¹ Jakobe wakamurudza madziso ake, akaningira, akaona Isau echiuya, ane vanhu mazana marongomuna. Jakobe Wakapaura vana pakati paRea naRacheri nevarandakadzi vairi. ² Wakaisa varandakadzi vairi nevana vavo pamberi, Rea nevana vake ngepasure, Racheri naJosefa ngepekupedzisira. ³ Ena emene wakaambuka ngepamberi pavo, akadzikotamisa kanomwe pamavhu, kuswikira akwedzera kunemukoma wake. ⁴ Saka, Isau wakarumba koosangana naye, akamukwambatira, nekumukisa wakachema. ⁵ Isau paakamurudza madziso ake, akaona vakadzi nevana, akabvundza: “Ndiani avo vounavo?” Jakobe akadhaira echiti: “Vana vaakapa Mwari ngenyasha kunemuranda wako.” ⁶ Apo varandakadzi vakakwedzera paduze nevana vavo, vakadzikotamisa. ⁷ Pakutera Rea nevana vake vakakwedzerawo paduze, vakadzikotamisa.Pakupedzisira Josefa naRacheri wakakwedzera paduze vakadzikotamisa. ⁸ Saka Isau Wakati: “Unoronzeyi ngeizvo zvikwata zveshe zvendasangana nazvo?” Jakobe wakati: “Ngezvekuitira kuti ndione nyasha mukuona kwamambo wangu.” ⁹ Isau wakati: “Ndine zvakakwana, munun'una wangu; nguarira zveunazvo ngazviite zvako.” ¹⁰ Jakobe wakati: “Haiwa, ndapota, kudai ndaona nyasha mukuona kwako, ashira chipo changu kubva munyara yangu, ngekuti ndaona hope yako kudai ngomunhu waona hope yaMwari, newe wadakara ndini. ¹¹ Ndapota Ashira chipo changu icho chaunzwa kweuri, ngekuti Mwari wakaita nyasha kwendiri, ngokuti ndinazvo zvakakwana.” Jakobe Wakamunyengerera, kuswikira Isau aashira chipo chake. ¹² Saka, Isau Wakati: “Ngatihatere njira yedu, neni ndichazotungamira pamberi pako.” ¹³ Asi Jakobe wakati kwaari: “Mambo wangu unozia kuti vana vachi vatete, makwai nen'ombe zvineni zvinoamwisa, kudai vechizonyanya kuzvitinha zuva rimwe, nezvifuyo zveshe zvinozofa. ¹⁴ Ndinomupota, mambo wangu ngaatungamire pamberi pemuranda wake, neni ndinozohamba padoko padoko, kudai ngezvingagwinyirwa ngezvifuyo zvinohamba pamberi pangu, nekudai ngezvinogwinyirwa ngevana, kuswikira ndigume kunamambo wangu kuSeira.” ¹⁵ Isau wakati: “Ngandisiye kwauri vamweni vevanhu vangu. ” Asi Jakobe wakati: “Ngei mechiita kudaro? Mambo wangu une nyasha neni''. ¹⁶ Saka Isau wakahwirira ngenjira yake yekuenda Seira. ¹⁷ Jakobe wakahamba kuenda Sukothi, akadziakira mhatso, wakaaka zvibaya zvezvifuyo zvake, zita rendau iyo rakadudzwa kuti Sukothi. ¹⁸ Paakaguma Jakobe kubva Padhana-aramu wakaguma zvakanaka kudhorobha reShekhemu, riri munyika yeKhenani, iro riri munyika ye Kenani paakaemesa matende ake paduze nedhorobha. ¹⁹ Apo, Wakatenga chigurwa chenyika kubva kunevana vaHamori, baba aShekhemu, ngezvigurwa zvesirivha zana, apo paainga aemesa matende ake. ²⁰ Saka Wakaakepo arita, akaridudza kuti Eri-erohe-Isuraeri.