¹ Wonai kuti musaita mushando yekutendeka kwenyu pamberi pevanhu, kuti vamuone, nekuti mwechizodaro, amuzooni mubhairo kunaBaba enyu ari kudenga. ² Saka mukazoopa zvipo zvenyu kuvarombo, usaridza gwama pamberi penyu imimi, kudai ngezvevanoita vadziitisi mumhatso dzemumapato ne mumapato, kuti varumbidzwe ngevandhu. Ngegwinyiso ndinoti kwomuri, vatoashira mubhairo wavo. ³ Asi, woopa zvipo zvako kuvarombo, usatendera kuti nyara yako yokumuoshwe izie chinoitwa ngenyara yako yokumurhyo, ⁴ kuti zvipo zvako zvipuwe ngokufishika; naBaba ako vanoona mukufishika vanozokupawo. ⁵ Apo mwookumbira, musazodai ngevadziitisi, ngokuti vanoda kukumbira vechiema mumhatso dzokudira nepamhararano mumapato, kuti vaoneke ngevanhu. Ngegwinyiso ndinoti kwomuri, vatoashira mubhairo wavo. ⁶ Asi iwewe, apo wookumbira, potera mukamera rako repakati, naapo konya musiwo, kumbira kunaBaba wako vari mukufishika, naBaba ako vanoona mukufishika vanozokupawo. ⁷ Asi mukukumbira kwenyu musazohwirinzira mashoko asina shwiro, kudai ngezvevanoita vemadzinza; ngokuti vona vanofunga kuti vanozozwiwa ngokuwanda kwemashoko avo. ⁸ Ndizvo musazodai ndivo, ngokuti Baba enyu vanozia izvo zvomunotama musati mwakumbira kwaari. ⁹ Ndizvo kumbirai ngeiyi njira: “Baba edu vari kudenga, zita renyu garikudzwe. ¹⁰ Umambo wenyu ngahuuye. Kuda kwenyu ngakuitwe munyika kudai ngomudenga. ¹¹ Tipei kudya kwedu kwezuva nyamashi. ¹² Tirekererei zvitadzo zvedu kudai tisu takarekerera avo vano tadzaa kwetiri. 1 ¹³ Musatipinza mukuedzwa, asi tinunurei kubva kuneuwo wakashata. ¹⁴ Ngokuti kudai imwimwi mwechirekerera vanhu zvichaichi zvavo, Baba enyu ari kudenga vanozomurekererawo nemwi. ¹⁵ Asi kudai musikarekereri vanhu zvichaichi zvavo, naBaba enyu avazomurekereriwo imwimwi zvichaichi zvenyu. ¹⁶ Kunze kwe izvo, mukazo tsanya, musasunga hope dzenyu kudai ngevadziitisi, ngokuti vanodzishaisha hope dzavo kuti vaoneke ngevanhu kuti vari pamutsanyo. Ngegwinyiso ndinoti kwomuri, vatoashira mubhairo wavo. ¹⁷ Asi kwamuri, mukazo tsanya, dzodzai musoro dzenyu, nekushamba muhope menyu. 1 ¹⁸ Kuti musazooneka ngevanhu kuti muri pamutsanyo, asi ndiBaba venyu vari pakafishika, naBaba venyu avo vanoona mukufishika, vanozokupawo. ¹⁹ Musadziunganidzira upfumi munyika, apo unundu nengura zvinozvishaishira, apo mbavha dzinopwanya nekube. ²⁰ Asi unganidzai upfumi kudenga, apo unundu nokuti ngura zvisikazvishaishiri, apo mbavha adzizo pwanyi nekube. ²¹ Ngokuti panenge pane upfumi wako, apo ndipo panozowavo nemwoyo wako. ²² Chibani chomuiri idziso, ndizvo kudai dziso rako riri dziso kwaro, muiri wako weshe unozozara ngokujeka. ²³ Asi kuti dziso rako rakashata, muiri wako weshe unozozara ngechidima. Ndizvo kudai kujeka kuri mukati mwako kuri chidima, kukuranyi kwechidima icho! ²⁴ Akuna munhu angakona kushandira madzimambo mairi, ngokuti unozonyenyeredza umwe, ade umweni, nokuti unozoshoora umwe abatirire kunoumweni. Amungashandiri Mwari nemare. ²⁵ Ngendaa yeichi ndinoti kwomuri, musadembatemba mundaramo yenyu, kuti munozoryei nokuti munozomwei nokuti ngendaa yemuiri wenyu, kuti munozopfekei. Kutendeka akupindi kurya here, nemuiri aupindi zvokupfeka here? ²⁶ Ningirai shiri dzomudenga kuti adzikushi, adzivhunizve, nokuti kuunganidza mumatura; asi Baba enyu ari kudenga unodzipa zvokurya. Imwimwi amuna kukosha kukuru kupinda idzo here? ²⁷ Ndiani kwomuri ngokudembatemba ungakona kututsira zuva rimwe rekupona kwake. ²⁸ Nemwi munodembatemba ngeyi ngezvokufuka? Pinimidzai ngeminyimbiri yomushango kumera kwayo, aishandi, airukizve, ²⁹ asi inini ndinoti kwomuri, naSoromoni muutende wake weshe aazikupfekezka kudai ngoumwe wayo. ³⁰ Asi kudai Mwari echipfekedza kudaro mwenje womushango, uwo uripo nyamashi, mangwani unokandirwa muchoto, aazopindi here kukuru kumupfekedza, imwimwi mune kutenda kudokodoko? ³¹ Ndizvo musadembatemba mwechiti, ‘Tinozoryei?’ nokuti, ‘Tinozomwei?’ nokuti, ‘Tinozopfekei?’ ³² Ngokuti vemadzinza vanotsvaka izvi zveshe, ngokuti Baba enyu vari kudenga vanozia kuti munozvitama izvi zveshe. ³³ Asi tsvakai kutanga umambo wake nekutenda kwake, neizvi zveshe zvinozotutsirwa kwomuri. ³⁴ Ndizvo musazodembera mangwani, ngokuti mangwani unozodzidembera. Kutambudzika kwezuva kunokwana zuvaro.