¹ Naapo tapona, takazia kuti chiwi chaizwi Maritha. ² Vagari vepachiwipo vakatiitira nyasha dzinoshamisa, ngokuti vakatibasirira muriro, vakatiashira teshe, ngokuti mvura yainaya nechando. ³ Asi apo Phauri aunganidza dzido rehuni nokuriisa pamuriro, buura rakabuda ngendaa yokupisha, rikaramba rakaruma panyara yake. ⁴ Naapo vagari vepachiwipo vaona chikara chakaruma panyara yake, vakati umwe kunoumweni: “Ngegwinyiso uyu munhu muurayi; kunyazwi akapona kubva muruandhle, kururama akumutenderi kuti apone.” ⁵ Asi iye wakazuwira chikara pamuriro, asikazi kuremadzwa. ⁶ Vakaema vechikarakadza kuti uchazvimba nokuti kuwa pashi ngokukasira echifa; asi apo vagarira mukuwo wakareba, vasikazi kuona chiro chakashata chechiitika kwaari, vakakunukudza kupinimidza kwavo, vakati, uyu chimwari. ⁷ Zvino pasinde pendau iyo paiya neminda yamambo mukuru wechiwi, zina rake raizwi Pabhuriusi; uwo wakatiashira, akanasa kutingwarira mazuva matatu. ⁸ Kwakaitika kuti baba aPabhuriusi vaiya vakaata vakabatwa ngemutsarara nenyoka dzokuhambisa; Phauri wakapoteramwo mwevaiya, akakumbira, echiisa nyara dzake padera pavo, akavaponesa. ⁹ Naapo izvi zvaitika, vamweni vevanhu vaiya nenhenda pachiwi, vakauya vakaponeswa. ¹⁰ Vakationisa kuremeredzwa kukurutu; tobvapo ngengarava, vakakwidza mungarava izvo zvetaitama parwendo. ¹¹ Ngesure kwemwedzi mitatu takahamba tiri mungarava yokwaArekizandria, iyo yaiya yakagara pachiwipo mukuwo wechando weshe, chioniso chayo chaizwi Chimwari Manyambiri. ¹² Techiguma Sirakuse, takagarapo mazuva matatu. ¹³ Tabvapo takatenderera, tikaguma Regiumu. Ngesure kwezuva rimwe dutu raibva ngokubani rakavhuvhuta, nepazuva rechipiri takaguma Phuteori. ¹⁴ Ndipo petakaona vatendi, vakatikoka kugara navo mazuva manomwe. Ndizvo takaguma Roma. ¹⁵ Kubvira apo, vakoma vakazwa ngendaa yedu, vakauya kutiashira, metsa paMusika weApiusi nokuHodhera Nhatu. Apo Phauri avaona, wakabonga Mwari, akashingiswa. ¹⁶ Naapo takapotera muRoma, nduna yezana yakapira mabhanditi kune nduna yechikwata chemajoni, asi Phauri wakatenderwa kugara ari ega nejoni raimungwarira. ¹⁷ Kwapera mazuva matatu, wakadaidza pamwepo avo vaiya vakuru vevaJudha; naapo vaiya vaungana, wakati kwavari: “Hama, kunyazwi inini andizi kuita chiro chakashata kunevanhu vedu nokuti kumishuma yemadzibaba edu, asi ndakabva Jerusarema ndiri bhanditi, ndakaiswa munyara dzevaRoma. ¹⁸ Naapo vaiya vandibvunzisisa, vakada kundisunhura, ngokuti paiya pasina ndaa yokuti ndiurawe. ¹⁹ Asi apo vaJudha varamba, ndakaitwa kuti ndikwidze ndaa yangu kunaSiza; haiwa kuti ndaiya nendaa yokumangarira dzinza rangu ndiyo. ²⁰ Ndizvo ngeiyi ndaa ndakamudaidza kuti ndimuone nokuereketa nemwi, ngokuti ngendaa yegonda raIsuraeri ndakasungwa ngeketani iyi.” ²¹ Navo vakati kwaari: “Atizi kuashira tsamba dzakabva Judhia ngendaa yako, akunazve umwe wevatendi wakauya pano kootironzera nokuti kuereketa chiro chakashata ndiwe. ²² Asi tinodisisa kuzwa ndiwe izvo zvounopinimidza; ngokuti ngendaa yechiunga ichi, kunoziikanwa kwetiri kuti kundau dzeshe chinoereketwa zvakashata ndicho.” ²³ Naapo vaiya vamuemesera zuva, vakauya kwaari vakawanda pandau paaigara. Wakavaerengudzira, echipupura ngoumambo hwaMwari, echinasa kuvaronzera ndiJesu, kubvira kuMipango yeshe yaMosi nevaprofeti, kubvira mangwanani metsa madeekoni. ²⁴ Vamweni vakatenda izvo zvaakaronza, asi vamweni avazi kuzvitenda. ²⁵ Ndizvo avazi kutenderana pachavo; naapo vechibvapo, Phauri aereketa izwi rimwe kuti: “Mweya Wakachena wakanasa kuereketa ndiIsaya muprofeti kunemadzibaba enyu, ²⁶ “echiti: ‘Enda kuneava vanhu wechiti, ngegwinyiso munozozwa, asi musikazwisisi; ngegwinyiso munozoona, asi musikaonesisi. ²⁷ Ngokuti mwoyo yeava vanhu yakakonza nenzee dzavo adzizwisisi nemadziso avo vakatswatira; kuti vasazoona ngemadziso avo, vazwe ngenzee dzavo, nokuzwisisa ngomwoyo yavo, vatenderuke, neni ndivaponese.’ ²⁸ “Ndizvo ngakuziikanwe kwomuri kuti urwu ruponeso rwaMwari runotumirwa kumadzinza; navo vanozozwawo.” ²⁹ Naapo aereketa mazwi aya, vaJudha vakaenda vechiitirana hasha huru. ³⁰ Naye wakagara makore mairi eshe ari mumhatso yake yaaibhadhara pachake, echiashira avo veshe vaipoteramwo,, ³¹ echichumaira umambo hwaMwari nokudzidzisa ngendaa yaMambo Jesu Kristu ngokushinga kweshe, pasina naumwe waimurambidza.