¹ Rudo pakati pehama ngarugare. ² Musariyarwa kuonisa rudo kuvahambi, ngokuti ngokuita kudaro vamweni vakaashira ngirosi vasikazii. ³ Karakadzai vakasungwa, mwechiita kudai ngevakasungwa pamwepo navo, neavo vanoitirwa zvakashata, kudai ngevanoitirwa pamwepo navo. ⁴ Kuroora ngakureremedzwe ngevanhu veshe, nomubhedhi wakwo auzi kusvipiskwa; ngokuti Mwari unozotonga zvifebi nevaombi. ⁵ Kupona kwenyu ngakuite kusikakariri mare, itai vanogutiswa ngeizvo zvomunazvo; ngokuti wakati, “Anditongomurekeri nokuti kukusiya.” ⁶ Ndizvo ngokutsunga tingakona kuronza kuti, “Mambo Mwari mudetseri wangu, andizotyi. Munhu ungazoitenyi kwendiri?” ⁷ Karakadzai vatungamiriri venyu, avo vakareketa kwomuri izwiraMwari; mwechifunga ngemagumo ekupona kwavo, muedzerere kugonda kwavo. ⁸ Jesu Kristu unogara akadaro zuro nanyamashi, eya, mhera nariini. ⁹ Musapauswa ngezvidzidziso zvakaparadzana nezvisikaziikanwi. Ngekuti kwakanaka kuti mwoyo igwinyiswe ngenyasha, haiwa ngezvokudya, izvo zvevasikazi kudetserwa ndizvo avo vakahamba mwezviri. ¹⁰ Tine arita isusu revasikatenderwi kurha kubva kweriri avo vanoita mushando mutende. ¹¹ Ngekuti miiri yemhuka dzine ngazi inounzwa kundau yakachena ngemupristi mukuru kuita mudiro wokushaisha, inopishkwa kubanze kwekamba. ¹² Ndizvo Jesu wakatambudzikawo kubanze kwemusiwo wedhorobha, kuitira kuti achenese vanhu kubudikidza ngengazi yake. ¹³ Ndizvo ngatibude tiende kwaari kubanze kwekamba, titware kutsverudzwa kwake. ¹⁴ Ngekuti munyika muno atina dhorobha rinogara, asi tinotsvaka dhorobha iro rinouya. ¹⁵ Kubudikidza ndiye, zvino, ngatiangire kupira mudiro wokukudza kunaMwari, kuronza kuti, kupira muchero yemiromo yedu inopupura ngezina rake. ¹⁶ Asi musariyarwa kuita zvakanaka nokukoana zvemunazvo. Ngekuti Mwari unonasa kudakadzwa ngemidiro yakadaro. ¹⁷ Zwisisai vatungamiriri venyu nokuvapfaira. Ngokuti ivo vanogara vakarinda mweya yenyu, navo vanozobvunziswa ngendaa yenyu. Ngavaite izvi ngekudakara, haiwa ngekutambudzika, ngokuti izvi zvingazomuremadza. ¹⁸ Tikumbirireyi, ngokuti tinozia kuti tine mhumba isina ndaa, tinoemurira kuhamba takagondeka muzviro zveshe. ¹⁹ Ndinomupota kuti muite izvi, kukuru kuti ndipetudzwe kwomuri ngokukasira. ²⁰ Mwari wekunyarara, uwo wakaunzazve kubva kwevakafa Mambo wedu Jesu, muushi mukuru wemakwai ngengazi yechitenderano chisikaperi, ²¹ ngaamuchenese kuzviro zveshe zvakanaka, kuti muite kuda kwake, echishanda pakati pedu izvo zvinonasa kumudakadza pamberi pake, kubudikidza ndiye Jesu Kristu, kwaari ngahugare huripo uthende mhera nariini. Ameni. ²² Ndinomupota, hama, shingirirai izwi rangu rekupanga, ngokuti ndakanyora kwomuri ngemazwi mashomani. ²³ Ndinoda kuti muzie kuti hama yedu Thimothi wakasunhurwa kubva mutirongo; kuti ena akakasira kuuya, ndinozouya pamwepo naye apo ndouya koomuona. ²⁴ Tambisai veshe vatungamiriri venyu nevakacheneswa veshe. Avo vakabva Itaria vanomutambisa. ²⁵ Nyasha ngadzigare nemwi mweshe.