¹ عیسی خو دؤر و وَرَ فَأندِرِست و ثروتمندانی یَ بیدِه کی خوشَأنِ پیشکشی یانَ، بیت المالِ صندوقِ میَأن تَأوَأده دِه. ² جی او میَأن ایتَه پیرِه زنَایَ بیدِه، کی دو تَه مسی سکه بی ارزشَ تَأوَأده صندوقِ دورون. ³ عیسی بوگوفت:«شمرَه گوفتَأن دِرِم کی اَ بیوه زنای فقیر جی همۀ اوشَأن ویشتر تَأوَأده، ⁴ چره کی دیگران خوشَأنِ دارایی زیادی یَ خدایَ هدیه بوکود، اما اَ زن با اَن کی فقیر بو، تمامِ خو درآمدَ هدیه بوکود. ⁵ چون بعضی شاگردان معبدِ ساختمانِ جَه تعریف کودد کی چوطو سنگایِ قشنگ و پیشکشی یانِ گرانقیمتِ مرَه، تزئین بوبَسته دَأره، عیسی بوگوفت: ⁶ «زمانی فَأرِسِه کی جی اونچی کی دِئِن دِرید، سنگی، سنگی رو باقی نِمَأنه و همه فیوِه بیجیر.» ⁷ اونِ جَه وَأورسِد:«اُستاد، اَ ایتفاقان کِی دِکِفِه؟ آیا علامتی وجود دَأره کی بفهمیم اَ ایتفاقان نزدیک بوستَأنِ دِرِه؟» ⁸ جواب بدَه:«هوشیار بیبید کی کسی شمرَه گومراهَ نوکونه، چره کی خیلیَأن اَیِدِه و ایدِعا کوند کی مسیحِد و گویده کی دونیا به آخر فَأرِسِه دَأره، ولی شومَأن باور نوکونید و اوشَأنِ دونبال سر نیشید. ⁹ وختی جَنگانُ آشوبانِ خبرَ ایشتَأوید، ترسِه نومَئید، چون دوروسته کی اول وَسی اَ ایتفاقان دِکِفِه، ولی اونِ پوشت بَند دونیا به آخر فأنرِسِه.» ¹⁰ بازن اوشَأنَ بوگوفت:«قومی ایتَه قومِ دیگرِ اَمرَه، و مملکتی ایتَه مملکتِ دیگرِ اَمرَه جنگ کونه، ¹¹ و پیلدانه زمین لرزه یان و قحطی و وَبا، اَطرف اوطرفِ جَه اَیِه و عجایبی ایتفاق دِکِفِه و آسمانِ میَأن علامتَأیِ خوفناک نمایانَ بِه. ¹² ولی پیشتر جی همۀ اَشَأن، شمرَه گِرِفتارَ کوند و می نامِ وَسی کی شیمی رو نَهَه، شمرَه بورِد پادشاهان و حاکمانِ ورجَه وعبادتگاه هانِ میَأن مُحاکمه کوند و تَأوَأدد زندان، ¹³ اما هَن فُرصتی ایسِه کی بِتَأنید انجیلِ مُژده یَ اوشَأنَ بدید. ¹⁴ و پیشاپیش دیلواپس نیبید کی چی بوگوئید و چوطو خودتانِ جَه دفاع بوکونید، ¹⁵ چون من شمرَه کلام و حکمتی فَأدم کی هیچکودام جی دوشمنان نِتَأنِد شیمی جوابَ بِدِد و شیمی جولو دوام بأورِد. ¹⁶ شیمی پئر و مار و شیمی برَأرَأن، و شیمی خیشانُ دوستان شمرَه خیانت کوند و شمرَه دوشمنَ تحویل دِهِد، و بعضی جی شومَأنَ کوشِدِه. ¹⁷ و همۀ مردم می وَسی، شیمی جَه بیزار بوده. ¹⁸ اما بدَأنید کی ایتَه مو، شیمی سرِ جَه گومَه نیبِه. ¹⁹ اگر تحمل