¹ Apo Jesu wakakweiwa neMweya kuenda mushango kuti aedzwe ndiDhiabhorosi. ² Paakabva ko tsanha mazuva makumi marongomuna masikati nousiku, ena wakazwa nzara. ³ Muedzi wakauya kwaari akati, “Kuti iwewe uri Mwanakomana waMwari, chironzera aya mapuwe aite zvingwa”. ⁴ Asi ena wakamupingura akati, “Kwakanyorwa kuti munhu aazorarami ngechingwa chega, asi ngemazwi eshe anobuda Mwanakomana waMwari"'. ⁵ Apo Dhiabhorosi wakamutora kuenda naye kudhorobha rakachena, wakamuisa padera peTemberi ⁶ akati kwaari, “Kuti iwewe uri Mwanakomana waMwari, dzikandire pashi, nekuti kwakanyorwa kuti, ‘Unozoronzera ngirosi dzake ngendaa yako, nadzo dzinozokubata ngenyara dzadzo, kuti usazokuwara tsoka yako pabuwe. ⁷ Jesu wakati kwaari, “Kwakanyorwazve kuti, ‘Usazoedza Mambo Mwari wako. ⁸ Zve, Dhiabhorosi wakamutora kuenda pamutunhu wakanyanya kureba, wakamukombidzira umambo weshe wenyika noutende wahwo. ⁹ Naye wakati kwaari, “Izvi zveshe ndinozokupa, kudai wetchizogwadama pashi nokundidira”. ¹⁰ Apo Jesu wakati kwaari, “Ibva Sathani, nokuti kwakanyorwa kuti, ‘Unozodira Mambo Mwari wako nokumushandira ena ega. ¹¹ Saka, apo sathani waka musia, ngirosi dzika uya nekumu shandira. ¹² Apo Jesu paakazwa kuti Johani wakasungwa, wakahwirirazve Garire. ¹³ Echibva Nazaretha, wakauya akagara muKhapernaume, rinogara phaduze peruandhle, munharaunda dzeZebhuruni neNafitari. ¹⁴ Kuti rizadzisike izwi iro rakareketwa ndiIsaya muprofeti echiti: ¹⁵ “Nyika yeZebhuruni nenyika yeNafitari, panjira inoenda kuruandhle, seri kweJorodhani, Garire revanhu vemadzinza. ¹⁶ Vanhu avo vainga vakagara muchidima vakaona kujeka kukuru; naavo vainga vakagara munyika nomubvute rokufa, kujeka kwakavabudira”. ¹⁷ Kubvira neiyo nguwa Jesu wakatanga kuchumaira etchiti, “Tendeukai; nokuti umambo womudenga waa phaduze”. ¹⁸ Etchihamba phaduze peruandhle reGarire, wakaona vakoma vairi, Simoni unozwi Petro, naAndreu munukuna wake, vechikandira nhaa yavo muruandhle; nokuti vainga vari vabati vehove. ¹⁹ Wakati kwavari, “Teerai sure kwangu, neni ndinozomuita vabati vevanhu”. ²⁰ Kubvaapapo vakasia nhaya dzavo vakamuteera. ²¹ Echibva apo wakaona vakoma vamweni vairi, Jakobe mwanakomana waZebhedhi ne munukuna wake Johani, vari mungarava pamwepo nababa avo Zebhedhi vechinasira nhaya dzavo; naye wakavadaidza. ²² Apo wakabva vakasiya ngarava nababa avo, vakamuteera/. ²³ NaJesu wakahamba-hamba muGarire mweshe, etchidzidzisa mumhatso dzavo dzokudira nokuchumira vhangeri roumambo, nokurapa mbeu dzeshe dzokurwara nembeu dzeshe dzenhenda mukati mwevanhu. ²⁴ Nembiri yake yakateketeswa munyika yeshe yeSiria, navo vakaunza kwaari veshe vairwara avo vainga nemadenda dzakaparadzana, nevainga nezvinorwadza, naavo vainga vane madhimoni, navo vainga nenhutu, naavo vainga vakaoma muiri, ena wakavaponesa. ²⁵ Yakamuteera mbungano huru yevanhu vechibva Garire, Dhekaporisi, Jerusarema, Judhia noruseri rweJorodhani.