1 Kutanga kwevhangeri raJesu Kristu, Mwana waMwari. 2 Kudai ngezvezvakanyorwa munaIsaya muprofeti:“Ningirai, ndinotuma munyai wangu pamberi pehope yako, uyo unozonasirira njira yako. 3 Izwi rounodaidzira mushango kuti:"Nasirirai njira yaMambo, ruramisai makwara ake.” 4 Wakauya Johani uwo waibhabhatidza mushango, echichumaira rubhabhatidzo nokutendeuka nokurekererwa zvishaishi. 5 Vakabuda kuenda kwaari venyika yeshe yeJudhia, navo veshe veJerusarema; navo vakabhabhatidzwa ndiye murwizi rweJorodhani, vechitenda zvishaishi zvavo. 6 NaJohani waiya akafuka jira remamviri engamera anebhande redoo muchiunu chake, naye wakadya ndongwe neuchi womushango. 7 Naye wakaparidza echiti:“Iye unouya sure kwangu unesimba kupinda inini, andisisiri kuti nditsikitsire ndisunhure rusinga rwemabutsu ake. 8 Inini ndakamubhabhatidza mumvura; asi ena unozomubhabhatidza ndiMweya Wakachena.” 9 Ngemazuva awo, Jesu wakabva Nazaretha reGarire, akabhabhatidzwa ndiJohani muJorodhani. 10 Paripo Jesu achabuda kubva mumvura wakaona denga rechibeurwa, noMweya wechidzaka padera pake kudai ngenjia. 11 Neizwi rechibva mudenga rechiti:“Iwewe ndiwe Mukororo wangu unodikanwa, uwo wendinonasa kudakara ndiye.” 12 12Paripo Mweya wakamusundira mushango. 13 Waiyamwo mushango mazuva makumi marongomuna, echiedzwa ndiSathani, naye waiya pamwepo nezvikara zvomushango, nengirosi dzakamushandira. 14 Ngesure kwokusungwa kwaJohani, Jesu wakauya muGarire echichumaira vhangeri raMwari. 15 Echiti:“Nguva yasvika noumambo waMwari waapasinde; tendeukai, mutende vhangeri. 16 Echipinda ngepaduze peruandhle rweGarire, wakaona Simoni naAndreu mununguna waSimoni vechikandira majuya muruandhle; ngokuti vaiya vabati vehove. 17 Jesu wakati kwavari: “Nditeerei neni ndinozomuita vabati vevanhu.” 18 Paripo vakasiya majuya avo vakamuteera. 19 Echipinda mberi papfupi, wakaona Jakobe mwana waZebhedhi naJohani mununguna wake, vaiya muchikepe vechinasirisa majuya avo. 20 Paripo wakavadaidza; vakasiya baba avo Zebhedhi nevaranda vari muchikepe, navo vakamuteera. 21 Vakahamba kuenda muKhapernaume, paripo ngezuva reSabatha wakapinda mucheshi akadzidzisa. 22 Vakashamiswa ngokudzidzisa kwake, ngokuti wakavadzidzisa kudai ngounesimba asikaiti kudai ngevanyori. 23 Paripo waiyapo munhu mushechi yawo, waiya nomweya une wakashata. 24 Naye wakadaidzira echiti:“Tinenyi isusu newe, Jesu weNazaretha? Wauya kutiparadza here? Ndinokuzia kuti urianani, uri Wakachena waMwari.” 25 Jesu wakamukaraidza echiti:“Nyarara, buda kubva kwaari.” 26 Nomweya wakachata wakamusukumidza, ukaboorera ngeizwi guru, ukabuda kubva mwaari. 27 Navo veshe vakashamiswa, ngokudaro vakabvunzisana vechiti:“Chiinyi ichi? Kudzidzisa kutsva kakatenderwa? Unopanga kunyazwi mweya yakachata, nayo inomuzwa.” 28 Paripo mbiri yake yakapararira kunyika dzeshe dzakatendenedza Garire. 29 Paripo abuda kubva mucheshi, wakapinda mumhatso yaSimoni naAndreu, pamwepo naJakobe naJohani. 30 Ambuya ache vaSimoni vaiya vakaata vechirwara ngemutsarara, paripo vakamuronzera ndivo. 31 Naye wakauya kavari, akavabata ngenyara, akavamirudza; nemutsarara wakavasiya, navo vakavashandira. 32 Madeekoni zuva rabira vakaunza kwaari veshe vairwara nevaiya nemadhimoni. 33 Nevedhorobha reshe vakaungana pamusiwo. 34 Naye wakaponesa vajinji vairwara ngendhenda dzakaparadzana, akadzinga madhimoni majinji, asikatenderi kuti madhimoni aerekete, ngokuti aimuzia. 35 Mumangwanani maishi wakamiruka, akabuda akaenda pandau iri yega, akakumbira aripo. 36 Simoni naavo vaiya naye vakateera vechimutsvaka. 37 Vakamuona, vakati kwaari:“Veshe vanokutsvaka.” 38 Wakati kwavari, “Ngatiende kumaguta amweni, kuti ndimbochumairazve iyoyo, ngokuti ngezvandakauyira.” 39 Wakahamba echichumaira mumhatso dzavo dzokudira muGarire mweshe, echidzinga madhimoni., 40 Wakauya kwaari munhu waiya nemapere, akamugwadamira, echimupota echiti kwaari:“Kudai wechida ungandimhodyosa. 41 Naye wakamuzwira urombo, wakatambanudza nyara yake, akamubata akati kwaari:“Ndinoda, mhodyoswa.” 42 Paripo mapere akabva kwaari, naye wakamhodyoswa., 43 JesuWakamupangirisa, akamuendesa paripo. 44 Akati kwaari:“ Hona! Ngwara kuti usazoronzera munhu ngeizvi; asi enda, udzipangidzire kunemupristi, uhine ngendaa yokumhodyoswa kwako izvo zvaakaemesa Mosi, kuita chapupu kwavari.” 45 Asi iye wakabuda, akatanga kuchumaira kakurutu nokureketa ngeizvi, ngokudaro Jesu waiya asikachakoni kupinda mudhorobha pamhene, asi waiya kubanze pandau iri yega; navo vakauya kwaari kubva kundau dzeshe.