¹ Ngokuti uyu Merekhizedheki, mambo weSaremu, mupristi waMwari Uri- Padera-Pazveshe, wakashongana naAbrahama, echipetuka kubva koorwa nemadzimambo naye wakamupfumisa. ² Kwaarizve Abrahama wakapa “Chimwe chegumi cheizvo zveshe.” Zita rake pakutanga rinoronza kuti: “Mambo wakunaka;” sure kwazvo unozwi, mambo weSaremu, rinoronza kuti, “Mambo wokunyarara.” ³ Asina baba, asina mai, asina madzisekuru, asina maambo emazuva nokuti magumo endaramo, asi wakaitwa kudai ngomuedzaniso weMwana waMwari, unogara ari mupristi mhera nariini. ⁴ Wonai kukura kwaakaita murume uyu! Kunyazwi naAbrahama, baba mukuru, akamupa chimwe chegumi cheizvo zvaakachakata. ⁵ Ngegwinyiso naavo vemhuri yaRevhi vanoashira mushando woupristi, vanopangwa ngeMupango kuti vatore chegumi kuvanhu, ndikwo kuti kubva kuhama dzavo, kunyazwi vakabva muchiunu chaAbrahama. ⁶ Asi munhu uyu, mubarirwana wake usikazi kuerengwa rudzi rwake kwavari, wakatora chegumi kubva kunaAbrahama, akamupfumisa uwo wakaashira zvigondiso. ⁷ Zviri pamhene pasina kuphikisa kuti mudoko unopfumiswa ngomukuru. ⁸ Panapa vanhu vanofa vanoashira chimwe chegumi; pamweni ngoumweni uwo unopupurwa ndiye kuti unorarama. ⁹ Umwe ungaronza kuti Revhi pachake unoashira chegumi, wakapawo chegumi kubudikidza ndiAbrahama, ¹⁰ ngokuti iye waiya achiri muchiunu chababa ake, apo Merekhizedheki paakashongana naye ¹¹ Zvino kudai kuperera kwakaoneka kubudikidza ngoupristi hwaRevhi (ngokuti vanhu vakaashira Mupango paupristi uhu) kwaiya kuchatamikenyi kuti tirekete ngomupristi umweni kudai ngokuteera urongwa weupristi waMerekhizedheki, pane kuti umwe worudzi rwaAroni? ¹² Ngekuti apo upristi wechishandurwa kunofanira kuti Mupango ishandurwe. ¹³ Ngokuti uwo unoreketwa ndiye ngeizvi zviro ngowedzinza rimweni, kubva kwaari akuna naumwe

wakamboshanda paarita.

¹⁴ Ngokuti zviri pamhene kuti Mambo wedu wakabva kudzinza raJudha, ngeiri dzinza Mosi aazi kuereketa chiro ngendaa yevapristi. ¹⁵ Izvi zvakapinda kunasa kuita pamhene, kudai kwechimiruka mupristi umweni wakatodzana nemuemo waMerekhizedheki, ¹⁶ uwo usikazi kuitwa mupristi kudai ngechironzo chemupango wenyama, asi wakaitwa ngesimba rokupona kusikaperi. ¹⁷ Ngokuti ndiye unopupurirwa kuti, “Iwewe uri mupristi mhera nariini kudai ngeurongwa hworudzi rwaMerekhizedheki. ¹⁸ Ngekuti kuripo, munyara imweni, kutama simba kwemupango wekutanga ngendaa yekurembedzeka nekusikadetsera kwawo. ¹⁹ Ngekuti mupango apana chiro chewakaita chakaperera; kuripozve, munyara imweni, kutanga kwegonda rakapinda kunaka, kubudikidza ndiro tinokwedzera kunaMwari. ²⁰ Ichi chakagwinyiswa ngemhiko; ngokuti ivo ngegwinyiso vakaitwa vapristi pasina mhiko, ²¹ pamweni uyu wakaitwa mupristi ngokupika mhiko ngendaa youwo wakati kwaari: “Mambo wakapika naye aazokunukudzi mupinimidzo wake, ‘Iwewe uri mupristi mhera nariini. ²² Ndizvo Jesu wakaitwa chibatiso chechitenderano chakapinda kunaka. ²³ Vapristi vokutanga vaiya vazhinji, ngokuti vairambidzwa ngerufu kuangira kugara varimwo mumushando. ²⁴ Asi unogara mhera nariini, anawo upristi wake, ngekuti unoangira mhera nariini. ²⁵ Ndizvozve unesimba rekuponesa yaamho avo vanokwedzera kunaMwari kubudikidza ndiye, ngokuti unorarama nguva dzeshe kuti avakumbirire. 26 ²⁶ Ngokuti zvainga zvakanaka kuti taifanira kuwa nemupristi mukuru, wakachena, usikashooreki, usina chinosvipisa, wakaparadzaniswa nevashaishi, wakamirudzwa padera pematenga. ²⁷ Kusiana nevamewni, uwo usikatami kupira midiro zuva ngezuva, kutanga ngendaa yezvishaishi zvake, ngesure kweizvo ngendaa yezvishaishi zvevanhu, kudai ngezvevakaita avo vapristi vakuru. Ngokuti wakaita izvi kamwe kega, apo paakadzipira pachake. ²⁸ Ngekuti Mupango inoemesa kuita vapristi vakuru vanhu vakarembedzeka, asi izwi remhiko, rakateera kuuya sure kwokupirwa kweMipango, rakaemesa Mwana uwo akaitwa akaperera mhera nariini.