26
Mitsa njaji Dio iyarrope pirsoji njite njaji ofrenda icaoñashopa iacoam Lrirso, irsotsa idecana ikjerreca Dio iniwana irso idécarrrona.
27
Icatsa nirse pidee njaji ofrenda pimjaitaji Lrirso, lripe njite lrirrana tsakja, pi-Minalri Dio i-altarni nacojle; nérrana njaji naficalri piarroatsa lrinaco jliaji pi-Minalri Dio i-altarni nacó, njite piñja caotsa neepe njaji maficalri.
28
Pimatsietaotsa pinacoa pjiomi njaji yacoti Nonashopa pjia, matsia carroatsa pjia njite njaji pienipe pjiapodamperrimi caidalritsa, matsia capoa pinaitjca pi-Minalri Dio ipeyajle.
29
Coancaojli kenaotsa Dio ipecoatsa ipjeya njaji inaikinai pacoa lricope jiipai iofa caoatsa niini, njite iofakenaotsa njepaite lrico pia,
30
picapaotsa matsia pinacowacatsa, wade pinaitjaca nacayosho pia nawayaca cayaminawa ipjeya. Wadee iomaca yanji coaji piaca naaca matsiadalri narso njaji nadiote, icaitecantja icaolre ricó: ''¿Coaji pia pa naaca matsuadalri nadiote irso njaji inaiki? Nonaitja toatsa cayo nacayosho.
31
Cayo cada inaitjaca, corrin itaita iaca matsiadal, rio i-Minalri Dio irso, ima dofenaperrica i-Minalri Dio irso pjiomi njaji matsiperri nanaitjalri njaji inaiki, matsi Lricapaca njaji nanaitjaji nadiote irso; ima njaji inaiki canaji, namjaita neenipe atsianai njite inaitjepe tsakja nadiote irso.
32
Icapa matsia icao njaji Nonalri inaitjaca. Maoma pja inaitjaca coca pjaca lrinaco, corrin tsakja jitaca naoya. Inaitja cayotsaji Nonaa capisho sha.