¹ Njite njaji inaiki Judá lricoperri njepa jliaji Uzía, jliaji irsocada toa diecisei walria lripekirrica nacó nacadaa carroni natalricanawani jlinirri Amasia jiapodam. ² Icapiena jliaji jirretalri tsenakja jliaji yacaalre Elot, lrimatsieta tsenakjan Judá. Iliapodamjite mayami jliaji talricanaati lriferrinaipemi iinai. ³ Uzía irso piakena diecisei walria lripekirrica nacó lrinita caojli lritalricanataca. Cincuenta do walria lritalricanaataca Jerosalén lrico. Jecolia pia jlidoa iipitana, Jerosalén darro iofawa. ⁴ Lrinaiytja matsia Dio ipeyajle, lrinaitja pjiomi cayoji jlinirri Amasia inaitja capisho pia. ⁵ Lricaite lricaolre rikjoite lriomácarro Dio Zacaria jiawalri naco, ima jliaca icanantani coancarro jlinaitja cayoji Dio ioma capisho. Lrioma cádanco Dio, Dio icadaa matsiacani. ⁶ Uzia iawa inoacawa filisteonai ikjoete. Lripeco njewao lridaana jliaji yacaalre Gat ricoda, Jabnia njite Asdod tsakja; lrinaitjenakja yacaalre walricoe Asdod jipaitena lrico njite napecolrico njaji filisteonai. ⁷ Dio ikitsindatani nakjoete njaji filisteonai, nakjoete tsakja njaji árabenai iofacapewa Gurbal lrico njite nakjoete tsakja njaji meunitanai. ⁸ Njaji amonitanai nacaoña pia impuesto Uzía irso, njite caconaacani narso pjiomi ricotsa, teeco njemica lrinaco Egipto nomanajle, ima lritaoñaca itaita kjeti naco. ⁹ Uzías inaitja tsakja nawapa carrodao Jerosalén lrico, lri Pananoma naco yacaalre Itsikjicawao, Jiipai ioyawacacawa Ipananoma naco, njite yacaalre iwai itojiwi naco tsakja, lrinaitja taimini. ¹⁰ Lrinaitja pja paana nawapa-carrodawa jalrapocolri rico, njite jlica aima ooniapji, aima capoa lrirsoca lri vacani, coshoca lripé cawa njite malritsicoa lrico tsakja. Lrirso pia iapananacape njite iniwacape tsakja lripania ova awacada cawa, matsiacawa jiipai paniati irso, ima lripeyo piaca lriapanaca. ¹¹ Lrirso pia tsakja aima tsolrodaonai, atsiana iiacapewa oowi rico papocope lriniwetaji matsia, njaji idanacaita Jeiel iajimpe inaco, Manases tsakja, lriaji caconaite Hanania irsodalri, pada nanakjoite njaji talricanaati icomandatenai. ¹² Padenirri njaji naapiyawanai coanca naferrinaipemi iipaneta pia, njaji atsianai inoacacapewa oowi rico icapiatsa do mil seiciento namaimaca. ¹³ Njaji tsolrodaonai aimadan lrirsoperri, lriajimpe inaco, icapiatsa treciento siete mil quiniento atsianai, itaitacape inoacacawa oowi rico mafio caperrinatsa ikitsindatacape jliaji talricanaati lricoema ikjoete. ¹⁴ Uzia inaitja napiawalre njaji tsolrodaonai aimadan, aima nadanawa, molroco, njewida idanawa, natsayan neñaji tsipalrakjape sho, nayawita shopa, njite jiipada naoca shopa. ¹⁵ Jerosalén lrico lrinaa nanaitjaca yawitjiapoti kjaidaperri ipeecoca, nanaitja tsakja naoca shopa jiipada macanepe, nanaitjaji njaji atsianai ianjicape idejicana, nawapá carro nasho yenondalripe naco njite yacaalre iwai yenon cawa naco tsakja. Ikena lriacona iacawa nanaco njaji jiipai teecoperri, ima cakitsindatacanaa cani pekirritsa njite corrinatsa coca itaita lrikjoete. ¹⁶ Mitsa kjaida cádanaco lridiacawa jliaji Uzia, ikena padalreca lridiacawa lricaolre rico, corrinatsa lriwaopia lrinaitjaca matsia; lrinaitja maatsi lri-Minalri Dio ikjoete, ima jliewacawa Dio iipana lrico lrimjaitá-carro incienso lrinaco jliaji altar namjaitacawa incienso. ¹⁷ Jliaji sacerdote Azaria iawa jliapodam, njite lriinai ochenta sacerdotenai wa-Minalri iyarrope, atsianai mafio-caperrinatsa. ¹⁸ Mitsa corrin nacadaa lrinaitjaca jliaji lrialri lrinaitjaca, naaco lrirso jliaji talricanaati: ''Cotsa pirsowalreca, Uzia, pimjaitá-carro incienso wa-Minalri irso, icaamitsa itaitalrica imjaitaca incienso waMinalri irso njaji sacerdotenai, Aarón ienipenaipe, njaji jienacapewa maatsidalri ioya Dio irso. Warsa pimotowa lrioya jliaji Matsiacawa, ima pinaitjaca maatsi Dio irso, njite corriotsa lrinaitjá carroca matsia pirso.'' ¹⁹ Njite Uzia jipa cadana lricaapi rico lrimjaita shopa incienso. Mitsa kerroa cadanatoani nakjoete njaji sacerdotenai, ikena catserrecani lriecoa naco nacapawerricotsa njaji sacerdotenai, Dio iipana lrico, lricodapi jliaji altar namjaitacawa incienso. ²⁰ Niini jliaji sacerdotenai iapiyawalri Azaria, njite pjiomi njaji sacerdotenai nacapani, njite nacapa catserrecani lriecoa naco, ikeena nakjeyapitaca njetacan njite. Njite jliwacatsa imoto njiteo, ima Dio iñaacani. ²¹ Catserreketsa jliaji talricanaati Uzia caitsa lriaca mayamini, njte nacadaa lriofaawa teecotsa padapana lricojle lritserre ima, ima Dio ipeecocani wa-Minalri iipana ioya. Lrirri Jotam pienatsa jliaji iajirri lrinaco jliaji talricanaati dapana, njite lritalricanaata nanaco njaji jlinirri inaikitem. ²² Njite nja paana Uzia inacoapana perri, njaji lrinitaji lrinaitjaca njite njaji piketemperri lrinaitjalri, pacapacana lri-ricoda jliaji paperra inoparrotacada Isaía, Amos irri idanaji rico. ²³ Cayotsa mayamica Uzia lriferrinaipemi iinai, nadawani nacodapita pada jiipai tsoomidalritsa nadawacawa njaji talricanaatinai, ima naaco pia lrinaco: ''Catserre dalrim piacani.'' Njite lrirri Jotam nakja talricanaati jliapodam.