بوکونید، آخر سر شیمی جانَ نجات دِهید. ²⁰ وختی بیدِه اید اورشلیمَ لشکریان محاصره بوکوده دَأرِد، بدَأنید کی اونِ ویرانی موقع نزدیکَ بوسته. ²¹ اون موقع هر کی یهودیه میَأن بِئسِه فرار کونه کوه هانِ جُر، و هر کی شهرِ دورون بِئسِه، شهرِ جَه بیرون شِه و هر کی صحرا بِئسِه دِ وَأنگردِه شهر. ²² چون او روزَأن، مکافاتِ موقع یِه، و هر چی کی پیغمبرَأن بینیویشته بود و هُشدار بِدَه بود ایتفاق دِکِفِه. ²³ وای بر زناکانی کی اونموقع حامله یِد یا مارانی کی زَأی شیر دِهِد، چون اَ سرزمینِ دورون سختی و مصیبتِ بدی پیش اَیِه، و اَ قؤم خدا غَضَبَ دوچارَ بِه. ²⁴ شمشیرِ مرَه اوشَأنِ جانَ فَأگیرِدِه و یا اسیر کونده و قومای دیگرِ میَأن به اسیری بورِد، و غیرِ یهودیان اورشلیمَ پا مالَ کوند، تا موقعی کی اوشَأنِ تسلطِ ایام به آخر بِرِسِه. ²⁵ اونموقع خورشید و ماه و ستاره یانِ میَأن علامتایی پدیدارَ بِه، و زمینِ رو قؤمَأن، دریا موجَأن و اونِ غُرِشِ جَه پریشان بُد و وَحشت کوند. ²⁶ وختی مردم تصور بوکوند کی چی خَأیه دونیا سر بَأیه، بعضیان جی ترسُ وَحشت غش کوند، چره کی آسمانِ قوّت به لرزه دِکِفه و اونِ نظم و نیظام بِه هم خوره. ²⁷ و اونموقع اِنسانِ پسرَه دینِده کی ایتَه اَبرَ سوارَ بوسته، و قوّت و جلالِ اَمرَه اَمون دِرِه. ²⁸ پس وختی اَ پیشامدان شروع بوبَست، راست بِئسید و شیمی سرَ بُوجُر بیگیرید، چون شیمی نجات نزدیکه.» ²⁹ و اوشَأنِ رِه میثالی بزَه و بوگوفت:«انجیر دار یا دارهای دیگرَ فَأندِرید، ³⁰ وختی دینیدی ورگ بَأورده دَأرِد، فَهمیدی کی تابستان نزدیکَه بوسته. ³¹ هَطو وختی کی بیدِه اید اَ ایتفاقان دِکِفتَأن دِرِه، بدَأنید کی خدا ملکوت نزدیکَ بوسته. ³² یقین بدَأرید کی اَ نسل دوام اَوره و همۀ اَ ایتفاقانَ دینه. ³³ زمین و آسمان جی میَأن شِه، ولی می گبَأن هیچ موقع جی میَأن نیشِه. ³⁴ هوشیار بیبید، کی می ناخبِرِه وَأگردستن، شمرَه غافلگیرَه نوکونه، وَأنَألید پُرخوری و شَرابخاری و زندگی غم و غورصه، شمرَه دیگر مردمِ مَأنستَأن خودشَ مشغولَ کونه. ³⁵ چون او روز ایتَه دامِ مَأنستَأن ناخبِرِه، همۀ مردمَ غافلگیرَ کونه. ³⁷ عیسی روزَأن معبدِ دورون مردمَ تعلیم دَئِه، و شبان شهرِ جَه بیرون شوئِه و کوهی کی زیتون نام دَأشته جُر، تا صُبح ایسَه یِه. ³⁸ و هر روز صُبح مردم اَموده معبد، تا اونِ گبَأنَ بیشتَأود.