¹ Ndizvo mambo naHamani vakapotera mudhiri naEsita vahosi. ² Pazuva rechipiri vechimwa vhini, mambo wakatizve kunaEsita “Chiinyi chichemo chako, vahosi Esita? Chinozopuwa kwouri. Chiinyi chikumbiro chako? Chinozoitwa kwouri kunyazwi rupande rwoumambo hwangu.” ³ Zvino Esita vahosi wakapingura, akati, “Kudai ndaona nyasha mukuona kwamambo, A mambo, nokudaizve zvechidakadza mambo, ngandipuwe kupona kwangu, ndicho chichemo changu, nokupona kwevanhu vangu, ndicho chikumbiro changu. ⁴ Ngokuti isusu takatengeswa, inini nevanhu vangu, kuti tiparadzwe, tiurawe, kuti tipedzwe. Dai taiya takatengeswa kuita hloko, vamuna nevakadzi, ndaizodai ndakanyarara; asi akuna gaa ringakona kuripira kushata ukwo kwakaitwa kunamambo. ⁵ Zvino mambo Ahasuerusi wakati kunaEsita vahosi, “Ndiani uwo, umboripari, uwo unokushinga mumwoyo mwake kuita izvi?” ⁶ NaEsita wakati, “Gaa nebandu, ndiye uyu Hamani wakashata.” Zvino Hamani wakatyiswa pamberi pamambo navahosi. ⁷ Mambo wakamiruka kubva padhiri muushungu hwake, akaenda mumunda wengome, asi Hamani wakagara kuti adzikumbirire kupona kwake kunaEsita vahosi; ngokuti waiya aona kuti mambo waiya adziemesera kumuparadza ⁸ Naapo mambo apetuka sure kubva mumunda wengome kuuya kundau yedhiri, Hamani waiya adzikandira pamubhedhi apo paaigara Esita; namambo wakati, “Unozoangiridza vahosi here pamberi pangu mumhatso yangu?” Naapo mazwi achabuda kubva kumuromo wamambo, vakafukidza hope yaHamani. ⁹ Zvino Habhona, umwe wemithenwa yamambo, wakati pamberi pamambo, “Ringirai, muti umwewo, waakanasira Hamani kusungira Mordhekhai, uwo izwi rake rakaponesa mambo, nawo wakaema mamitha makumi mairi nemairi kureba pamhatso yaHamani.” Namambo wakati, “Musungirenyi padera pawo.” ¹⁰ Ndizvo vakasungira Hamani padera pomuti uwo waakanasira kusungirapo Mordhekhai. Naapo ushungu hwamambo hwakapora.