¹ Mayami cayami Saul, David idiawa lriino cayami njaji amalecitanai njite lrofawa yamadaatsa Siclag lrico. ² Njite dainoma nacojle, ape atsia iocawa Saul iofacawa lrico pia lritsayan tserre-tserre dalrinatsa njite jipaipe jliwida nacó.Lrioca cádanacoa David iderse, jliwa lriorsoawa tjewacajle lrinoma jiipai nacojle. ³ Njite iaco lrirso: ''¿Kjaite pinoji?'' Njite jliepani: ''Nopitocawa naofacawa lrikjoite njaji iraelitanai.'' ⁴ David iaco lrirso: ''Pinaitja matsiacalri, picaite njomi coancatsa nirsena.'' Niini jliepacani: Njaji inaiki aimadan. ''Oopi napitowa oowicalri ioya. Aima njaji nayoaji njite aima tsakja njaji nainoji. Saul njite lrirri Jonatan oopi mayamina.'' ⁵ Njite David iaco lrirso jliaji yempetitoa: ''¿Coantsa piajíi-carro mayamica Saul njite lrirri Jonatan?'' ⁶ Njite jliepani: ''Njoyapa cádanaco Awacada Gilboa lrico, nocapa Saul niini jipaacaketsawa lrimolrocon naco njite njaji shecojicape njeeco carrofia lrico wadeepena naaca njepani. ⁷ Niini Saul icaboco icapa noikjalre njite lriwanaca njoa, niini njoepacan: Alri njoaji.'' ⁸ Njite lritatjaca jlimio kjaiterrica njoa, niini noaco lrirso pada amalecitaca njoa. ⁹ Niini lriaco norso: ''Pinaitja matsiacalri norso, piino njoa, ima aimena njorrapitaca caafi cadanatoa njoa. ¹⁰ Niini njonicoca noema lrinaco noinó carroni, ima noajintsa corriketsa caafi carrocani. Niini njopaca nodee jliaji corrona jliwida nacodalri pia njite jliaji lritjinada lrinaapa pocoda nacoda niodee-carroni pikjaolre, pjia no-talricanaa.'' ¹¹ Ikena David itserrenta lritsayani, njite njaji lriinaiperri nanaitja tsakja cayo lricayosho. ¹² Naiya Saul naco njite corrin naijaca madalridaa jalredaoca naco, Jonatan ikjaote njite naikjaote Dio inaikite aimadan ikjaote tsakja, ima mayamicana matseetasho. ¹³ David iaco tsenakja lrirso jliaji yempetitoa: ''¿Kjaitédalrio pjia?'' Njite jliepani: ''Pada inaikitsa ioya yeenipeca njoa, pada amalecita.'' ¹⁶ David iaco lrirso: ''¿Coadao corrin pifio piinoca jliaji Dio iniwananda picaapisho?'' ¹⁵ Niini David iwanaca pada lrirsodalri njite lrinaa lriinó-carro jliaji yempetitoa amalecita, niini lrideeca lriinoni. ¹⁴ Njite David yaaco lrirso jliaji amalecita idakim mayamdalriminatsa: ''Pjiwacatsa irso maatsicalri caicarro mayamica pjia, ima pinoma lrikjoitetsa picaite piinoca jliaji talricanaati Dio iniwananda.'' ¹⁷ Ikena David icanataca papeco canciójn nanaco njaji mayamperrim Saul njite lrirri Jonatan. ¹⁸ Njite David inaa njaji inaiki aimadan nacanantá-carro jliaji Canción Yawitjiapoti nacoda narso njaji judánai yeenipe, jliaji nadanalri Jaser Ipaperran lrico. ¹⁹ ¡Pimatsiaca, Irael, oopi mayamina yenondalripe naco pirsoperri! ¡Oopi mayami njaji kjaidaperri! ²⁰ Macaitesa Gat lrico, macadaatsa naajíi-carro Ascalón yaapowakjape ricó, wadeentja catiimacana njaji filisteonai iitonaipe, wadeentja nacatimataacawa njaji marsocaperritsa njenaana nadaki naco. ²¹ Corriotsa iiya carroca, corri tsakjaotsa itamana jiwa carroca acada Gilboa nacó, corrin tsakjaotsa panitati itaoña carroca wadentja naaca ofrenda nanakjoite. Corrinatsa naarroca aceite Saul idanaita naco, ima oopica namacadawalretaca nadanaitja njaji kjaidaperrimi. ²² Neerrana ikjaote njaji nainoji, nadaki ikjaote njaji kjaidaperrimi, corrim njaamaca jliaji Jonatan iyawitjiaponi, njite Saul iinotsa lricoema lrimatsetan sho. ²³ Inaiki ipeyoji piaca Saul njite Jonatan matsiaperri capooana-na caafi cádanacopiana, njite pacoacatsa mayamicana. Kjeyaperri pja piacana peerri ioya, kjaidaperri pja piacana yaawi ioya. ²⁴ Iiya Saul naco shaa Irael iitonaipe, ima lricadaa piaca irso itsayaniwa matsiaperri lrimatsietaji owirro sho namatsiacao, njite lricadaa shentadao cacoadaperri. ²⁵ ¡Icapa coanca mayamica njaji kjaidaperri oowi ricó! Naino Jonatan yenondalri naco. ²⁶ Inonaaca njoa pikjaote, pjia nokitsin Jonatan. Pekirrí-dalri piaca jliaji ipeyokjeti pirsolri pia nonacojle aima pja lrioya jliaji ipeyokjeti rorsonda rsoaji iinarro roinirri nacojle o roenipe nacojle tsakja. ²⁷ ¡Capaca coaji mayamica njaji kjaidaperrimi, njite corrinatsa paca njaji nainoaca shopawa!