¹ Chioniso chaObhadhia. Izvi ndizvo zvinoronza Mambo Mwari, Mwari ngendaa yeEdhomu. Takazwa mashoko anobva kunaMambo Mwari, mutumwa watumwa pakati pemadzinza, “Mirukai, ngatimiruke tivarwise ngehondo! ² “Ringirai, ngegwinyiso ndinozomuita vadoko pakati pemadzinza; munozoshoorwa kakurutu. ³ Kudzikudza kwomwoyo wako kwakakuchengedzera, iwewe unogara mumarutwe oruware, ugaro hwako hwakakwirira. Unoronza mumwoyo mwako kuti, ‘Ndiani unozondidzasa pashi pamavhu?’ ⁴ Kunyazwi wechidzikwidza kudai ngegodzi, kunyazwi chisaki chako chinoemeswa pakati penyeredzi, ndinozokudzasa kubvapo, unoronza Mambo Mwari. ⁵ Dai mbavha dzauya kwouri, dai, vabvuki usiku, kuparadzwa kwako kwaizokura kwakaitawani! Vasaizoba zvevaida zvega here? Dai vakayi vemavhini vakaguma kwouri, vasaizosiya madaranganwa here? ⁶ A kutsvakwa kwezvaIsau! A kutsvakisiswa kwoupfumi hwake hwakafishika! ⁷ Vanhu vaizwanana newe vakakuchengedzera, vakakudzingira kumugano; vanhu vakaiyana newe vakakuchengedzera, vakakunyisa; vanodya kudya kwako vakuteya ngechirimbana, akuna kuzwisisa kwacho. ⁸ Ngeiro zuva, unoronza Mambo Mwari, ndinozoparadza vakangwara kubanze kweEdhomu, nevanozwisisa kubanze kweMutunhu waIsau. ⁹ Ngwazi dzako dzinozokangaidzwa, O Themani, kuitira kuti weshe agurwe kubva kuMutunhu waIsau. ¹⁰ Ngokuuraya nokugebenga hama yako Jakobe, kutsveruka kunozokufukidza, newe unozogurwa mhera nariini ¹¹ Ngezuva iro rowakaema parutii, ngezuva iro vapara revakamutorera pfuma yake, nevapara vakapotera pamisiwo yake, vakaita mabhigidha ngendaa yeJerusarema, iwewewo waiya wakadai ngoumwe wavo. ¹² . Asi iwewe usaisisira kuringira padera pehama yako ngezuva rokutambudzika kwake; usaisisira kudakara ngendaa yevanhu vaJudha ngezuva rokuurawa kwavo, nokuti kuereketa ngokudzikudza ngezuva rokutambudzika kwavo. ¹³ Usaisisira kuti upotere pamusiwo wevanhu vangu ngezuva rokutambudzika kwavo; usaisisira kuti udakare ngezuva rokutambudzika kwavo, nokuti kutora upfumi hwavo ngezuva rokutambudzika kwavo kukurutu. ¹⁴ Usaisisira kuti ueme pamhararano, kudziirira avo vakapona vake, nokuti kupira avo vakasara vake ngezuva rokutambudzika. ¹⁵ . Ngokuti zuva raMambo Mwari riri pasinde kurwa nemadzinza eshe. Kudai ngezvowaita, kunozoitwa kudaro kwouri; kuita kwako kunozopetuka padera pesoro rako. ¹⁶ Ngokuti kudai ngezvemwakamwa padera pomutunhu wangu wakachena, madzinza eshe akamutendenedza anozomwa; anozomwa, echitangurira nawo anozodai ndiwo asikazi kumboapo. ¹⁷ . Asi paMutunhu weZioni kunozoapo avo vakapokonyoka, nawo unozoita wakacheneswa; mhatso yaJakobe inozogara nhaka youpfumi hwayo.

18.

¹⁸ Mhatso yaJakobe inozoita muriro, mhatso yaJosefa murazvu, mhatso yaIsau mahlanga; vachavapisha nokuvapedza; akuzoapo unosara wemhatso yaIsau; ngokuti Mambo Mwari waereketa. ¹⁹ Avo vokubani vanozotora Mutunhu waIsau, naavo vomubani Shefera nyika yevaFiristia; vanozotora nyika yaEfuremu nenyika yeSamaria; Bhenjamini unozotora Gireadhi ²⁰ Vasungwa vehondo iyi yevaIsuraeri vanozotora nyika yevaKhenani, kuguma Zarefathi; nevasungwa veJerusarema, avo vari muSefaradhi, vanozotora madhorobha okubani. ²¹ Avo vakaponeswa vanozouya padera poMutunhu weZioni kutonga Mutunhu Isau; noumambo hunozoita hwaMambo Mwari.”