¹ جی پولس، رسولی کی اونِ رسالتْ، نه انسانانِ طرفِ جَه و نه بواسطۀ انسانانه، بلکی بواسطۀ عیسی مسیح و خدایِ پئرِه کی اونَ جی مُرده یان ویریزَأنی. ² و جی طرفِ همۀ برارانی کی می اَمرَه ایسَد، به غَلاطیه کلیسایان. ³ فیض و سلامتی شیمی اَمرَه بیبه، اَمی پئر خدا طرفِ جَه و خداوندْ عیسی مسیحِ طرفِ جَه ⁴ که خو جانَ اَمی گوناهانِ وَسی فَدَه تا اَمرَه به خواست اَمی پئرْ خدا، جی اَ دونیایِ شریر نجات بده. ⁵ جلال بر اون تا اَبدالآباد، آمین ⁶ شیمی جَه تعجب کونم کی به هَ زودی جی اون کسی کی شمرَه دخَأده تا مسیح فیضِ دورون شریک بیبید رو وَأگردَأنه دَأرید و ایتَه انجیلِ دیگرِ طرف شوئون دأرید. ⁷ البته انجیلِ دیگری وجود نَئره، ولی کسانی ایسَد کی شمرَه مضطربْ کوندْ و خَأید مسیحِ انجیلِ حقیقتَ عوضَ کوند. ⁸ ولی اگر اَمَأن، یا حتی ایتَه فرشته جی آسمان، بخَأیه انجیلی غیرِ از اونچی کی اَمَأن شمرَه بشارت بدَئیمَ شمرِه موعظه بوکونه، مَلعون بیبه! ⁹ هوطو کی پیشترانِ رِه بوگوفتم، هَسَه بازم گویم: لعنت بر اون کسی کی انجیلی غیرِ از اونچی کی قبول بوکودیدَ شمرِه موعظه بوکونه! ¹⁰ آیا مردمِ تأئیدَ خَأیم یا خدا تأئیدَه؟ آیا مردمِ رضایتِ دونبال ایسَم؟ اگر تا هَسه مردمِ رضایت و خوشحالی دونبال ایسَه بؤم، نتَأنستِم مسیحِ خادم بوبوم. ¹¹ ای برأرأن، خَأیم بدَأنید انجیلی کی من بشارت دِهم، آدمی فکر و خیالِ جَه و انجیلِ بشری نییه. ¹² چون اونَ انسانِ جَه دریافت نوکودِم و کسی هم اونَ مرَه یاد ندَه دَأره، بلکی اونَ عیسی مسیحْ خودش مستقیماً مرَه آشکارَ کود. ¹³ شومَأن می سرگذشتَ دینِ یهودِ دورون بیشتَأوسته دَأرید کی چوطو خدا کلیسایَ آزار رسَانِئِم و اونَ خرابَ کودِم. ¹⁴ و خودمِ دیگر همسالانِ یهودی جَه مؤمِن تر بؤم و رسم و رسوماتِ مذهبی رِه خیلی تعصب دَأشتم. ¹⁵ ولی چون خدا کی مرَه می مارِ شکمِ جَه انتخاب بوکود و مرَه بواسطۀ خو فیض دخَأد، اَطو اِراده بوکود تا ¹⁶ خو پسرَ می دورون آشکارَ کونه کی بوشوم غیرِ یهودیانِ ورجَه و اونِ پسرِ رِه بشارت بدم، پس منم خون و جسمْ، یعنی انسانِ اَمرَه مشورت نوکودم، ¹⁷ و حتی اورشلیم هم نوشوم، یعنی کسانی ورجَه کی پیشتر جی من رسول بود، حتی اوشَأنِ ورجَه هم نوشوم، بلکی بوشوم عربستان، و بازن وَأگردستم دمشق. ¹⁸ و بعدِ سه سال بوشوم اورشلیم تا پطرسَ بیدینم، و پونزدَه روز اونِ ورجَه بِئسَم. ¹⁹ ولی باقی رسولانِ جَه فقط یعقوب، اَمی خداوندْ عیسی مسیحِ برأرَ بیدم. ²⁰ خدا شاهده کی اونچی نیویسم عینِ حقیقته. ²¹ بعدِ اون دیدار بوشوم قیلیقیه و سوریه ایالتانِ طرف. ²² او زمان هنوز یهودیه کلیسایان مرَه به قیافه نشناختد. ²³ فقط بیشتَأوسته بود:«اون مردی کی پیشتران اَمی دوشمن بو و اَمرَه اذیت کوده، هَسَه اونم هون ایمانیَه بشارت دِهه کی کمر به اونِ نابودی دَوسته بو» ²⁴ و اوشَأنْ می وَسی خدایَ شُکر کودد.